စာအုပ်အမည် - No One Writes to the colonel 

စာရေးသူ - Gabriel Garcia Marquez

ဘာသာပြန်စာအုပ် အမည် - ဗိုလ်မှူးကြီးထံ စာရေးမည့်သူ မရှိပါနှင့် ဝတ္တုတိုများ

ဘာသာပြန် - #သင့်လူ

ထုတ်ဝေသူ - #ကံကော်ဝတ်ရည်

ပထမအကြိမ်၊၂၀၁၄ ခုနှစ်။ 

တန်ဖိုး - ၁၇၀၀ ကျပ်

စာမျက်နှာ - ၁၄၉  မျက်နှာ

Marquez ရဲ့ စာတွေဟာ မြန်မာပရိတ်သတ်နဲ့ နည်းနည်းစိမ်းတယ်။ သူရဲ့စာရေးသားပုံ၊ သူအခြေခံရေးသားထားတဲ့ ခေတ်အနေအထား၊ ရေမြေအနေအထားဟာ ဖတ်နေကျ နောက်ခံအနေအထားမဟုတ်တာကြောင့် သူ့စာအုပ်တွေဖတ်ရတာဟာ ကိုယ့်အတွက် နည်းနည်းခက်တယ်။ ဥပမာအနေနဲ့ မိစ  ္ဆာမြူးချိန် (In Evil Hour) ကို ကိုယ်အခုထိ ပြီးအောင် မဖတ်နိုင်သေး။ သို့ပေမယ့် ဆရာသင့်လူပဲ ဘာသာပြန်တဲ့ ကပ်တွင်းက ချစ်ခြင်း (Love in the Time of Cholera) ကိုတော့ ကိုယ်သိပ်ကြိုက်မိတယ်။ ခုဗိုလ်မှူးကြီးထံ စာရေးမည့်သူ မရှိပါနှင့် ဝတ္တုတိုများကိုတော့ ထွက်နေတာ ကြာပြီဖြစ်ပေမယ့် မိစ္ဆာမြူးချိန်ကို ပထမဆုံးစကိုင်မိပြီး ကိုလံဘီယာရဲ့ စိမ်းလှတဲ့ ပတ်ဝင်းကျင်ကို ရောက်သွားတာကြောင့် ဒီစာအုပ်ကို မဖတ်ပဲ ရှောင်နေမိတာ။ ခုတော့ ကိုယ်နဲ့ တူတူ ပါလာတဲ့ စာအုပ်က စုစုပေါင်းမှ ၁၀အုပ်မပြည့်။ ဖတ်လို့ မလောက်ဖို့Ebook ပါ ဖတ်နေရတာမို့ ခုစာအုပ်ပါးပါးလေးကိုလည်း ကိုလံဘီယာ မြေဘယ်လောက်စိမ်းစိမ်း ဖတ်မိတော့ပါပဲ။ 

ဖတ်မိတယ်ဆိုရင်ပဲ သောကြာနေ့တိုင်းမှာ စာမျှော်ရတဲ့ ဗိုလ်မှူးကြီးကို သနားဂရုဏာသက်မိပါရဲ့။ စစ်တွင်းကာလမှာ ကြိုးစားပန်းစား စစ်တိုက်ပေးခဲ့ပြီး ပင်စင်ခံစားထိုက်ပါတယ်ဆို့ အစိုးရမင်းများကို စာတင်ထား နှစ်တွေများစွာ ကြာခဲ့ပြီ။ ဗိုလ်မှူးကြီးက သိက္ခာအကျမခံချင်တော့ တစ်ခြား ဘာအလုပ်မှလည်း မလုပ်ပါဘူးတဲ့။ မိန်းမက အိမ်ထောင်စရိတ်ဖူလုံအောင် သူ့ရဲ့ လက်မှုပညာလေးနဲ့ ရပ်တည်ပါသော်လည်း ကျန်းမာရေး မကောင်းတာကြောင့် နောက်ဆုံး ကျန်တဲ့ ရှေးဟောင်းနာရီကြီးကို ရောင်းစားဖို့ ကြိုးစားသော်လည်း ဝယ်မယ့်သူ မရှိ။ 

