စာအုပ်အမည် - အပြေးအကြောင်းပြောရင်း ပြောဖြစ်တာတွေ

မူရင်းစာအုပ် အမည် - What I talk about When I talk about running

မူရင်းစာရေးသူ - Haruki Murakami

ဘာသာပြန်သူ - ဒီနိုဗို

စာအုပ်တန်ဖိုး - ၂၅၀၀ ကျပ်

ပထမအကြိမ် သြဂုတ်လ ၂၀၁၆ 

Monument book Publishing

“ဒီစာအုပ်ဟာ အပြေးသက်သက်ထက် မူယာကာမိဆိုတဲ့ စာရေးဆရာတစ်ယောက်ရဲ့ အချိန်ကာလနဲ့ အပြိုင် ဖြတ်သန်းရွှေ့လျားရင်း ရလာတဲ့ ဘဝအမြင်၊ လောကအမြင်၊ သူ့ပင်မအလုပ်ဖြစ်တဲ့ စာရေးခြင်းအပေါ် ပြန်လည်သုံးသပ်ဆင်ခြင်မှုတွေနဲ့ စိတ်ဝင်စားစရာကောင်းလှတဲ့ အဖိုးတန် ကိုယ်ရေးမှတ်တမ်း တခု၊ ပြန်လည်အမှတ်ရမှုတခု ဖြစ်နေတာကို တွေ့ရပါတယ်။ 

ဒီစာအုပ်ဟာ စာရေးမယ့်သူ၊ အနုပညာဖန်တီးမယ့် သူများအတွက်သာမက ကိုယ့်ဘဝကိုယ် ပြဌာန်းနေကြတဲ့ တဦးချင်းဘဝတွေအတွက်ပါ ပြန်လည်ဆင်ခြင် သုံးသပ်ကြည့်စရာတွေနဲ့ပြည့်နေတဲ့အတွက် တစုံတစ်ရာ အကျိုးရှိလိမ့်မယ်ဆိုတဲ့ ယုံကြည်မှုနဲ့ အတတ်နိုင်ဆုံး ကြိုးစားပြန်ဆိုလိုက်ပါတယ်။”

ဘာသာပြန်သူအမှာ မှ 

နော်ဝေတောအုပ်နဲ့ နယ်ခြားတောင်ဘက် နေမင်းအနောက်ဘက်ကို စဖတ်မိရာက မူယာကာမိကို ကိုယ်သိခဲ့တယ်။ ကြိုက်လည်း ကြိုက်ခဲ့တာ။ ကမ်းခြေပေါ်မှာ ကက်ဖကာကို ဖတ်ပြီးတဲ့ အချိန်မှာ သူ့စာအုပ်တွေနောက် အသည်းအသန် ကိုယ်လိုက်မိပြီ။ မြန်မာပြန်မရှိတဲ့ စာအုပ်၊ ဒါမှမဟုတ် မြန်မာပြန်မှာ ဖတ်ဖို့ ကိုယ့်သဘောနဲ့ မတွေ့တဲ့ စာအုပ်တွေကျရင် ABCD စကားနဲ့စာဖတ်ဖို့ပျင်းတဲ့ ကိုယ်… သူစာအုပ်ကိုတော့ ABCD စာလုံးပေါင်းပြီး ကြိုးစားဖတ်မိအောင် စွဲဆောင်ခဲ့တယ်။ 

မူယာကာမိကို ဘာလို့ ဒီလောက်ကြိုက်လဲဆိုတော့ သူဟာ လူတွေရဲ့အတွင်းစိတ်နဲ့ စိတ်တွေရဲ့အပြောင်းအလဲ၊စိတ်အမူအယာ၊ ရုပ်အမူအယာတွေကို အသေးစိပ်လေးက အစ ဖွဲ့ပြနိုင်တယ်။ အတွေးတွေရဲ့ အပြောင်းအလဲတွေ စိတ်ကူးမိလို့ရေးတာမဟုတ်ပဲ သူကိုယ်တိုင် မြင်တွေ့တာကို ရေးတဲ့ သဘောမျိုးကို ခံစားရတယ်။

