စာအုပ်အမည် _ မာနမီးလျှံ

ဘာသာပြန် _ တင်မောင်မြင့်

မူရင်းစာအုပ် _ BODY OF LOVE

မူရင်းစာရေးသူ _CHARLES KEATS

ထုတ်ဝေသည့်တိုက် _ အလင်းမြစ်စာပေ 

ထုတ်သည့်နှစ် _ဇန်နဝါရီလ ၊ ၂၀၁၆ (ဒုတိယအကြိမ်)

စာမျက်နှာ _ ၂၈၆

တန်ဘိုး _ ၅၀၀၀ ကျပ်

ပထမအကြိမ် ထုတ်တုန်းက ပန်းချီစံတိုး ရဲ့ မျက်​နှာဖုံး လေးနဲ့ အမှာစာ ကို သဘောကျ ခဲ့ရသလို ခု ဒုကြိမ်ထုတ် စာအုပ်ကလဲ ပန်းချီဇော်မောင် မျက်​နှာဖုံး နဲ့ art paper နဲ့ မိုဒီလျာနီ ပုံတွေ ပါလို့ နှစ်သက်မိပြန်တယ် ။

မောင်မတ် (ပါရီ )က ပန်​းချီဆရာ လောက ထဲမှာ ``မင်းသား ´´ လို့ အခေါ်ခံရ လောက်အောင် ရုပ်ဖြောင့်တဲ့ အီတလီ ပန်​းချီဆရာ မိုဒီလျာနီ ရဲ့ ဘဝ ဇာတ်ကြောင်း ကို ဖတ်ကြည့်တော့ ကြေကွဲစရာ ၊ ကြည်နူးစရာ တွေ နဲ့ ပန်​းချီဆရာ တွေရဲ့ ချစ်စရာ အမြင်ကတ်စရာ ကောင်းတဲ့ သောင်းကျန်းမှု တွေပါ သိလိုက်ရတယ် ။ ငယ်စဉ်ကတဲက အဆုတ် မကောင်းဘူး ဒါပေမဲ့ ကိုယ့် ကျန်​းမာ​ရေး လဲ ဂရုမစိုက်ဘူး။

အရက်ကို အလွန်​အကျွံ သောက်တတ် ပြီး သူ့ရဲ့မာန နဲ့ ဒေါသကြီးမှု ကြောင့် ငယ်ငယ်ရွယ်ရွယ် နဲ့ ကြွေလွင့်ခဲ့ရတဲ့  ပန်​းချီဆရာ စာရင်းထဲ ပါသွားတယ် ။ လူက ချောသလောက် မာနကလဲ ကြီးသေး ။ မိုဒီလျာနီ ရဲ့ မီးလျှံလို တောက်ပ တဲ့ မာန နဲ့ အဲဒီ မာန ကြောင့် သူ့ဘဝ ဟာ လောင်ကျွမ်းနေခဲ့သလို ပဲ ။ ပါရီ ရောက်စ မိုဒီ တစ်ယောက် ပရိသတ်​တွေ ကြားထဲ ဒန်တီ ရဲ့ မဟာကဗျာကြီး ကို ခံစားချက် အပြည့်နဲ့ အလွတ် ရွတ်ဆို တဲ့အခါတိုင်း ပရိတ်သတ် တွေ မှင်တက် စီးမျောသွားကြတာ အမြဲပါပဲ ။ ကဗျာချစ်တဲ့ ပန်​းချီဆရာ ပါ ။ 