အစိုးရဆီက ပင်စင်ခံစားခွင့်အတွက် ဦးတိုက်လျှောက်ပေးမယ့် ရှေ့နေကလည်း အားကိုးမရ။ အားကိုးမရဆိုတာက ကြိုးနီစနစ်ကြောင့် အစိုးရယန္တရားဟာ နှေးကွေးလှသကို။ သူတို့တင်ထားတဲ့ စာဟာ ဘယ်သူ့စားပွဲက အမေ့ခံနေရာမှာ ချောင်ထိုးခံ၊ ဖုန်အလိမ်းလိမ်းတတ်နေမလဲဆိုတာ ဘုရားသခင်မှပဲ သိနိုင်တော့မယ်။ ဒီလို ခက်ခဲပေမယ့်လည်း ဗိုလ်မှူးကြီးဟာ သောကြာနေ့ဆိုရင် သူ့ဘဝ ပြောင်းလဲတော့မယ်လို့ပဲ အမြဲမျှော်လင့်လေ့ရှိတယ်။ 

လင်မယားနှစ်ယောက်စာတောင် စားဖို့ မလောက်ရတဲ့အထဲ အိမ်မှာက မွေးထားတဲ့ ကြက်တစ်ယောက်ကိုပါ ရှာကျွေးနေရပြန်ရဲ့။ အဲဒီကြက်က နယ်နယ်ရရ ကြက်မဟုတ်ဘူး တစ်နယ်လုံးမှာ အကောင်းဆုံး တိုက်ကြက်။ သူတို့နှစ်ယောက်ရဲ့ သား မသေခင်က ထားခဲ့တဲ့ ကြက်ပေါ့။ ကြက်ပွဲဖြစ်ဖို့ နှစ်လအလို၊ တစ်နယ်လုံးဟာ ဒီကြက်ဘက်ကသာ လောင်းကြေးထပ်ကြမှာပဲ။ 

ဒီကြက်ကို ဗိုလ်မှူကြီးတို့ ကျွေးမထားနိုင်ဘူးဆိုလို့ သူတို့နယ်က ကာလသားတစ်ချို့က ကြက်အတွက် ပဲလေး၊ ဆန်လေး ထောက်ပံ့ကြတယ်။ မတတ်နိုင်တဲ့အဆုံး ကြက်စားဖို့ ပို့ထားတဲ့ ပဲတွေ ဆန်တွေကို လင်မယားနှစ်ယောက်သား ပြုတ်စားကြရသတဲ့။ တစ်ရက်မှာတော့ ဒီကြက်ကို ဝယ်လိုပါတယ်လို့သူဌေးတစ်ယောက်ကပြော။ မိန်းမက ရောင်းဖို့ပြော။ ဗိုလ်မှူးကြီးက မရောင်းချင်။ ရောင်းကို ရောင်းရမယ်လို့ အတင်းအကျပ်ဖြစ်လာတော့ ဗိုလ်မှူးကြီးခင်မျာ သူဌေးဆီကို မျက်နှာအောက်ကျခံပြီးသွား။ ပေးမယ်ပြောထားတဲ့ စျေးထက် အများကြီး လျှော့ပေးလို့ ပြဿနာတတ်။ 

ဂုဏ်သိက္ခာကြောင့် အစာအငတ်ခံနေရတဲ့ ဗိုလ်မှူးကြီး၊ ရင်ကျပ်ပန်းနာကြောင့် သေအံမူးမူးဖြစ်လိုက် ပြန်ကောင်းလာလိုက် ဖြစ်နေတဲ့ ဗိုလ်မှူးကြီးကတော်၊ ပြိုင်စံရှား တိုက်ကြက်တစ်ကောင်၊ ရောက်လာမယ်လို့ပြောထားတဲ့ စာတစ်စောင်… 