အတွင်းစိတ်ကို ဖွဲ့ပြတာ တကယ့်ကို အသေးစိပ်လေးတွေ။ သူ့စာဖတ်ရင်း သူဟာ တရားများထိုင်လားလို့တွေးမိတာ ခဏခဏပဲ။ သူဘာလို့ စိတ်ကို၊အတွေးကို ဒီလောက်သိနိုင်သလဲပေါ့။ အခုစာအုပ်ကို ဖတ်လိုက်တဲ့အခါမှာတော့ ကိုယ့်စိတ်ထဲ တွေးနေတဲ့ အတွေးဟာ ရှင်းလင်းသွားတယ်။ 

သူဟာ တရားမထိုင်ပဲ မာရသွန်ပြေးတယ်။ တစ်ပတ်ကို ၆ ရက် တစ်ရက်ကို အနည်းဆုံး ၁ နာရီ အပြေးလေ့ကျင့်တယ်။ ကမ္ဘာအရပ်ရပ်က မာရသွန်ပွဲတွေ၊ ရေကူး၊ စက်ဘီးစီး၊ အပြေး သုံးမျိုးပေါင်းထားတဲ့ Triathlons လို့ခေါ်တဲ့ တာဝေးအားကစားပြိုင်ပွဲတွေ ပြိုင်တယ်။ သူစာရေးဖို့ စိတ်ကူးတော်တော်များများဟာ ဒီလိုပြေးနေရင်း ရခဲ့တယ်လို့လည်း ပြောတယ်။ တစ်ချို့တစ်ချို့ အပိုဒ်တွေမှာကျ ပြေးနေချိန်မှာ သူဟာ ဗလာနယ်ထဲရောက်သွား ရောလို့ ပြောတယ်။ 

ဘာသာပြန်သူရဲ့ အမှာလိုပါပဲ။ ပြေးတာချည်းသက်သက်မဟုတ်ပဲ သူ့အကြောင်းတွေကို ကိုယ်ဒီစာအုပ်ဖတ်ရင်း တော်တော်လေးသိလိုက်ရတယ်။ သူအကြောင်းတွေရော၊ သူ့အတွေးအမြင်တွေပါပေါ့။ ဒီစာအုပ်မှာ အက်ဆေးပုံစံ စာစု ၉ စုပါတယ်။ တစ်ပုဒ်မှ ညီးငွေ့ဖွယ်မရှိဘူး။ ဒီစာအုပ်ကို တနလာင်္နေ့က ဝယ်ခဲ့ပြီး မနေ့ညက တစ်ပုဒ်မြည်းကြည့်တယ်။ မနက် ရုံးသွားရင်း ကားပေါ်မှာဖတ်၊ ဆေးရုံတတ်နေရတဲ့ သူငယ်ချင်း သိန်းနိုင်စားဖို့ ဖက်ထုတ်ပြုတ်ဝယ်၊ ဆိုင်ရှေ့မှာ စောင့်ရင်း ဖတ်တယ်။ အဲဒါပြီးတော့ ဆေးရုံအထိကို လမ်းတောင် လျှောက်လိုက်သေးတယ်။ သူတောင် ပြေးသေးတာ ကိုယ်က မိနစ် ၃၀ ကျော်ကျော်လေး လမ်းလျှောက်တာပေါ့။ 

