မြသန်းတင့် (ကိုယ်ရေးအကျဥ်းနှင့်စာအုပ်များစာရင်း)

https://savethelibrarymyanmar.org/author/30/show

စာရေးဆရာ - မြသန်းတင့်
စာအုပ်အမည် - လေလွင့်သူ
မူရင်း - The Catcher in the Rye by J.D.Salinger
ပုံနှိပ်မှတ်တမ်း - ၂၀၁၇ ဧပြီလ(တတိယအကြိမ်)
ထုတ်ဝေသည့်တိုက် - ဘဝတက္ကသိုလ်
မျက်နှာဖုံး - ပန်းချီတင်ထွဏ်း
စာမျက်နှာ - ၂၆၈
တန်ဖိုး - ၃၀၀၀

ဒီစာအုပ်က ၂၀ ရာစုရဲ့ အကောင်းဆုံးစာအုပ်တစ်ရာတို့ အသက် ၃၀ မပြည့်ခင် ဖတ်ဖြစ်အောင် ဖတ်သင့်တဲ့စာအုပ်တို့ ဟိုစာရင်း ဒီစာရင်းတွေမှာ ခဏခဏပါနေတဲ့ စာအုပ်ဆိုတော့ အထူးညွှန်းစရာလိုမယ်မထင်။

ဟိုးအရင်က ဒီစာအုပ်ကို တစ်ခါဖတ်ဖူးတယ်။ အခုတစ်ခါပြန်ဖတ်တော့ ခံစားချက်ခြင်းသိပ်မကွာဘူး။ ကြိုက်တုန်းပဲ။ အထူးသဖြင့် မူရင်းစာအုပ်နာမည်ကို သိပ်သဘောကျတာ။ `The Catcher in the Rye´ `ဂျုံခင်းထဲမှာ လိုက်ဖမ်းသူ´ လို့ ဆရာမြက ဆိုတယ်။ ဂျုံခင်းအကျယ်ကြီးထဲ ပြေးလွှားဆော့နေတဲ့ ကလေးလေးတွေကို တောင်ကမ်းပါးယံအစွန်းကနေ ပြုတ်မကျအောင် လိုက်ဖမ်းပေးချင်တဲ့`ဟိုလ်ဒင်ကောဖီး´ လို ကောင်လေးတစ်ယောက် ဖြစ်ချင်တာပေါ့လေ။ စဉ်းစားကြည့်လေ။ ကလေးလေးတွေ အပူအပင်မရှိ ပျော်ရွှင် ရယ်မော ပြေးလွှားဆော့နေတာကို ကြည့်ပြီး သူတို့အန္တရာယ်မဖြစ်အောင် လိုက်ထိန်းပေးရမှာ ဘယ်လောက်စိတ်ချမ်းသာစရာကောင်းတဲ့ အလုပ်လဲနော့်။

ဇာတ်လမ်းက ဘာမှမဟုတ်ဘူး။ ကျောင်းထုတ်ခံရပြီး အိမ်ကိုမပြန်ချင်တော့ နယူးယော့ခ်မြို့ကြီးထဲမှာ လျှောက်သွားနေတဲ့ ၁၆ နှစ်အရွယ် ချာတိတ်လေး`ဟိုလ်ဒင်းကောဖီး´ အကြောင်း။ ဘာမှထူးဆန်းထွေလာတွေ ရင်သပ်ရှုမောဖွယ်တွေ မယုံနိုင်စရာတွေ လှည့်ကွက်ဆန်းတွေမပါဘူး။ ခင်ဗျားတို့ ကျွန်တော်တို့ ငယ်ငယ်ကလို ခပ်ရွတ်ရွတ်ချာတိတ်လေးအကြောင်းပဲ။

`သူမကျေနပ်ပုံဟာ ကျွန်တော်တို့ ငယ်ငယ်တုန်းက လောကကြီးကိုနှင့် ပတ်ဝန်းကျင်ကို မကျေမနပ်ဖြစ်နေတာနှင့်တူတယ်။ ခုခေတ်လူငယ်တွေ ……… ။ နောက်လည်း အဲ့ဒီအရွယ်မှာရှိတဲ့ လူငယ်လေးတွေရဲ့ မကျေနပ်ပုံမျိုးနဲ့ သွားတူနေတယ်။ နောက်တော့ အိမ်က မပြေးဖြစ်တော့ဘဲ လောကကို သူသဘောပေါက်သွားတယ်´ လို့ ဆရာမြက အမှာမှာ ပြောတယ်။

ဟုတ်တယ်။ `ကောဖီး´ ပင်ဆေကျောင်းက အထုတ်ခံရပြီးတော့ အိမ်မပြန်ချင်တာနဲ့ နယူးယော့ခ်မှာ ရှိတဲ့ငွေကုန်အောင် လျှောက်သွားတယ်။ ဘားတွေ ကလပ်တွေသွားတယ်။ ကောင်မလေးတွေနဲ့ချိန်းတွေ့တယ်။ နောက်ဆုံး ဟိုအမျိုးသမီးတွေနဲ့တောင် ခေါ်နေဖို့လုပ်သေးတယ်။