စာမျက်နှာ ၁၄၉ မျက်နှာရှိတဲ့ ဒီစာအုပ်မှာ ဒီဝတ္တုက စာမျက်နှာ ၉၈ မျက်နှာအထိ နေရာယူလို့ထားတယ်။ 

ကျန်ဝတ္တုတိုများကတော့ တကယ့်ဝတ္တုတိုတွေပါပဲ။ 

အင်္ဂါနေ့လည် တစ်မှေးအိပ်ချိန်

ပူပြင်းလှတဲ့ ရာသီဥတုကြောင့် နေ့ခင်းနေ့လည် ဘယ်သူမှ အပြင်မထွက်ဘူး။ တစ်ရေးတစ်မောအိပ်လေ့ရှိကြတယ်။ ဒါပေမယ့် အဲဒီနေရာကို ရောက်လာတဲ့ သားအမိကတော့ အဲဒီ အရေပျော်မတတ်ပူနေတဲ့ အပူကြားထဲမှာ ထီးမပါပဲ လမ်းလျှောက်လို့လာတယ်။ အကြောင်းရင်းကတော့ ကလေးလေးရဲ့ အစ်ကို၊ အမေကြီးရဲ့ သားကို သူခိုးလို့ စွတ်စွဲပြီး အဲဒီရပ်ရွာမှာ သတ်ပစ်ခံရတယ်။ အဲဒီအသတ်ခံရတဲ့ ကောင်လေးဟာ လူလိမ္မာလေးပါလို့အမေကြီးက အခိုင်အမာဆိုလို့… ဘုန်းကြီးဆီ သချိုင်းသော့ထောင်းပြီး သူသားဆီကို လမ်းလျှောက်ထွက်ခွါသွားလေရဲ့… 

နေတွေက ကျဲကျဲတောက်ပူလို့… 

ကမ်းတင် ရေမျော လူခံ့ချော

လူသေကောင်တစ်ကောင် ရွာကမ်းခြေမှာ လာတင်တာက စလို့ ဇာတ်လမ်းက စတာပဲ။ လူသေက ရိုးရိုးလူသေတော့မဟုတ်ဘူး။ အရပ်မြင့်မြင့်၊ ကိုယ်ခန္တာလှလှ၊ မျက်နှာလှလှ လူသေ။ လူသေကို သဂြိုလ်ဖို့ဘယ်တုန်းကမှ ဒီရွာလေးမှာ ရှည်ရှည်ဝေးဝေး စဉ်းစားလေ့မရှိဘူး။ တောင်စောင်းကနေ ပင်လယ်ထဲ ပစ်ချလိုက်တာပဲ။ ပင်လယ်က သူ့တာဝန် သူယူသွားတာပဲ။ ဒီတစ်ခါတော့ မတူကွဲပြားတယ်။ ပင်လယ်က ရွာဆီကို အလောင်းတစ်လောင်း ပြန်ပစ်ချသွားတာ။ ဒီအလောင်းကြောင့် ရွာလေးဟာ ယောက်ယက်ခပ်လို့။ နောင်နှစ်ပေါင်းများစွာ ကြာတဲ့အခါမှာ ခြောက်သယောင်းနေတဲ့ ရွာလေးဟာ အရမ်းလှတဲ့ ရွာလေးဖြစ်သွားတာဟာလည်း အဲဒီ အလောင်းကောင်ကြောင့်ပါတဲ့။ 

ကျန်သုံးပုဒ်ကတော့ 

တောင်ပံကျိုးနှင့် နတ်ဆိုးဗိုလ်

တစ္ဆေသဘောင်္၏ နောက်ဆုံး ခရီးစဉ်

ထိုတစ်နေ့ တို့ဖြစ်တယ်။ ဒါတွေပါ ထည့်ပြောရရင် စာအုပ်တစ်အုပ်လုံး ကုန်သွားနိုင်လို့ မပြောတော့ဘူးနော်။ 

#မယ်ကျွိ

ည ၁၂နာရီ ၂ မိနစ်

သြဂုတ်လ ၂၆ရက် ၂၀၁၇။