စာရေးသူသည် ၂၀၀၈ ခုနှစ် ဖွဲ့စည်းပုံ အခြေခံဥပဒေ အားနည်းချက်များကို ဝေဖန်ထောက်ပြထားသည့် နည်းတူ လွှတ်တော်တစ်ရပ်၏ လုပ်ထုံးလုပ်နည်း၊ ပြည့်သူ့လွှတ်တော် ကိုယ်စားလှယ်တစ်ဦး၏ တာဝန်၊ လုပ်ပိုင်ခွင့်နှင့် ကျင့်ဝတ်များ အထူးသဖြင့် အမေရိကန် ပြည်ထောင်စုတွင် ကျင့်သုံးဆောင်ရွက်နေပုံများနှင့် နှိုင်းယှဉ် ဖော်ပြထားသည်ကို တွေ့ရမည် ဖြစ်ပါသည်။ ဒီမိုကရေစီစနစ်တွင် အရပ်ဘက် လူ့အဖွဲ့အစည်းတို့ အရေးပါအရာရောက်ပုံကိုလည်း သမ္မတအိုဘားမား၏ အရပ်ဘက်လူ့အဖွဲ့အစည်းများအား အိမ်ဖြူတော်သို့ ဖိတ်ခေါ် ဆွေးနွေးအကြံဉာဏ်ရယူသည့် လုပ်ဆောင်ချက် တစ်ရပ်ကို ဥပမာပေး၍ ဖော်ပြထားသည်မှာလည်း မှတ်သားဖွယ်ရာ ဖြစ်ပါသည်။ ထို့ပြင် ဘတ်ဂျက်ခွဲဝေမှု၏ အရေးပါပုံကိုလည်းကောင်း၊ အရပ်ဘက်-စစ်ဘက် ဆက်ဆံရေးကိုလည်းကောင်း၊ ငြိမ်းချမ်းရေး ဖော်ဆောင်မှုနှင့် နိုင်ငံရေးအကျဉ်းသားများ၏ အခန်းကဏ္ဍကိုလည်းကောင်း အလေးပေး ဖော်ပြထားပါသည်။

မြန်မာနိုင်ငံ၏ နိုင်ငံရေးအကူးအပြောင်း တစ်နည်းအားဖြင့် ဒီမိုကရေစီ အသွင်ကူးပြောင်းရေးကာလတွင် သက်တမ်းနုနယ်ပြီး အတွေ့အကြုံ မရင့်ကျက်သေးသည့် မုဆိုးစိုင်သင် လွှတ်တော်များ၊ လွှတ်တော် ကိုယ်စားလှယ်များအတွက် များစွာ အထောက်အကူ ပြုနိုင်လိမ့်မည်ဟု ယုံကြည်သည့်အတွက် ယခုကဲ့သို့ စုစည်းထုတ်ဝေလိုက်ခြင်း ဖြစ်ပါသည်။ ထို့အတူ နိုင်ငံံရေးစိတ်ဝင်စားသူများ၊ နိုင်ငံရေးတွင် ပါဝင်ဆောင်ရွက်နေသူများ ဖတ်သင့်သော စာအုပ်တစ်အုပ်လည်း ဖြစ်ပါသည်။

ပြည်သွေးနိုင် (ခေတ်ပြတိုက်စာပေ)

မူရင်းစာအုပ်ပါ အမှာစာကို ကူးယူဖော်ပြထားခြင်း ဖြစ်ပါသည်။