ချောမောလှပ တဲ့ ပန်​းချီဆရာ မိုဒီ ဟာ တကယ် မြာစွန်တဲ့ ပုဂ္ဂိုလ်​ လဲ ဖြစ်နေတယ်။ ပထမအကြိမ် အီတလီ ကနေ ပြင်သစ် ကို လာတော့ အရက် မသောက်တတ်သေးတဲ့ မိုဒီလျာနီ ပါရီ ရောက်တော့ သူ့လို အင်ပရက်ရှင်းနစ် ပန်​းချီဆရာ တွေရဲ့ စရိုက်အတိုင်းပဲ အရက် နဲ့ ဆေး ကို သုံးတတ်သွားတယ် ။ အရက် အလွန်​အကျွံ သောက်ပြီး မူးလာရင် ပြဿ နာ ရှာတတ်ပေမယ့် လူတွေက သူ့ကို ချစ်မြဲ ချစ်ကြတယ် ။ မူးပြီး လမ်းပေါ်မှာ လဲနေရင် အိမ်ကို ပြန်ပို့ပေးကြတယ် ၊ ရဲစခန်း ရောက်သွားရင် လိုက်ထုတ်ပေးတယ် ၊ တကယ် ချစ်ဖို့ကောင်းတဲ့ မိုဒီ့ သူငယ်ချင်းတွေ ပဲ ။

မိုဒီလျာနီ ရဲ့ မူရင်း ဝါသနာ က ကျောက်ဆစ် ပန်းပုထုတာ ။ ပန်းပု ထုရာမှာ ကျောက်တုံးက ထွက်လာတဲ့ အမှုန်တွေကြောင့် သူ့ အဆုတ် ထိခိုက်ခဲ့တယ် ။ အဲဒါကြောင့် ပါရီ က ပန်းချီရပ်ကွက် ကို တက်လာပြီး ပန်းချီဆွဲဖို့ ဖြစ်လာတယ် ။ သူ့ ရင်ထဲက အစိုင်​အခဲ တွေကို ပန်းချီအတတ် နဲ့ ဖေါ်ထုတ် ပြသ ဖို့ ။ ဒါပေမဲ့ လဲ သူ့ ရဲ့ ရှေးဦးပိုင်း ပန်​းချီကား တွေက အခြားဆရာတွေ ရဲ့ သြဇာ လွှမ်းမိုးနေတဲ့ လက်ရာတွေပဲ ဖြစ်နေတယ် ။ ပုံပေါင်းများစွာ ဆွဲပြီးနောက်မှ သူ့ရဲ့ ကိုယ်ပိုင်ဟန် တစ်ခု ရသွားတယ် ။

ဒုတိယအကြိမ် အီတလီ က ပြန်လာပြီး နောက် အင်္ဂလိပ် ကဗျာဆရာမ လီယိုနိုရာ နဲ့ တွေ့ပြီး ပန်းချီကား အ​မြောက်​အများ ရေးဖြစ်ခဲ့တယ် ။ သိပ်မကြာခင်ပဲ သူ့ရဲ့ မာနစိတ် ကြောင့် လီယိုနိုရာ နဲ့ လမ်းခွဲ ခဲ့ပြီး လမ်းဘေး ကို ရောက်ရ ပြန်ရော ။ ပါရီ ကို စွဲလမ်းလွန်းတဲ့ မိုဒီလျာနီ ဟာ ဘယ်လောက်ပဲ ဒုက္ခရောက်ရောက် ပါရီ ကို မစွန့်ခွာချင်ဘူး ။ သေရင်တောင် ပါရီ မှာပဲ သေချင်တယ် ပြောခဲ့သူ ပါ ။

လောက ကို ဒေါသ နဲ့ အရွဲ့တိုက်ချင်စိတ် က ဖျက်စီးတိုက်ခိုက် နေလို့ သူ့ဘဝ ဟာ သာသာယာယာ ရှိခဲ့တယ် လို့ ပြောမရဘူး ။  (ပန်းချီဆွဲနေချိန် ကလွဲလို့ ) ကံအလှည့် အပြောင်း တစ်ကွေ့မှာ ပါရီ ကို ရောက်နေတဲ့ ပိုလန် ကဗျာဆရာ ဇဘော်ရိုစကီ က မိုဒီလျာနီ ရဲ့ ကိုယ်စားလှယ် အဖြစ်နဲ့ သူ့ ပန်းချီကားတွေ ရောင်းပေးတယ် ၊ သူ့ ရဲ့ နေမှု ထိုင်မှု ၊ ကျန်​းမာ​ရေး နဲ့ ပန်းချီကား တွေ ဆွဲဖြစ်အောင် အလုံးစုံ ဂရုစိုက်ခဲ့တယ် ။

