၁၄၀ ကျော်ပါတဲ့ ၃၈၀၀ တန် ဒိုင်းကို ဖတ်ပြီးတဲ့အခါမှာတော့ တစ်ခေါက်တည်းနဲ့ဖတ်ပြီး ချောင်ထိုးထားရမယ့် ရုပ်ပြစာအုပ်မဟုတ်တဲ့အပြင် ဝယ်ဖတ်လိုက်တာ

တန်သွားပြီဆိုတဲ့စာအုပ်ဆိုတာသိသွားပါတယ်။ 

ဒိုင်း (Vol. 1 2019, Rainy)

ဒိုင်း ဆိုတဲ့ မြန်မာရုပ်ပြစုစည်းမှု စာအုပ်ဟာ ရုပ်ရှင်နဲ့ဥပမာပေးရရင် အနီးစပ်ဆုံးအဖြစ် မတ်လကထွက်ရှိခဲ့တဲ့ Animation စတိုင်မျိုးစုံပါတဲ့ Netflix ရဲ့ 

Love, Death and Robots နဲ့

ပေးရမယ်ထင်ပါတယ်။ 

ဘာကြောင့်လဲ? 

ဒိုင်းထဲမှာ မတူညီတဲ့ ဇာတ်လမ်းမျိုးစုံကို

ရုပ်ပြစတိုင်မျိုးစုံနဲ့ ရေးဆွဲတင်ပြထားလို့ပါ။

ဟုတ်ပြီ။ ဒိုင်းဆိုတာဘာလဲ။ မြန်မာရုပ်ပြဟန်တွေမပါတဲ့အပြင် မြန်မာရုပ်ပြမျိုးဆက်ဟောင်းတွေ တစ်ယောက်မျှလည်းမပါတာကို ဘာဖြစ်လို့ မြန်မာရုပ်ပြစုစည်းမှုလို့ ခေါင်းစဉ်တပ်ထားတာလဲ။ အဲဒါတွေက ဒိုင်း စာအုပ်ကို တကယ်ဖတ်ကြည့်တော့မှ ရှင်းရှင်းလင်းလင်း သိရပါတယ်။

ဒီနှစ် မတ်လအလယ်လောက်က ဝုန်းဒိုင်းကြဲ - Myanmar Comic Collection ဆိုတဲ့

Page တစ်ခု ပေါ်လာခဲ့တယ်။ 

အဲ့ဒီ page ရဲ့ရည်ရွယ်ချက်က မြန်မာစာပေလောကမှာ တစ်ခေတ်တစ်ခါက ရုပ်ပြယဉ်ကျေးမှုအတော်အတန်ထွန်းကားခဲ့တဲ့၊ လက်ရှိမှာတော့ လုံးဝပျောက်ဆုံးနေတဲ့ မြန်မာရုပ်ပြယဉ်ကျေးမှုကို ပြန်ထွန်းကားစေဖို့ လူလတ် လူငယ်မျိုးဆက်သစ် ရုပ်ပြ

ကလောင်ရှင်တွေနဲ့ ပူးပေါင်းပြီး အဆင့်မှီ၊ အဆင့်မြင့် မြန်မာရုပ်ပြစာအုပ်သုံးအုပ်ကို တစ်နှစ်ကို ရာသီသုံးရာသီတိုင်းမှာထုတ်ဝေပြီး မြန်မာစာဖတ်ပရိသတ်တွေလက်ထဲ ရောက်ရှိဖတ်ရှုစေချင်လို့ဖြစ်ပါတယ်။

ဟုတ်တော့လည်းဟုတ်ပါတယ်။ ကျနော်တို့ငယ်ငယ်တုန်းက ကျနော်ဖတ်ဖူးခဲ့တဲ့ တေဇ၊ မိုးသောက်ပန်း၊ ရွှေသွေး (လက်ရှိထုတ်ဝေနေတဲ့ရွှေသွေးတွေမဟုတ်ပါ)၊ ဒီရဲဂျာ၊ ဘရန်ဆိုင်း၊ တင်မောင်ဝင်း၊ စိုင်းဗေဒါ ရှိသလို ကျနော်လုံးဝမမီလိုက်၊ မဖတ်လိုက်ရတဲ့ ရုပ်ပြစာအုပ်တွေခေတ်စားခဲ့ပါတယ်။

ယခုခေတ်မှာ ရုပ်ပြစာအုပ်တွေကို စာအုပ်အငှားဆိုင်နည်းနည်းပဲရှိတော့တာကြောင့် အလွယ်ငှားမဖတ်နိုင်တော့ဘူး။ စာအုပ်ရောင်းချပွဲတွေမှာ ရုပ်ပြစာအုပ်ဟောင်းတွေကို အထူးစျေးနှုန်းနဲ့ရောင်းချပေးနေတာတောင် ကိုယ်ဘယ်လောက်ပဲကြိုက်ခဲ့ပါစေ ဘာမဆိုစျေးကြီးနေတဲ့ခေတ်ကြီးမှာအများကြီး