သူ့မှာ ဘာပြဿနာတွေရှိလဲဆိုတော့ ဘာမှမရှိဘူး။ မိဘကလဲ ဆင်းရဲချို့တဲ့နေတာမဟုတ်။ သူ့အပေါ်မကောင်းတာလဲမဟုတ်။ တခြားနေရာတွေမှာ သိပ်အဆင်မပြေတာလည်းမရှိ။ သူ့ဟာသူ တစ်ယောက်တည်း ပြဿနာတက်နေတာ။ လောကကြီးကို သဘောမတွေ့ဘူး။ မြင်သမျှ တွေ့သမျှ ကြုံသမျှ စိတ်နဲ့မတွေ့ဘူး။ ပြဇာတ်တွေ ရုပ်ရှင်တွေကြည့်ရတာ သရုပ်ဆောင်တွေကလူနဲ့မတူဘူး။ သရုပ်ဆောင်နဲ့ပဲတူတယ်။ နာမည်ကြီးဆိုတဲ့ကျောင်းတွေ အတော်ဆုံးကျောင်းသားတွေ ထွက်ပါတယ်ဆိုတဲ့ကျောင်းတွေလဲ အလကား။ ဘာမှမဟုတ်ဘူး။ အပေါ်ယံပကာသနတွေ။ လူတွေကလဲ ဟန်ဆောင်အပြုံးတွေနဲ့ ဆိုတာမျိုး။

ဒါပေမယ့် သူ့ကိုနိုင်တဲ့လူတော့ရှိတယ်။ အဲ့ဒါသူ့ညီမလေး။ ကားကြုံစီးပြီး အနောက်ဘက်ပြည်နယ်တွေဆီ အပြီးထွက်သွားတော့မယ်လို့ ဆုံးဖြတ်ပြီး ညီမလေး`ဖီဘီ´ ဆီက ချေးထားတဲ့ နာတာလူးပွဲတော်အတွက် ပိုက်ဆံတွေ သွားပြန်ပေးတယ်။ အဲ့ဒီမှာ သူ့ညီမလေးကပြောတယ်။ `ညီမလေးလည်း ကိုကိုနဲ့အတူလိုက်မယ်လေ။ ဖြစ်တယ်မဟုတ်လားဟင် ကိုကို´ တဲ့။ `ကောဖီး´ တစ်ယောက် အိမ်ကပြေးမယ့်အကြံကို စွန့်လိုက်ရပါရောလား။ အဲ့ဒီအခန်းက အကြိုက်ဆုံးအခန်း။ ချစ်ဖို့ကောင်းတဲ့ ဇာတ်သိမ်းလေးလို့ ထင်တယ်။

ဒီစာအုပ်မှာ ဆရာမြသုံးထားတဲ့ ဗန်းစကားတွေ တော်တော်လှတယ်။ ၁၆ နှစ်အရွယ်ချာတိတ်တစ်ယောက်က ပြန်ပြောပြတဲ့ ဇာတ်ကြောင်းဆိုတာ အပြည့်အဝခံစားရတယ်။ `ဗန်းစကားဆိုတာဟာ ခေတ်တိုင်းမှာ ပေါ်မြဲပါပဲ။ မခိုင်မြဲတဲ့ အဓိပ္ပာယ်မရှိတဲ့ ညစ်ညမ်းတဲ့ဗန်းစကားများဟာ ပျောက်သွားပြီး ခိုင်မြဲတဲ့ အဓိပ္ပာယ်ရှိတဲ့ သင့်လျော်တဲ့ ဘဝနှင့်ဟပ်မိတဲ့ ဗန်းစကားများဟာ အရှည်တည်တံ့ကျန်ခဲ့ပြီး နေ့စဉ်သုံးဝေါဟာရတွေ ဖြစ်လာပါတယ်။ ဒါမှသာ ဘာသာကားတစ်ခုဟာ အသက်ရှင်နေတဲ့ ဘာသာစကားတစ်ခု ဖြစ်မှာပေါ့´ ဆိုတဲ့ ဗန်းစကားနဲ့ပတ်သက်ပြီး ဆရာမြရဲ့ အယူအဆလေးကို အခုခေတ် ဖေ့စ်ဘွတ်ပေါ်မယ် လူငယ်အများစု ဗန်းစကားတွေ ကျယ်ကျယ်ပြန့်ပြန့်သုံးလာတာကို မြန်မာစာပေပျက်စီးပါပြီ အော်နေသူတွေ ဖတ်ကြည့်သင့်တယ်ဆိုတာလေးလည်း တပါတည်းထည့်ပြောလိုက်ပါတယ်။

ဖတ်ညွှန်းရေးသူ-ကျော်သက်ခိုင်

Publisher Name: ဘဝတက္ကသိုလ်စာပေ

Publisher Address: အမှတ် ၁၄၉/ ၃၇ လမ်း/ရန်ကုန်

Publisher Phone Number: ၀၁၂၄၉၇၄၁, ၀၉၅၁၁၂၇၁၄