ဝူဟန်ဒိုင်ယာရီ

တော်ကောင်းမင်း (မူရင်းတရုတ်ဘာသာမှ ပြန်ဆိုသည်။)

ကံ့ကော်ဝတ်ရည်

ဇွန် ၂၀၂၀

ပကြိမ်

အုပ်ရေ ၁၀၀၀

၃၉၀စာမျက်နှာ

မျက်နှာဖုံး - ကျော်မင်းမောင်

၅၈၀၀ကျပ်

မူရင်း - Wuhan Diary by Fang Fang

(方方武汉日记)

ကမ္ဘာ့ကပ်ရောဂါ Covid-19 အခြေတည်ရာ epicenterဖြစ်သည့် ဝူဟန်မြို့နေ စာရေးဆရာမဖန်းဖန်း ရေးသားခဲ့သော စာအုပ်ဖြစ်ပါသည်။ ဝူဟန်ဗိုင်းရပ်စ်ကပ်ရောဂါကာလအတွင်း ဖြတ်သန်းကျော်လွှားခဲ့ရပုံများကို ယခုနှစ် ဇန်နဝါရီ၂၅ရက်နေ့မှ မတ်လ၂၄ရက်နေ့အထိ စိနဝေပေါ်အင်တာနက်စာမျက်နှာတွင် နေ့စဉ်ရေးသားကာ ပို့စ်တင်ခဲ့သည့် ဖန်းဖန်း၏ မှတ်တမ်းဖြစ်ပါသည်။ 

၁၉၅၅ခုနှစ်ဖွား ဆရာမဖန်းဖန်းသည် အသ်က်နှစ်နှစ်သမီးအရွယ်မှစ၍ ယခုအချိန်ထိ ဝူဟန်မြို့တွင် တောက်လျှောက်နေထိုင်ကြီးပြင်းလာသူဖြစ်ပါသည်။ 

ဖန်းဖန်းသည် အမျိုးသားရေးတက်ကြွသူ မျိုးချစ်စိတ်ပြင်းထန်သူဖြစ်သည့်အလျောက် လက်ဝဲစွန်းသမားများ၏ ဝိုင်းဝန်းတိုက်ခိုက်မှုကို အမြဲခံနေရသူဖြစ်ပါသည်။ သူမ၏အကောင့်များ မကြာမကြာ အပိတ်ခံရ၊ သူမတင်သောပို့စ်များခဏခဏ အဖျက်ခံရပြီး ၂၀၁၆တွင်ထုတ်ဝေခဲ့သည့် သူမ၏Soft Burial ဝတ္ထုရှည်စာအုပ်သည်ပင် ပိတ်သိမ်းခံရသည့် စာရေးဆရာမဖြစ်ပါသည်။ ဆရာတော်ကောင်းမင်းစကားယူပြောရလျှင် ဖန်းဖန်းသည် ခေသူမဟုတ်ပါ။

ဖန်းဖန်း၏ ဝူဟန်ဒိုင်ယာရီကို ဆရာဟိန်းလတ်ရော ဆရာတော်ကောင်းမင်းပါ ဘာသာပြန်ထားကြပါသည်။ ရှန်ဟိုင်းဂျင်ဖြင့် စာပေဆုရခဲ့ပြီး ဖား၊ သက်ရှင်နေ၊ ဆန်ပြောင်းနီ၊ နွမ်းလျသေရှင်၊ ကွန်ဖြူးရှပ်၊ ဆုန်မင်းဆက်၊ ကျန်ဇီမင်း၊ ရွှီစန်းကွမ်းစသည်တို့ကို မိတ်ဆက်ပေးသည့် ဆရာတော်ကောင်းမင်း၏ ဘာသာပြန်ကို ကြိုက်နှစ်သက်သည့်အားလျော်စွာ ဆရာတော်ကောင်းမင်းတိုက်ရိုက်ပြန်သည့်မူကို  စိတ်ချလက်ချ ရွေးချယ်ဖြစ်လိုက်ပါသည်။

ဖတ်နေရင်း ကြိုက်လွန်းလို့ ကျွန်တော့်မှာ ဘေးနားကဇနီးသည်ကို တော်တော်ကောင်းတဲ့စာအုပ်၊ သိပ်ကြိုက်တာပဲ၊ ဖတ်ရတာအရသာရှိလိုက်တာလို့ ပြောဖြစ်ပါသည်။ ပြီး ဒီထဲကအကြောင်းအရာလေးတွေ သူ့ကို ပြောပြဖြစ်ပါသေးသည်။ 