ဝယ်မဖတ်နိုင်တော့ပါဘူး။

အဲ့ဒီလိုအခြေအနေမှာ ဝုန်း ဒိုင်း ကြဲ ဆိုပြီး တစ်နှစ်ကို မြန်မာရုပ်ပြစာအုပ် ၃ အုပ်ထုတ်ဝေမယ်ဆိုတာကို သိလိုက်ရတော့ ဝမ်းသာသွားတယ်။ နောက်ပြီး လူလတ် လူငယ်မျိုးဆက်သစ် ရုပ်ပြကလောင်ရှင်တွေပဲ ပါဝင်ရေးဆွဲထားမယ်လို့ထပ်ကြားရတဲ့အခါလည်း

အားရဝမ်းသာမိပါတယ်။

ဝုန်းဒိုင်းကြဲ ထဲမှ မိုးရာသီအတွက် ဒိုင်း ဆိုတာကို ပထမဆုံးထုတ်ဝေမယ်လို့ ကြေညာခဲ့ပါတယ်။ စာအုပ်အဖြစ်မထုတ်ဝေခင် ဒိုင်းထဲမှာပါဝင်ရေးဆွဲကြမယ့် လူငယ်မျိုးဆက်သစ်ရုပ်ပြကလောင်ရှင်တွေကို page မှာ အပတ်တိုင်း ကြိုမိတ်ဆက်ပေးထားကြပါတယ်။

သူတို့ကြေညာပြီး ၂လကြာတော့မှ 

ဒိုင်းစာအုပ်က အကောင်အထည်ထွက်လာခဲ့လို့

လခထုတ်ပြီးပြီးချင်း ပြေးဝယ်ဖတ်ကြည့်တော့...

ခေတ်မီပြီး အဆင့်မြင့်တဲ့ မြန်မာ့ရုပ်ပြလောကသစ်ကို ဖွင့်လှစ်လိုက်ပြီလို့ စိတ်ထဲတွေးလိုက်မိတယ်။ 

ဒိုင်းမှာပါကြတဲ့ ရုပ်ပြ ကိုးပုဒ်စလုံးဟာ တစ်ပုဒ်နဲ့တစ်ပုဒ် ရေးဆွဲထားတာချင်းကွဲပြားသလို၊ ဖတ်ပြီးရလိုက်တဲ့ခံစားချက်တွေလည်း လုံးဝမတူညီပါဘူး။ 

ရုပ်ပြတစ်ပုဒ်မှာဆို စာသားတွေလုံးဝမပါဘဲ ရုပ်ပြတွေနဲ့ချည်း ဇာတ်လမ်းဆင်ပြထားတာ

တွေလည်းမိုက်ပါတယ်။ အချို့ရုပ်ပြတွေက ခေတ်ဆန်နေပမယ့် မြန်မာဟန်တွေလည်းပါတယ်။ တစ်ခန်းရပ်ရုပ်ပြတွေလည်းပါတယ်။ တစ်ချို့က အခန်းဆက်ရုပ်ပြတွေမို့လို့ နောက်ထပ်ထပ်ထုတ်ဝေမယ့် ရုပ်ပြစာအုပ်တွေမှာဆက်ပါနိုင်ပါတယ်။ ရုပ်ပြတစ်ပုဒ်ပြီးတိုင်း ဖတ်ခဲ့ပြီးရုပ်ပြကို ရေးဆွဲခဲ့တဲ့ ရုပ်ပြရေးဆွဲသူရဲ့ ကိုယ်ရေးအကျဉ်းကို ဗမာစာ ဒါမှမဟုတ် အင်္ဂလိပ်စာနဲ့ မိတ်ဆက်ပေးထားပါသေးတယ်။

ဒိုင်းထဲကရုပ်ပြအများစုမှာ ဇာတ်လမ်းအားနည်းချက်၊ ရုပ်ပြရေးဆွဲမှုအားနည်းချက်တွေ ရှိကောင်းရှိနိုင်ပေမယ့် ပါဝင်ရေးဆွဲခဲ့ကြတဲ့ လူငယ်တွေက စေတနာပါပါ (တကယ်လည်းပါတယ်၊ အသေးစိတ်ဖတ်ရင်သိလာပါမယ်) ပင်ပင်ပန်းပန်းကြိုးကြိုးစားစားရေးဆွဲခဲ့တာက

တော့သေချာတာမို့လို့ ကျနော်တို့စာဖတ်ပရိသတ်တို့က အသိအမှတ်ပြုလက်ခံသင့်ပါတယ်။ နောက်ပြီး ထိုလူငယ်တွေကို လေးစားချီးကျူးမိ၊ ဂုဏ်ယူမိ၊ အားကျမိပါတယ်။

ဒိုင်းထဲကကိုးပုဒ်တည်းကိုဖတ်ရတာ

အားမရသေးလို့ လူငယ်မျိုးဆက်သစ်တွေရဲ့

ရုပ်ပြဇာတ်လမ်းလက်ရာတွေကို အများကြီးထပ်ဖတ်ချင်ပါသေးတယ်။ 

ဒိုင်း ပြီးရင် စက်တင်ဘာလထဲမှာထုတ်ဝေမယ့် 

"ကြဲ" ထဲမှာရော ဘယ်လိုရုပ်ပြတွေက စောင့်ကြိုနေမလဲဆိုတာ အမြန်သိချင်လှပါပြီ။

Review By @Arkar Kyaw

#GCWM #ဒိုင်း 

#Vol1Rainy #Review