စာအုပ်အမည်_မဟူရာ

ဘာသာပြန် _ တင်မောင်မြင့်

မူရင်းစာအုပ် _ Black Beauty

မူရင်းစာရေးသူ _ Anna Sewell 

ထုတ်သည့်တိုက် _ စာနဒီ စာအုပ်တိုက်

ထုတ်သည့်နှစ် _ သြဂုတ်လ ၊ ၂၀၁၇ (ပထမအကြိမ်)

မျက်နှာဖုံးပန်းချီ _ လင်းဝဏ္ဏ 

စာမျက်နှာ _ ၁၉၂

တန်ဘိုး _ ၂၀၀၀

စာဖတ်ချင်စိတ် နဲနဲ လျော့နေလို့ 

စာအုပ် ပါးပါးလေး  တစ်အုပ် လောက် ဖတ်ဖို့ စဉ်းစား နေတာ ။ ဒါနဲ့  ``မဟူရာ ´´ ဆိုတဲ့ စာအုပ်လေး ကို ကောက်ကိုင်လိုက် ကြည့်လိုက်တော့ "ကလေးများ အတွက် ကမ္ဘာ့ ဂန္ထဝင် မိတ်ဆက် " ရေးထားတာ တွေ့ရတယ် ။ ပေါ့ပေါ့ပါးပါး လေးပဲ ဆိုပြီး  အမှာစာ ဖတ်လိုက်တော့  "စာရေးဆရာမAnna Sewell  ကို အင်္ဂလန်ပြည် ၊ ယားမောက်မြို့ တွင် ၁၈၂၀ ပြည့်နှစ်က မွေးဖွားခဲ့တယ် ။ အန်နာ ကလေးဘဝ က ခြေမျက်စိ ခေါက်လဲပြီး လမ်းကောင်းကောင်း မလျှောက်နိုင်ပဲ ဒုက္ခိတ တစ်ပိုင်း ဖြစ်ခဲ့ရတယ်။လမ်းဝေးဝေး မလှျှောက်နိုင်လို့ ကလေးဘဝ ထဲက မြင်းတွေ ကိုပဲ  အားကိုးခဲ့ရတယ် ။ ဒါနဲ့ပဲ မြင်းတွေ အကြောင်း သူ သိလာခဲ့တယ် ။  မြင်းတွေက သူ့ ကျေးဇူးရှင် ဖြစ်လာပါတယ်။  မြင်းတွေက အသိဉာဏ် မြင့်မားကြပြီး အကြမ်းပတမ်း အလွန်ခံနိုင်တဲ့ တိရစ္ဆာန် တွေ ဖြစ်ကြောင်း အင်နာ သိလိုက်ရတယ် ။ ဒါပေမဲ့  ပတ်ဝန်းကျင် က လူတွေကတော့ မြင်းတွေ အပေါ် ရက်စက်ကြတယ် ။ အသေအလဲ ခိုင်း ၊ ရိုက်နှက်ပြီး  မဝရေစာ ပဲ ကြွေးတဲ့ လူမဆန်တဲ့ မြင်းထိန်းတွေ ကို တွေ့ ခဲ့ရတဲ့ အင်နာ တစ်ယောက် ဒီ ``မဟူရာ ´´ ဆိုတဲ့ မြင်းဇာတ်လမ်း ရေးဖို့ ကုန်ကြမ်း ရလာတယ် "

ဆိုပြီး ရေးထားတော့  အဲဒီမှာ စိတ်ဝင်စား သွားပြီး တစ်ခါတည်း ထိုင်ဖတ်မိလိုက်တယ် ။ 

ဆရာသော်တာဆွေ ရေးတဲ့ မြင်းလှည်းမောင်းတဲ့ အကြောင်းတွေ ထဲမှာ သူ့ လက်ထဲကို ရောက်လာတဲ့ မြင်း တစ်ကောင်းချင်းစီ အကြောင်း ပြောသလို မဟူရာ ကလဲ သူ ရောက်သွားတဲ့ ပိုင်ရှင်တွေ ရဲ့ စရိုက်သဘာဝ တွေ ၊ အဆင်ပြေတဲ့ ဘဝ ရောက်လိုက် ဆိုးတဲ့ ဘဝ ရောက်သွားလိုက် နဲ့ သူ့ ဘဝ ကို ဇာတ်စုံခင်းပြနေတာ ဟာ တကယ့် မြင်းတစ်ကောင် က ကိုယ့် ကို ရင်ဖွင့် ပြောပြနေသလို ခံစားမိပါတယ် ။ 