ရုတ်တရက် ဗိုင်းရပ်စ်ကပ်ရောဂါကျရောက်လာသည့်အခါ ဝူဟန်ကလူတွေ ဒုက္ခတွေရင်ဆိုင်ရသည့်အကြောင်း

ဝူဟန်(၃)မြို့ လော့ဒေါင်းချခံရသည့်အကြောင်း

လော့ဒေါင်းကာလ ရင်ဆိုင်ရသည့်ပြဿနာများ၊ ရသလောက်အချိန်လေးအတွင်းမှာ စားရေးနေရေး ကျန်းမာရေးအတွက် ကတိုက်ကရိုက် ပြင်ဆင်ခဲ့ရပုံများ

မတ်စ်တွေ ပြတ်လပ်ကုန်ကာ ဝယ်လို့ရရင်တောင် တစ်ခုကို ယွမ်၃၀ကျော် ပေးဝယ်ရပုံများ

လမ်းတွေ ကန်တွေ ရှုခင်းတွေ နေရောင်ခြည်နွေးနွေးတွေ ကြည့်ရှုခံစားသူ မဲ့နေပုံများ

ဒေါက်တာလီဝန်လျန်အပါအဝင် ရှေ့တန်းရောက် ကျန်းမာရေးဝန်ထမ်းများ၏ စွမ်းစွမ်းတမံ ဆောင်ရွက်နေမှုများ

မိတ်ဆွေအချင်းချင်း ဆွေမျိုးအချင်းချင်း လူသားအချင်းချင်း စာနာဖေးမမှုများ၊ မျှဝေခံစားမှုများ၊ အားပေးကူညီမှုများ

လူလူချင်းမကူးပါဘူး၊ ဗိုင်းရပ်စ်ကိုကာကွယ်နိုင်တယ်၊ ထိန်းချုပ်နိုင်ပါပြီ အစရှိသည်ဖြင့် (ဒေါက်တာဝမ်ကွမ်ဖားလို) တာဝန်ရှိသူများက လူထုအပေါ် အညှာအတာမဲ့စွာ ထည့်လိုက်သည့် ဂျင်းတုံးကြီးများ

(လိမ်ညာသည်၊ ထိန်ချန်ထားသည်ဟုတော့ ဆရာမက ဒဲ့မရေး) အစစ်အမှန်ဟု ယူဆရန်ခဲယဉ်းသည့် ကူးစက် သေပျောက် စားရင်းကမောက်ကမများ

ရောဂါလက္ခဏာရှိပေမဲ့ ဓာတ်ခွဲအတည်မပြုရသေးသည့် လူနာများ

ဓာတ်ခွဲအတည်ပြုထားပေမဲ့ ဆေးရုံတက်ရောက်ကုသရန် စာရင်းပေးထားသည့် လူနာများ

ဆေးရုံတက်ဖို့ အကြောင်းကြားတဲ့အချိန်မှာ အသက်သေဆုံးနှင့်ပြီဖြစ်သည့် လူနာများ

ဗိုင်းရပ်မကူးစက်အောင် ဆင်ခြင်နေထိုင်ခဲ့ရပုံများ

ကူးစက်ပြီး ဘာတွေသတိထားရမလဲ၊ ဘာဆက်လုပ်ရမလဲစသည့် အကြောင်းအရာများ

အစမှာ အသက်ကြီးသူများ၊ Underlining diseaseရှိသူများသာ ဗိုင်းရပ်ပိုးဒဏ်အလူရအလဲခံရပြီး သေဆုံးနိုင်ချေပိုများကြောင်း ယူဆကြရာကနေ နောက်တော့ အသက်၂၉-၃၀အရွယ်တွေ ဗိုင်းရပ်စ်ကြောင့် တဖြုတ်ဖြုတ်ကြွေကြသည့်အခါ ဗိုင်းရပ်စ်၏ ပဉ္စလက်ပညာကို အားလုံး မျက်လုံးပြူးသွားရပုံများ

