Book Image

လေရဟတ်နီ

တင်မောင်မြင့်

စာအုပ်အမည် - လေရဟတ်နီ 

ဘာသာပြန်သူ - တင်မောင်မြင့်

မူရင်းစာအုပ် - MOULIN ROUGE

မူရင်း စာရေးသူ - Pierre La Mure

တန်ဖိုး -၂၀၀၀ ကျပ်

ထုတ်ဝေသူ - စစ်သည်တော်စာပေ 

ပထမအကြိမ် ၂၀၀၄ ခုနှစ် ဒီဇင်ဘာလ

စာမျက်နှာ - ၄၄၈




ဒီစာအုပ်ကို ပြင်သစ်စာရေးဆရာ Pierre La Mure (15 June 1909 – 28 Decemer 1976) က ၁၉ ၅၀ မှာ ထုတ်ဝေခဲ့တာ ဖြစ်တယ်။ ပြင်သစ်ပန်းချီဆရာ Henri de Toulouse-Lautrec ရဲ့ ဘဝဇာတ်ကြောင်းကို ပြန်လည်ရေးသားထားတဲ့ စာအုပ်ဖြစ်တယ်။ 


ဟန်နရီကို ၂၄ ရက် နိုဝင်ဘာ ၁၉ ၆၈ ခုမှာ မွေးဖွားခဲ့ပြီး တူလုစ်မြိုစားရဲ့ သားအနေနဲ့ မင်းညီမင်းသားလို ကြီးပြင်းခဲ့တာဖြစ်တယ်။ သူမိဘတွေက မောင်နှမဝမ်းကွဲတွေဖြစ်တာမို့ ဟန်နရီဟာ မျိုးရိုးဗီဇနဲ့ ပတ်သက်တဲ့ ရောဂါတစ်ခုကို ခံစားခဲ့ရပြီး အသက်၁၄နှစ်မှာ ခြေထောက်တစ်ဘက် ကျိုးရာက အသက် ၁၅ နှစ်မှာ ချော်လဲကျပြီး ကျန်တဲ့ ခြေထောက်တစ်ဘက်ပါ ကျိုးခဲ့ရတယ်။ ငယ်ကတည်းက အမေနဲ့ပဲ နေထိုင်ခဲ့ပြီး အဖေရဲ့ စောင့်ရှောက်မှုနဲ့ ဝေးခဲ့သူ ဖြစ်တယ်။ နေမကောင်း မဖြစ်ခင်ကတော့ အဖေမြို့စားကြီးနဲ့ ရံဖန်ရံခါ အမဲတူတူလိုက်ခွင့်ရပါမယ့် နေမကောင်းဖြစ်၊ နေရာအနံ့က ရေပူစမ်းတွေမှာ ရေစိမ် ဆေးကုသမှုခံယူရင်း အချိန်တွေကုန်သွားတယ်။ ပန်းချီရေးတာကိုတော့ ငယ်ငယ်က မြင်းပွဲမှာ တွေ့ခဲ့တဲ့ ပန်းချီဆရာကြီးက ချီးကျူးတာ ခံခဲ့ရပြီး နေပြန်ကောင်းလာတဲ့ နောက်ပိုင်းမှာ ပန်းချီပညာသင်ဖို့ သူရွေးချယ်ခဲ့တယ်။


