တစ်ဖက်သတ် ဖိနှိပ်ချုပ်ချယ်မှု၊ အာဏာရှင်ဆန်မှု၊ တစ်လောကလုံး အကျင့်ပျက်ချစားမှု စသည်တို့၏ အကျိုးဆက်များသည် အကျဉ်းထောင် စသည့်နေရာများတွင် မည်ကဲ့သို့ ပြင်းပြင်းထန်ထန် အကျိုးသက်ရောက် နိုင်ကြောင်း ကွက်ကွက်ကွင်းကွင်း ဖတ်ရှုရမည့် စာအုပ်ဖြစ်သည်။ 

ဦးနု၏ ရက်စက်ပါပေ့ကွယ် စာအုပ်ကို ဖတ်ရှုဖူးသူများသည် ယခုစာအုပ်ပါ အဖြစ်အပျက်များနှင့် နှိုင်းယှဉ် လေ့လာသုံးသပ်နိုင်မည် ဖြစ်သည်။ 

ပုံမှန် အစိုးရရုံးကို သွားလျှင် လာဘ်ပေးလာဘ်ယူမှုကို ဖြစ်ရိုးဖြစ်စဉ်လို့ သဘောထားကြသည့် ခေတ်ကြီးတွင် ထောင်တွင်းမှ လာဘ်ပေးလာလ်ယူမှုများသည် အလွန်အင်မတန် စက်ဆုတ်ရွံရှာဖွယ်ကောင်းသော အဖြစ်အပျက်များ ဖြစ်ပျက်ကုန်ကြသည်။ ပုံစံခန်း ငရဲခန်းမှ လွတ်မြောက်လိုသူများသည် ထောင်တန်းစီးများ (လူဆိုးခေါင်း)၊ ထောင်ဝန်ထမ်းများကို လာဘ်ထိုးကြရသည်။ တစ်ချို့ လိင်တူဆက်ဆံရန် သိမ်းသွင်းအကြပ် ကိုင်ခံရသည်။ တရားဥပဒေကို လက်တစ်လုံးခြား လုပ်လို့အကောင်းဆုံးနေရာ ဖြစ်သော အကျဉ်းထောင်တွင် ထောင်ဝန်ထမ်းများ၊ ထောင်တန်းစီး လူဆိုးခေါင်းများ ချယ်လှယ်ချင်သလို ချယ်လှယ်ခွင့် ရနေသည်။ သတ်ချင်လဲ သတ်ပစ်လို့ရသည်။ မတရားမှုအတွက် ဘယ်လိုမှှ အရေးဆိုခွင့်မရှိသော အနေအထား၊ လူအခွင့်အရေးကို ခွေးအခွင့်အရေးလောက်တောင် တန်ဖိုးမထားသော အနေအထား စသည်တို့ကို ဖတ်ရှုရမည် ဖြစ်သည်။ 

ကဗျာဆရာကြီး ဦးတင်မိုးက အမှာစာတွင် အောက်ပါကဗျာတစ်ပုဒ် ရေးသားပြီး အမှာစာ ရေးထားသည်။

တို့ရဲဘော် ဝင်းနိုင်ဦးရဲ့

မှတ်တမ်းမဲ့ မှတ်တမ်း

ဖတ်စမ်းပါ့ ရဲဘော်ရာ

အသည်းက နာ။

တို့ဒဏ်ရာ

ကြီးပါပေ့တကား။

ပြည်သူတွေ သန်းချီလို့

ဒီမိုကရေစီ သည်တိုင်ပွဲမှာ

ရဲရဲနီ ရင်နဲ့ ရင်းရတယ်

အင်းစိန်က မျက်ရည်များ။

သမိုင်း၏ အရုပ်ဆုံးအကျဉ်းတန်သော အဖြစ်အပျက်များအဖြစ် မှတ်တမ်းဝင်ကျန်ရစ်တော့မည့် အဖြစ်အပျက်များကို ဖတ်ရှုရမည် ဖြစ်သည့်အတွက် မဖြစ်မနေ ဝယ်ယူသိမ်းဆည်းထားသင့်သော စာအုပ်ဖြစ်ကြောင်း ညွှန်းဆိုလိုက်ရပါသည်။

ဖတ်ညွှန်း ရေးသားသူ - စိုးသီဟနောင်