တိမ်မြုပ်နေသော ရောဂါပိုးကူးစက်ခံရသူ လူစုကြီးကို ရှာဖွေဖော်ထုတ်နိုင်ခြင်း မပြုပါက ရောဂါထိန်းချုပ်ဖို့ ခက်ခဲသည့်အကြောင်း

ဝူဟန်မှာ ဆေးရုံတွေ ချက်ချင်းဆောက်၊ ကုသမှုတွေ အချိန်မီပေးနိုင်အောင် အလျင်စလို ဆောင်ရွက်ကြရပုံများ

အနောက်တိုင်းဆေးပညာနဲ့ တရုတ်တိုင်းရင်းဆေးပညာများ၏ သဘောသဘာဝများ

ဗိုင်းရပ်ရန်မှ ကာကွယ်ရန်၊ ကုသရန်နှင့် အပြီးသတ်ထိန်းချုပ်နိုင်ရန် အစိုးရ၊ အဖွဲ့အစည်းများ၊ ကျန်းမာရေးဝန်ထမ်းများ၊ လူထုနှင့် ဖန်းဖန်းတို့လို မျိုးချစ်စာရေးဆရာများ၏ ကြိုးပမ်းဆောင်ရွက်ကြပုံများ စသည်.....

ဖန်းဖန်းသည် ကပ်ရောဂါထိန်းချုပ်သုတ်သင်ရေးအတွက် မိမိ၏ကလောင်ဖြင့် ပြောင်မြောက်စွာ လုပ်ဆောင်နိုင်ပါသည်။ ဝူဟန်ဒိုင်ယာရီမှတစ်ဆင့် အစိုးရနှင့် တာဝန်ရှိသူများကို ထောက်ပြသည်။ ဗော်လံတီယာများကို ချီးမွမ်းသည်။ ကျန်းမာရေးဝန်ထမ်းများကို ဂုဏ်ပြုသည်။ လူထုကို အသိပညာပေးသည်။ ကူးစက်ခံရသည့်လူနာများကို မြန်မြန်သက်သာပျောက်ကင်းအောင် ဆုတောင်းပေးသည်။ ပြိုပျက်သွားသည့်အသိုက်အမြုံများကို စာနာစိတ်ဖြင့်ဖေးမသည်။ ဗိုင်းရပ်စ်ကို ထိတ်လန့်ကြောက်ရွံ့နေသူများအား သတ္တိရှိရှိ ရင်ဆိုင်ရန် တွန်းအားပေးသည်။ ဖန်းဖန်းအတွက် ဝူဟန်ဒိုင်ယာရီရေးသားခြင်းသည် ခေတ်ကပုခုံးပေါ်တင်ပေးသည့် တာဝန်ကို ရဲရဲဝံ့ဝံ့ဖြင့် အပြောင်မြောက်ဆုံး ထမ်းဆောင်လိုက်ခြင်းလည်း မည်ပါသည်။

ထိုနည်းတူစွာ

ယခုဘာသာပြန်စာအုပ်ကို ထုတ်ဝေပေးသည့် ကံ့ကော်ဝတ်ရည်ရော၊ ဘာသာပြန်ပေးသည့် ဆရာတော်ကောင်းမင်းပါ ဖန်းဖန်းကဲ့သို့ပင် ကိုဗစ်ကပ်ရောဂါ တွန်းလှန်တိုက်ဖျက်ရာမှာ လွန်စွာအရေးပါအရာရောက်ကြသည်ဟု ယူဆမိကာ သာဓုအကြိမ်ကြိမ်ခေါ်ဆိုလိုက်ပါသည်။

ကောင်းမြတ်သော အလုပ်ကို ပြုမူဆောင်ရွက်ခြင်းသည် မင်္ဂလာမည်ပါသည်။ ဂုဏ်ယူစရာလည်းဖြစ်ပါသည်။

မကြာခင် ကမ္ဘာ့ကပ်ရောဂါ Covid-19 ကိုရိုနာဗိုင်းရပ်စ် ကမ္ဘာပေါ်မှ အပြီးတိုင် ပျောက်ကွယ်သွားပါစေဟု ဆုတောင်းရင်း ဝူဟန်ဒိုင်ယာရီ စာညွှန်းကို ရေးလိုက်ပါသည်။         ။

#Aung Aung Htwe