ဟန်နရီဟာ နေပြန်ကောင်းလာပေမယ့် သူရဲ့ ငယ်ရွယ်စဉ်က ချစ်စဖွယ်လှပတဲ့ မျက်နှာကို ဆုံးရှုံးလိုက်ရပြီး ခြေထောက်၂ချောင်းရဲ့ ကြီးထွားမှုဟာလည်း ရပ်တန့်သွားတာမို့ အသိုင်းအဝိုင်းထဲမှာ ရုပ်ဆိုးသူ လူသားတစ်ယောက် အဖြစ်နဲ့ နေထိုင်ခဲ့ရတယ်။ မောင်မတ်ရပ်ကွက်မှာ ပန်းချီပညာကို သင်ယူနေပြီး နောက်ပိုင်းတော့ သူ့ရဲ့ အကျည်းတန်မှုကြောင့် လူတွေက သူ့ကို နှိမ်ချမှုတွေကနေ ထွက်ပြေးလွတ်မြောက်နိုင်ဖို့ သူ့အမေရဲ့ ရဲတိုက်ကို စွန့်ခွါပြီး ပန်းချီဆရာတွေနေထိုင်တဲ့ မောင်မတ်ရပ်ကွက်ထဲကို ပြောင်းပြီးနေလိုက်တယ်။ သူကျင်လည်ရာက ပြည့်တန်ဆာအိမ်တွေ၊ အရက်ဆိုင်တွေနဲ့ ပန်းချီခန်းမတွေပဲ ဖြစ်လာတယ်။


အညိုရောင်၊ မီးခိုးရောင်စတဲ့ အရောင်းမှိုင်းမှိုင်းတွေကိုသာ လက်ခံထားတဲ့ ပန်းချီလောကမှာ သူက သဘာဝအရောင်တွေကို စတင်အသုံးပြုတဲ့ Post-impressionist ခေတ်ရဲ့ ကြော်ကြားတဲ့ ပန်းချီဆရာတစ်ယောက် ဖြစ်လာတယ်။ အနီ၊ အဝါ၊ ခရမ်း၊ အပြာ၊ အစိမ်းတွေကို သုံးပြီး ကချေသည်ပုံတွေ၊ ပြည့်တန်ဆာပုံတွေ၊ အိပ်ယာပေါ်ကပုံတွေကို ရေးတာမို့ သူ့အဖေမြို့စားကြီးက အစ သူကကားတွေဟာ ညစ်ညမ်းတဲ့ ကားတွေလို့ အမည်တပ်ပြီး သူ့ကို အပေါစားပန်းချီဆရာလို့သက်မှတ်တာ ခံခဲ့ပေမယ့် လေရဟတ်နီ ကပွဲရုံအတွက် သူရေးပေးတဲ့ ပိုစတာကြောင့် လေရဟတ်နီ ကပွဲရုံနဲ့ တူတူ ဟင်နရီရဲ့ ပန်းချီကားတွေဟာလည်း နာမည်ကြီးလာတယ်။


သူ့နဲ့သူ့ရဲ့ ပန်းချီတွေဟာ အောင်မြင်နေပေမယ့် ဟန်နရီ ဘယ်တော့ မှ မအောင်မြင်တာကတော့ အချစ်ရေးပဲ ဖြစ်တယ်။ ပထမဆုံး ဟန်နရီ စွဲလမ်းမိတဲ့ မိန်းခလေးက လမ်းဘေးက လိုင်စင်မဲ့ ပြည့်တန်ဆာမလေး။ ကောင်မလေးက ဟန်နရီ အခန်းမှာ လာနေထိုင်တယ်။ လာနေတယ်ဆိုပေမယ့် သူ့ကို ချစ်လို့မဟုတ်ဘူး ဟန်နရီက တစ်ညအိပ်ရင် ဘယ်လောက် တစ်ရက်လုံးနေရင် ဘယ်လောက်ဆိုပြီး ပိုက်ဆံတွေပေးထားလို့ ဟန်နရီနဲ့ လာနေတာ။ နောက်ဆုံးမှာတော့ ဟန်နရီက ကောင်မလေးအပေါ် လိင်တပ်မက်မှုကြောင့်ပဲ စွဲလမ်းတာဖြစ်တယ်ဆိုတာ သိရှိပြီး သူ့ရဲ့ လွတ်မြောက်မှုဆီကို ပြန်လည်သွားနိုင်ခဲ့တယ်။ ကောင်မလေးကြောင့် သူ့ရဲ့ အထီးကျန်ဝေဒနာတွေ သက်သာခဲ့ပေမယ့် နောက်ဆုံးတော့ ကောင်မလေးဟာ သူဆီက ငွေကြေးသာ လိုချင်တယ်ဆိုတာကို သူတို့တွဲနေတဲ့ တစ်လျှောက်လုံး ဟန်နရီသိရှိခဲ့တယ်။