မြင်းလှ မြင်းချောလေး မဟူရာ က မွေးကတဲက သူ့ အမေ သွန်သင်မှု ကြောင့်ရယ်  ကြင်နာတတ်တဲ့ သူ့သခင် နဲ့ မြင်းထိန်း တို့ရယ် ကြောင့် သဘောကောင်းတဲ့ မြင်းတစ်ကောင် ဖြစ်လာပါတယ် ။ မြင်းတွေရဲ့ ထုံးစံ အတိုင်း သူ့ ရဲ့ ပိုင်ရှင် တစ်ယောက်ပြီး တစ်ယောက် ပြောင်းခဲ့ရတယ် ။ပိုင်ရှင်သစ် တစ်ယောက်ထံ  ရောက်ရင် နာမည် အသစ် နဲ့ မဟူရာ အတွက် အတွေ့အကြုံ သစ်တွေ ရတယ် ။ပိုင်ရှင်ကောင်း နဲ့ ကြုံတွေ့ ချိန် သူ့ဘဝ က အဆင်ပြေ ချောမွေ့ ပေမဲ့ ပိုင်ရှင်ဆိုး ဒါမှ မဟုတ် သူ့ပိုင်ရှင်ရဲ့ မြင်းထိန်းဆိုး တွေ နဲ့ တွေ့ရတဲ့ အခါ မဟူရာ ရဲ့ ကျန်းမာရေး ချို့ယွင်းတဲ့ အထိ ဖြစ်ရတယ် ။ သူ့ရဲ့ ပိုင်ရှင် ဘယ်လောက်ဆိုးဆိုး သခင် ကို ဘယ်တော့မှ ဒုက္ခ ပြန်ပေးလေ့ မရှိဘူး ။ 

ပထမ ပိုင်း သူ့အဖြစ်က အိမ်ကြီးရှင်တွေ ရဲ့ ကိုယ်ပိုင်လှည်း ကို ဆွဲ ရတယ် နောက်ပိုင်းမှာ မြင်းလှည်းသမား တွေဆီ ရောက်သွားတယ် ။ ဒီခေတ် အခေါ်မြင်းလှည်း တက္ကစီ ပေါ့ ။ 

 မြင်းတွေကို ချစ်တဲ့ ဂျင်မီဘာကာ နဲ့ တွေ့တော့ မှ မဟူရာ ရဲ့ ဘဝ သာသာယာယာ ဖြစ်ရတယ် ။ ဂျင်မီ နဲ့ မဟူရာ တို့ လန်ဒန်မှာ မြင်းလှည်းဆွဲ ရင်း ကြုံတွေ့တာတွေ ရေးထားတာ ``ဘဝထိုထို ´´ စာအုပ် ထဲက ဆရာသော်တာဆွေ ရေးတဲ့ စမ်းချောင်းက မြင်းလှည်းသမား တွေ အကြောင်း သတိရ ချင်စရာ ဖြစ်နေပါတယ် ။ 

ဂျင်မီဘာကာ ဆီမှာ သာယာ ချမ်းမြေ့တဲ့ လှည်းဆွဲမြင်း ဘဝ အဆုံးသတ် ပြီ ထင်ပေမဲ့ ဂျင်မီ တစ်ယောက် အပြင်းဖျားပြီး နောက် သူပိုင် မြင်းတွေ ၊ လှည်းတွေ ရောင်းပြီး အလုပ် ပြောင်းသွားတော့ ဒဏ်ရာ ဒဏ်ချက် တွေနဲ့  မဟူရာ ရဲ့ ဘဝ မြင်းအို ၊ မြင်းနာ ၊ မြင်းကျိုး.တွေ ရောင်းတဲ့ မြင်ဈေးပွဲ ရောက်သွားတယ် ။ 

နောက်ဆုံးမှာတော့ မဟူရာ ဘာတွေ ဆက်လက် တွေ့ကြုံရမလဲ ??????

ဒီစာအုပ် ကို ရေးရတဲ့ အင်နာ ရဲ့ရည်ရွယ်ချက် က မြင်းတွေအပေါ် လူတွေ ညှာတာ ထောက်ထားတဲ့ စိတ်လေး ပေါ်လာစေဖို့ ပါ ။ 

အင်နာ ရဲ့ ရည်ရွယ်ချက် အောင်မြင်ပါတယ်.။ 

၁၈၇၇ ခုနှစ် ထဲက ထုတ်ဝေခဲ့တဲ့ ဒီ စာအုပ်လေး ကို အခု ၂၁ရာစု မှာ ဖတ်ရပေမဲ့

 မြင်းတွေ (တိရစ္ဆာန်) အပေါ် သနားညှာတာ စိတ် ပေါ်လာနိုင်ဆဲပါပဲ ။ 

ဒီစာအုပ် နဲ့ ပက်သက်ပြီး မိတ်ဆွေ တစ်ယောက် က "ကလေး ဖတ်ဖို့ ကလေး စာအုပ်လား " "လူကြီး ဖတ်ဖို့ ကလေး စာအုပ်လား " မေးတော့ လူကြီး ဖတ်ဖို့ ကလေးစာအုပ် ပါလို့ ကျွန်တော် ဖြေလိုက်တယ် ။ ဟုတ်တယ်လေ မြင်းတွေ ကို အသနား အညှာတာ မရှိပဲ ရိုက်နှက် နှိပ်စက်နိုင်တာ လူကြီးတွေ ပဲ မို့လို့ပါ ။ 

Ko Kyaw Lwin (7:30 am,29.8.2017)

Publisher Name: စာနဒီ စာအုပ်တိုက်

Publisher Address: အမှတ်-၉၇၃၊ ပျဉ်းမမြိုင်လမ်း၊ ၃၄ ရပ်ကွက်၊ မြောက်ဒဂုံမြို့နယ်၊ ရန်ကုန်မြို့။

Publisher Phone Number: 095071196, 095071197