သူ့စာတွေထဲမှာ သူရဲ့ စိတ်ဓါတ်ခွန်အားကို သူဘယ်လိုတည်ဆောက်ထားလဲဆိုတာပါ တွေ့ရတယ်။ သူ့ရဲ့ ဇွဲနဲ့သတ္တိကို မျှဝေခံစားရတယ်။ အခန်း (၃) နွေလည်ခေါင်က အေသင်သားများ ၂၆.၂ မိုင်ကို ပထမဆုံးပြေးဖူးခြင်း အပိုဒ်ကို ဖတ်တဲ့အချိန် သူ့ကို မလေးစားပဲကို မနေနိုင်ဘူး။ ပြိုင်ပွဲအချိန်မဟုတ်ပဲ ခရီးသွားဆောင်းပါးရေးဖို့ အေသင်ရောက်ချိန် သူတစ်ယောက်ထဲ ကမ္ဘာပထမဆုံး မာရသွန်လမ်းကို ပြေးခဲ့တယ်။ ဒေသခံတွေတောင် ပူလွန်းလို့ မလှုပ်မရှားနေတဲ့အချိန်မှာ သူဟာ အေသင်ရဲ့ အပူချိန်ကို ကြိုမသိပဲ ဒီပြေးဖို့ကိစ္စကို စီစဉ်မိပေမယ့်မယ် အပူအကြောင်းကို သိရှိလိုက်ချိန်ကျတော့လည်း သူနောက်ပြန်မလှည့်တော့ဘူး။ 

မာရသွန်အထိ ရောက်အောင် ကိုယ်ခန္တာမှာ ဆားတွေပွင့်တဲ့အထိ ပြေးခဲ့တယ်။ ဒီလိုစိတ်ဓါတ်ခွန်အားမျိုး ကိုယ်လည်းရချင်လိုက်တာလို့တောင် အတွေးပေါ်တယ်။ ကိုယ်ယုံကြည်တာကို ကိုယ်လုပ်ဖို့၊ ကိုယ်ပါရမီပါတာကို ဆက်ပြီး ကြံခိုင်လာအောင် ပြုစုပျိုးထောင်ဖို့ အသိဉာဏ်အလင်းတွေ ရလိုက်တယ်။ (တတ်ကျမ်းမဟုတ်ပါ)။ 

ဘာပဲဖြစ်ဖြစ် ဒီစာအုပ်ကို ၂၄နာရီအတွင်း ကိုယ်ဝါးစားသလိုဖတ်လိုက်တယ်။ (ဒီနေ့ရုံးအလုပ်လုပ်ပါတယ်။ ရုံးချိန်အတွင်း ခိုးမဖတ်ထားပါဘူး)။ လိုရမယ်ရဆိုပြီး အင်္ဂလိပ်version စာအုပ်ကို ဒေါင်းလုပ်ရှာဆွဲထားလိုက်သေးတယ်။ ဒါပေမယ့် ဒီနိုဗိုဘာသာပြန်ထားတာနဲ့တင် လုံလောက်ပါပြီ။ 

မူယာကာမိဟာ သီချင်းတွေကိုလည်း တော်တော်နားထောင်ပြီး သီချင်းတွေအကြောင်းကို စာအုပ်တိုင်းမှာ ထည့်ရေးတတ်တဲ့သူ။ ဒီစာအုပ်ကိုဖတ်ရင်း သူညွန်းတဲ့ သီချင်းတွေကိုပါ လိုက်ရှာနားထောင်ဖြစ်တယ်။ သူဖတ်တဲ့စာအုပ် သူဘာသာပြန်တဲ့စာအုပ် အကြောင်းပါထည့်ရေးသေးတယ်။ 

ဒီညတော့ ကိုယ်လိုက်ရှာဖြစ်တာ Bryan Adams ရဲ့ 18 till I die ဆိုတဲ့ သီချင်းနဲ့ F.Schott ရဲ့ The Great Gatsby ဆိုတဲ့ စာအုပ်။ 

နောက်ဆုံးပြောချင်တာကတော့ ဒီစာအုပ်ဟာကိုယ်ကြိုက်ပြီး ကိုယ့်ရဲ့ အပြေးသမားသူငယ်ချင်းလေးကို သတိရမိစေတဲ့ စာအုပ်လေးပေါ့။ 

မယ်ကျွိ

မနက် ၁ နာရီ ၁၁မိနစ်

၁၉ ရက် သြဂုတ် ၂၀၁၆