Book Image

မိုးသောက်အရုဏ်

တင့်ဇော်

စာအုပ်အမည် - Dawn

စာရေးသူ - Elie Wiesel
ဘာသာပြန်စာအုပ်အမည် - မိုးသောက်အရုဏ်
ဘာသာပြန်စာရေးသူ - တင့်ဇော်
စာအုပ်တိုက် - လင်းလွန်းခင်စာပေတိုက်မှ 2019 ဖေဖော်ဝါရီလ တွင် ပထမအကြိမ် ပုံနှိပ်ခြင်း
အမျိုးအစား - ဘာသာပြန်ဝတၳု
တန်ဖိုး - 2500
စာမျက်နှာ- 145 pages



          အယ်လီဝီဇယ်ရဲ့ နာမည်ကြီး Trilogy ထဲက ဒုတိယစာအုပ် မိုးသောက်အရုဏ်က ပထမစာအုပ် ညလို ဖြစ်ရပ်မှန် ကိုယ်တွေ့ဇာတ်လမ်းတော့ မဟုတ်ဘူး။ ဒါပေမယ့် စာရေးဆရာက သူချပြလိုတ့ဲ ဇာတ်လမ်းတစ်ခုကို ကျနော်တို့ကို ချကျေွးလိုက်တယ်။ အ့ဲဟာက ဘယ်လိုအရသာရှိသလဲဆိုတာ မပြောခင် ဒီစာအုပ်ကို ဘာသာပြန်တ့ဲ စာရေးဆရာတင့်ဇော်က အမှာမှာ ဘယ်လိုရေးထားလဲဆိုတာ ပြောရရင် " မိုးသောက်အရုဏ်ဇာတ်လမ်းက ညနဲ့လည်းမတူ၊ နေ့လိုလည်း မဟုတ်ပါဘူး။ တကယ်တော့ ည၊ မိုးသောက်အရုဏ်နဲ့ နေ့ (၃) အုပ်စလုံး ဖတ်ကြည့်ရင် ဇာတ်ကောင်တစ်ကောင်ရဲ့ လှုပ်ရှားမှုကို ပိုပြီး ပီပီသသ တွေ့နိုင်မှာပါ" လို့ ရေးထားတယ်။ 

          အယ်လီဝီဇယ်ကလည်း သူ့စာအုပ်နဲ့ ပက်သက်လို့ ဒီလိုရေးခ့ဲတယ်။ "ကျွန်တော့်ရဲ့ ပထမဆုံးဝတၳုဟာ ရုတ်ခြည်းဆိုသလို ကျွန်တော်တို့ ကြုံတွေ့နေရတ့ဲ ပစ္စုပ္ပန်အခြေအနေတွေနဲ့ ဆက်စပ်ပက်သက်သွားလို့ အံ့ဩမိရပါတယ်။ အ့ဲဒီအခြေအနေတွေဆိုတာက ဓားစားခံဖမ်းဆီးခြင်း၊ အကြမ်းဖက်ခြင်း၊ လျှို့ဝှက်ထောက်လှမ်းခြင်း၊ ပုန်ကန်ထကြွခြင်း ဆိုတာတွေနဲ့ ဆက်နွယ်မနေပေဘူးလား" လို့ ဖတ်ရတယ်။ 

          အယ်လီဝီဇယ်က ဂျူးလူမျိုးတစ်ဦးဖြစ်ပါတယ်။ ကမ္ဘာပေါ်က ဘယ်လူမျိုးမဆို အတိတ်အခံနဲ့ ပက်သက်ပြီး ကိုယ့်လူမျိုးဘက်က နာခ့ဲရတာတွေကို မကျေနပ်တာ ဓမ္မတာပါ။ အယ်လီဝီဇယ်ဟာ တချိန်က .. တချိန်ကဆိုတာ အစ္စရေးနိုင်ငံကို ဖန်တီးမတည်ဆောက်ရသေးခင်ပေါ့၊ အ့ဲချိန်က ပါလက်စတိုင်းဒေသမှာ အင်္ဂလိပ်တွေ အုပ်ချုပ်တယ်။ အ့ဲဒီပါလက်စတိုင်းမှာ ဂျူးတွေရဲ့ အဓိကရန်သူက အာရပ်တွေ မဟုတ်ဘူး။ အင်္ဂလိပ်တွေ၊ ဩဇာအာဏာက ဂျေရုစလင်မှာမရှိဘဲ လန်ဒန်မှာရှိနေတ့ဲခေတ်။ အ့ဲဒီခေတ်ကို နောက်ခံထားပြီး အယ်လီဝီဇယ်က ဇာတ်လမ်းဖန်တီးတယ်။ 

