ကျားဖြူ
သင့်လူ
အိန္ဒိယနိုင်ငံ၏ မျက်မှောက်ခေတ် နိုင်ငံရေး၊ စီးပွားရေး၊ လူမှုရေးများကို ထိထိမိမိ သရော်ထားသည့် စာအုပ်။ စာပေလောကတွင် ဩဇာအလွန်ကြီးသော Man Booker ဆုအပါအဝင် နိုင်ငံတကာ ဆုပေါင်းများစွာ ရရှိခဲ့သော အိန္ဒိယဖွား ကမ္ဘာကျော် စာရေးဆရာ၏ စာအုပ်။ မျက်မှောက်ခေတ် ဝတ္ထုဖန်တီးမှု အတတ်ပညာတွင် နိုင်ငံတကာက အလေးထားလေ့လာ ဖတ်ရှုနေရသည့် စာအုပ်။
ကျားဖြူဆိုတာ ရုတ်တရက်ကြည့်လိုက်ရင် ပါတီတစ်ခု နာမည်လား ထင်မှတ်မှားစရာ ရှိပါတယ်။ တကယ်တော့ ကျားဖြူဆိုတာ ဒီ ဝတ္ထုထဲက အဓိက ဇာတ်ကောင်။ တရုတ်ဝန်ကြီးချုပ် ဝမ်ကျားပေါင်ဆီကို အိန္ဒိယက စွန့်ဦးတီထွင် ပညာရှင်လို့ သူ့ကိုယ်သူ သတ်မှတ်ထားတဲ့ သူတစ်ယောက်က စာတွေရေးတယ်။ ဒီစာတွေကို ဖတ်ရင်း ချက်ချင်း သတိရလိုက်မိတာက သုခမြို့တော်ဆိုတဲ့ ဆရာကြီး မြသန်းတင့် ဘာသာပြန်ထားတဲ့ စာအုပ်။ ဟိုစာအုပ်ကို ဖတ်တုန်းကတော့ တစ်ပတ်လောက် အီလည်လည် ဖြစ်ကျန်ခဲ့တယ်။ ဒါပေမယ့် ဒီစာအုပ်မှာတော့ စာရေးသူက သွက်သွက်လက်လက်ကလေး အသော့လေးနဲ့ ရေးတယ်။ ဘာသာပြန်တဲ့ ဆရာသင့်လူကလဲ အသော့လေးနဲ့ ဘာသာပြန်တယ်။ အစအဆုံး ပြီးအောင် ဖတ်လိုက်ရမှ နေသာထိုင်သာ ရှိသွားတဲ့ ဝတ္ထုမျိုးလို့ ပြောနိုင်ပါတယ်။
ကျားဖြူရဲ့ စွန့်စားခန်းလို့ ပြောရမလား။ ဆိုးဝါးလှတဲ့ အိန္ဒိယလူနေမှု စနစ်အတွင်းက သားကောင်တစ်ကောင်ရဲ့ အောင်ပွဲလို့ ပြောရမလား။ လူမှုကျင့်ဝတ် စံနှုန်းတွေနဲ့ မကိုက်ညီတာ မှန်ပေမယ့် ကျားဖြူလုပ်လိုက်တာ မှန်သလိုလို၊ အီလည်လည်ကြီး ခံစားသွားစေရမယ့် ဝတ္ထုမျိုး။ စုတ်ပြတ်သတ်နေတဲ့ အိန္ဒိယ နင်းပြား မိသားစုကြီးထဲမှာ ယောင်္ကျားလေး တစ်ယောက် အဖြစ် မွေးဖွားလာတဲ့ ကလေးတစ်ယောက်။ သူ့အမေက သေ၊ နောက်တော့ သူ့အဖေလဲ သေ။ ကျောင်းကလဲ မတက်၊ ဒါပေမယ့် ကားမောင်းတတ်တဲ့အတွက် သူ့ဘဝ အတိုင်းအတာ တစ်ခုအထိ ထွက်ပေါက်ရသွားခဲ့တယ်။ ဒါပေမယ့် နင်းပြားဘဝမှာတင် ဆိုးတာ မဟုတ် အိန္ဒိယ ဒီမိုကရေစီ ယန္တရားကြီိးထဲက ရုပ်ပျက်ဆင်းပျက် အဖြစ်အပျက်တွေ ကြားထဲမှာ လည်သလိုလုပ်ရင်း၊ သခင်ကိို အသေ ကိုးကွယ်ရင်း။ နောက်ဆုံးတော့ ထွက်ပေါက် တစ်ခုကို ရွေးချယ်သွားခဲဲ့တယ်။ ကျားဖြူ ရွေးချယ်သွားတဲ့ ထွက်ပေါက်က ဘာလဲ။ သိချင်တယ်ဆိုရင် ဖတ်ဖြစ်အောင် ဖတ်ကြည့်သင့်တယ်။
ဖတ်ညွှန်းရေးသူ - စိုးသီဟနောင်
Publisher Name: ငါတို့စာပေ
Publisher Address: Yangon Book Plaza သံစျေး ၅လွှာ ၁၇လမ်း ရန်ကုန်။ ဖုန်း - 09 73055543
Publisher Phone Number: 09 73055543