သူ့ အသည်းတွေ ကွဲကုန်တာက ဒုတိယမိန်းခလေးနဲ့မှ။ ဒုတိယ မိန်းခလေးအမည်က မိုင်ရီယမ်။ မိန်းမချောလေးမို့ ဟန်နရီက အရမ်းသဘောကျခဲ့တယ်။ ဒါပေမယ့် သူငယ်ချင်းလိုပဲ ခင်မယ်ဆိုတဲ့ ကတိကြောင့် သူငယ်ချင်းလိုသာနေခဲ့ပေမယ့် တစ်ရက်မှာတော့ သူတို့ ၂ယောက် စည်းတွေကျိုးခဲ့တယ်။ မိုင်ရီယမ်က သူကို ချစ်ချင်လည်း ချစ်လိမ့်မယ်။ ဟန်နရီချမ်းသာအောင်မြင်တာကို သဘောကျပေမယ့် သူလည်း ရုပ်ဆိုးတဲ့ ဟန်နရီကို ထားသွားပြန်တာပဲ။


ဟန်နရီဟာ ပန်းချီနဲ့ အရက်ကိုပဲ အဖော်လုပ်နေလာရာက သူ့ ပန်းချီတွေဟာလည်း ပိုပိုပြီး နာမည်ကြီးလာတယ်။ အင်တာဗျူးတွေ၊ပြပွဲတွေကို ဖိတ်ကြားခံရတယ်။ ဒါပေမယ့် သူဟာ အရက်ရဲ့ ကျေးကျွန်ဖြစ်လာပြီး စိတ်ဖောက်ပြန်လာတယ်။ စိတ်ရောဂါကုသ ခံနေရပေမယ့် သူလက်ရာတွေဟာ ပိုပိုလို့ပဲ ကောင်းလာ… သူ့ကို ဆုတွေ ချီးမြင့်ဖို့ ဖိတ်ကြားစာတွေ လက်ခံရရှိ…. သူရဲ့ နောက်ဆုံး နေ့ရက်တွေဟာ သူ့အမေရဲ့ အိမ်မှာ.. အဲဒီအချိန်မှာ သူ့ရဲ့ပန်းချီကားတွေကို လုဒ်ပြတိုက်မှာ ပြသဖို့ ရွေးချယ်ခံလိုက်ရတယ်။


လေရဟတ်နီစာအုပ်ကို page ထဲမှာ Shoon Yu Pa ဆိုတဲ့ အကောင့်ပိုင်ရှင်က review ရေးပေးဖို့ တောင်းဆိုလို့ လိုက်ရှာဖတ်ထားတာပါ။ ငယ်ငယ်က ဖတ်ဖူးပေမယ့် မမှတ်မိတော့တာမို့ ပြန်ဖတ်ဖြစ်တယ်။ ဇာတ်ကြောင်းသွားပုံနဲ့ ဘာသာပြန် အရေးအသားတွေ ကောင်းမွန်လှတာကြောင့် ခဏလေးနဲ့ ဖတ်လို့ ပြီးသွားတယ်။ ဖတ်လို့ ကောင်းတဲ့ စာအုပ်ကို ပြန်ဖတ်ရလို့ မShoon Yu Pa ကို ကျေးဇူးတင်ပါတယ်။


ဒီစာအုပ်ကိုတော့ စာအုပ်ရှာမရလို့ Ebook နဲ့ပဲ ဖတ်လိုက်ရတယ်။ ကိုဟေမာန်ဆီမှာတော့ စာအုပ်ရှိတယ်။


မယ်ကျွိ

နိုဝင်ဘာ ၆ ရက် ၂၀၁၆

စာအုပ်အဖုံးပုံ ကိုဟေမာန်


Publisher Name: စစ်သည်တော်စာပေ


Related Books