ဆရာဖေမြင့် စာအုပ်များထဲတွင် ကျွန်တော် အနှစ်သက်ဆုံး စာအုပ်တစ်အုပ်ဖြစ်ပါသည်။ လွန်ခဲ့သည့် နှစ်ပေါင်းများစွာ ကတည်းက သူငယ်ချင်း တစ်ယောက်က ညွှန်းသဖြင့် ဖတ်ဖူးထားသော်လည်း နောက် ဘယ်အချိန် ပြန်ဖတ်ဖတ် လက်က မချနိုင်အောင် ကောင်းလွန်းသော ဝတ္ထုတိုများ ဖြစ်ပါသည်။ ပြန်ကိုင်လိုက်တိုင်း အရူး ဘထူးနှင့် အရူးမောင်ကျော် အကြောင်း ခေါင်းထဲ ရောက်လာမြဲ၊ နှစ်ပေါင်းမြောက်များစွာ သိမ်းဆည်းစုဆောင်း လာခဲ့သည့် ငွေများ၊ ငွေစုလက်မှတ်များ ချကိုက်ခြင်း ခံလိုက်ရသည့်အတွက် အရုပ်ကြိုးပြတ် လဲကျသွားသည့် ဦးအောင်စိန် အကြောင်း၊ စိတ္တဇလူနာကို ပြောင်းလဲ ကုသလိုက်ရသော ဆရာဝန်တစ်ယောက် စသည်ဖြင့် ခေါင်းထဲ တန်းစီပေါ်လာမြဲ ဖြစ်သည်။ ၁၉၉၅ ခုနှစ် အမျိုးသားစာပေ ဝတ္ထုတိုပေါင်းချုပ် ဆုရ စာအုပ်တစ်အုပ် ဖြစ်သည်နှင့်အညီ အရမ်းကို ခမ်းနားလွန်းသည့် စာအုပ်တစ်အုပ် အဖြစ် ညွှန်းဆိုလိုက်ရပါသည်။

စာညွှန်းရေးသားသူ - စိုးသီဟနောင်