ဂျင်းအေဘူတန် ဆိုတဲ့ ပန်းချီကျောင်းသူမလေး နဲ့ မိုဒီ အိမ်ထောင်ကျ တယ် ။ တကယ့်ကို သူ့ အနွံအတာ ခံတဲ့ ပါရမီဖြည့်ဖက် တစ်ယောက် ရသွားခဲ့လို့ မိုဒီလျာနီ ရဲ့ ဘဝ တည်ငြိမ်မှု ရသွားခဲ့တယ် ။ ဇဘော်ရိုစကီ နဲ့ ဂျင်း တို့ နှစ်ယောက် နဲ့ သာ မိုဒီလျာနီ နဲ့ မဆုံဖြစ်ကြရင် မိုဒီ တစ်ယောက် ဒီထက် အကြွေစောသွား နိုင်တယ်လို့ စာအုပ် ဖတ်အပြီး တွေးမိနေတယ် ။

ပြင်းထန်တဲ့ ရမ္မက်​ ၊ ကြီးကျယ်တဲ့ မာန၊ ပူလောင်တဲ့ ဒေါသ နဲ့ ၊ ထုနဲ့ ထည်နဲ့ ရှိနေတဲ့ ခံစားချက်တွေ ကို ကျွမ်းကျင်တဲ့ ပန်​းချီ ပညာနဲ့ ဖေါ်ထုတ်ပြသ ခဲ့တဲ့ မိုဒီလျာနီ ရဲ့ ပန်းချီကားတွေက သူ ရှင်သန်နေစဉ် က ရရှိခဲ့တဲ့ အောင်မြင်မှု နဲ့ မနှိုင်းယှဉ်သာအောင်  ခုအချိန်မှာ တန်ဘိုးထားစရာ ဖြစ်လို့နေပါပြီ ။ 

( စကားချပ် ။ ။ ပီကာဆို ရဲ့ ပန်​းချီကား ထက်တောင် မိုဒီလျာနီ ရဲ့ ပန်​းချီကား တွေ တန်ဘိုးမြင့်သွားတဲ့ ပန်းချီလေလံပွဲ တစ်ခု ကိုတောင် ကြည့်ဖူးတယ် ၂၀၁၆ က ။ အဲဒီ.စံချိန်တင် လေလံအောင်တဲ့ပုံ က စာမျက်နှာ နှစ်ခွနဲ့ ဒီစာအုပ် ထဲမှာ ပါတယ်)

ခုချိန်ထိ ဖတ်ဖူးခဲ့ သမျှ ရိုးရာကို တော်လှန်တဲ့ အင်ပရက်ရှင်းနစ် ပန်းချီဆရာ အများစုရဲ့ ဘဝတွေဟာ ပျော်စရာ ဇာတ်လမ်းတွေ နည်းပါး နေပါတယ် ။ ခက်ခဲ ပင်ပန်းဆင်းရဲ တဲ့ ဘဝတွေ မှာ သူတို့ နေထိုင်ကြရပြီး သူတို့ရဲ့ ပါရမီ မီးတောက်တွေကို ကင်းဗတ်စ တွေ ပေါ်မှာ ဆေးရောင်တွေ နဲ့ သွန်ချ ရေးဆွဲပြသ ခဲ့တဲ့ ထူးချွန်တဲ့ လူပေလူတွေ တွေရဲ့ ဘဝတွေ ကိုပဲ မြင်နေရပါတယ် ။ အဲဒီ သူတို့ ဘဝ တွေကို ချစ်ရ ၊ အားကျရ ၊ စိတ်ပျက်ရ ၊သနားရတာနဲ့ပဲ သူတို့ရဲ့ အတ္ထုပ္ပတ္တိ တွေဟာ ရင်ထဲမှာ နေရာတစ်ခု ရ နေခဲ့တယ် ။ 

(ဒီ အကြိမ်ထုတ် စာအုပ် ထဲမှာ အတ်ပေပါ နဲ့ မိုဒီလျာနီ ရေးဆွဲခဲ့တဲ့ ပုုံတွေ မျက်နှာအပြည့် ၂၀ ပုံ ပါပါတယ်)

Ko Kyaw Lwin (4:40pm,12.8.2017)