            ဒီဇာတ်လမ်းမှာ အကျဉ်းစခန်းကနေ မိဘတွေ သေဆုံးပြီး သူပဲ လွတ်မြောက်လာရာက ပြင်သစ်မှာ နေနေတုန်း ဂျူးမြေအောက်အဖွဲ့အစည်းတစ်ခုက အကူအညီတောင်းတာကို လက်ခံပြီး ပါလက်စတိုင်းမှာ UG လုပ်တာနဲ့ စထားတယ်။ UG ဖြစ်ပြီး သိပ်မကြာခင်မှာ သူတို့လွတ်မြောက်ရေး တိုက်ပွဲဝင် ဂျူးတစ်ယောက် အဖမ်းခံရပြီး အင်္ဂလိပ်တွေက သေဒဏ်ချလိုက်တယ်။ အ့ဲဒီမှာ အယ်လီဝီဇယ်တို့ UG တွေဘက်က လက်တုံ့ပြန်တ့ဲ အနေနဲ့ အင်္ဂလိပ်အစိုးရအဖွဲ့လက်အောက်က စစ်ဗိုလ်တစ်ယောက်ကို ပြန်ပေးဆွဲခ့ဲတယ်။ 

          ဂျူးလွတ်မြောက်ရေးတပ်သား ဒေးဗစ်ဘင်မိုရှီကို အင်္ဂလိပ်တပ်တွေက သေဒဏ်ပေးမယ့် မိုးသောက်အရုဏ်အချိန်မှာပဲ ဂျူးတွေကလည်း သူတို့ဖမ်းဆီးလိုက်တ့ဲ အင်္ဂလိပ်စစ်ဗိုလ် ဂျွန်ဒေါ်ဆင်ကို သေဒဏ်ပြန်စီရင်မယ်။ အ့ဲဒီ အင်္ဂလိပ်စစ်ဗိုလ်ကို သေဒဏ်စီရင်ရရမယ့် ပါးကွက်သားတာဝန်ကို အယ်လီဝီဇယ်က ထမ်းဆောင်ရမယ်။ 

          ပြောရရင် ဒီစာအုပ်က အ့ဲဒီ မိုးသောက်အရုဏ်မတက်ခင် ညဦးပိုင်းကနေ မိုးသောက်အရုဏ်ချိန်ထိ တစ်ညတည်းဇာတ်လမ်း။ အ့ဲဒီမှာ ဇာတ်ကောင်တွေရဲ့ အကြောင်း၊ အတွေးတွေ၊ နိုင်ငံရေးတွေ၊ စသဖြင့် ဖြန့်ကျက်ရေးထားတ့ဲ စာအုပ်။ လူတစ်ယောက်ရဲ့ ရှင်သန်မှုမှာ မထင်မှတ်ဘဲ ကြုံတွေ့ရတာကို ဘယ်လိုဖြေရှင်းကြသလဲဆိုတာ စာရေးဆရာက ပါးပါးလေး မြင်အောင် ချပြထားတယ်။ 

          Trilogy ဖြစ်လို့ မိုးသောက်အရုဏ် တစ်အုပ်တည်းဖတ်လို့ရသလို ညကို သဘောကျပြီိး အဆက်ကို စောင့်နေသူတွေ အာသာပြေမှာ သေချာတ့ဲစာအုပ်တစ်အုပ်ပါ။ ညနဲ့ နေ့ကို ဘာသာပြန်ခ့ဲတ့ဲ ဆရာတင်မောင်မြင့်က ဆရာတင့်ဇော်ကို Dawn ဘာသာပြန်ဖို့ တိုက်တွန်းခ့ဲတာမို့ ဘာသာပြန်ဖြစ်ခ့ဲပါတယ်ဆိုတ့ဲအကြောင်းလည်း အမှာစာမှာ ဖတ်ရပါတယ်။ 
-------------------------------------------------
မိုးသားလတ် @ ကိုဟေမာန်လှဝင်း
၂၀-၂-၂၀၁၉ (၂၂:၀၀) ရန်ကုန်


Publisher Name: လင်းလွန်းခင်စာအုပ်တိုက်

Publisher Phone Number: 01 293401, 09 220 1730


Related Books

Book Review Image

အိပ်ဇိုးဒပ် နိုင်ငံတစ်ခုမွေးဖွားခြင်း

မောင်မိုးသူ