Book Image

အာရှဝတ္ထုတိုများ

တင့်ဇော်

အာရှဝတ္ထုတိုများ

တင့်ဇော်
ရောင်းဈေး- ၅၀၀၀ ကျပ်
အိန္ဒိယ၊ အင်ဒိုချိုင်းနား၊ မလေးရှား၊ ထိုင်း၊ ဘင်္ဂလားဒေ့ရှ်၊ တရုတ်၊ သီရိလင်္ကာ၊ ဂျပန်၊ ဖိလစ်ပိုင်၊ ကက်ရှ်မီးယား၊ စင်ကာပူ၊ ကမ္ဘောဒီးယား၊ ကိုရီး ယား၊ ပါကစ္စတန်၊ ဗီယက်နမ်နှင့် လာအိုနိုင်ငံတို့၏ ဝတ္ထုတိုများကို စုစည်းထားသော စာအုပ်ဖြစ်သည်။ ဘာသာပြန်ဆိုသူ တင့်ဇော်က စံပယ်ဖြူ၊ မဟေသီ၊ ပေဖူးလွှာအစရှိသည့် မဂ္ဂဇင်းများတွင် ဖြန့်ကျက်ရေးသားခဲ့ပြီး အချို့ကို မည်သည့်မဂ္ဂဇင်းကမျှ ဖော်ပြခဲ့ ခြင်းမရှိသေးပေ။ စာအုပ်တွင် ဝတ္ထုတိုစုစုပေါင်း ၃၅ ပုဒ် ပါဝင်လာသည်။


မက္ကဆီကို ဝတ္ထုတိုဆရာ CARLOS FUENTES ၏ ‘ဝတ္ထုရှည်တစ်ပုဒ်ရေးဖို့ အိုလံပစ်တစ်သင်းစာလောက်လိုအပ်တယ်။ တစ်ယောက်တည်း ရေးတယ်ဆိုပေမယ့် ဝတ္ထုရှည်ရေးသမားဟာ ဆေးသုတ်ဆရာ ဖြစ်တယ်။ ပန်းချီဆရာဖြစ်တယ်။ မြို့တော်စီမံကိန်း ရေးဆွဲသူဖြစ်တယ်။ အတင်းအဖျင်းရေးတတ်တဲ့ ကော်လံစားသမားလည်း ဖြစ်တယ်။ ဖက်ရှင်ဒီဇိုင်းကျွမ်းကျင်သူ၊ ဗိသုကာပညာရှင်၊ နောက်ပြီး အိမ်တွင်းအလှဆင်သမား၊ ငြိမ်းချမ်းရေးအတွက် ဆောင်ရွက်ပေးတဲ့ တရားလွှတ်တော် တရားရေးဝန်ကြီး၊ အိမ်ခြံမြေအကျိုးဆောင်၊ သားဖွားဆရာမ၊ သုဘရာဇာ၊ မှော်ကဝေဆရာ၊ မြင့်မြတ်တဲ့ဘုန်းကြီး၊ အားလုံးကို တစ်ယောက်တည်းနဲ့ ဖြစ်နိုင်တယ်။ ဝတ္ထု တိုရေးသမားကတော့ သူနဲ့ဆန့်ကျင်ဘက်ပဲ။ အထီး တည်းတစ်ဦးတည်းသော ရေကြောင်းထိန်းသိမ်းရေးသမားပေါ့’ ဆိုသည့် အဖွင့်နိဒါန်း ဒဿနနှင့်အတူ ယခုစာအုပ်သည် ရသစာပေနှစ်ခြိုက်သူများ မလွတ်တမ်း ဖတ်ရှုရမည့်ဝတ္ထုတိုများဖြစ်သည်။ အာရှဒေသအတွင်း နိုင်ငံအသီးသီးရှိ စာရေးဆရာများက ရေးသားသော ဝတ္ထုတိုများဖြစ်၍ တစ်ပုဒ်နှင့်တစ်ပုဒ် အကြောင်းအရာ၊ အသွင်သဏ္ဌာန်မတူဘဲ သက်ဆိုင်ရာ နိုင်ငံများ၏ လူမှုဘဝ၊ နိုင်ငံရေး၊ စီးပွားရေးပုံရိပ်များ ကွဲပြားခြားနားနေမှုကို သီးခြားစီ ဖတ်ရှုရပါမည်။ နိုင်ငံရေး၊ စီးပွားရေးတည်ငြိမ်သော နိုင်ငံများ၌ ရုပ် ဝတ္ထုပစ္စည်းများ၏ ဖြားယောင်းမှုခံရပုံ ဖတ်ရသလို မတည်ငြိမ်သော နိုင်ငံများ၌ ကြုံတွေ့ရသည့် လူမျိုးရေး၊ ဘာသာရေးခွဲခြားမှုများအကြောင်း ဖတ်ရပါမည်။


အိန္ဒိယဝတ္ထုတို ‘လက်ဖက်ညွန့်တစ်သန်း’ တွင် လက်ဖက်စိုက်ခင်းအတွင်း ကျွန်များသဖွယ် လုပ်ကိုင်ရသူများ၏ဘဝကို ခြယ်မှုန်းရေးထားပြီး သနားစဖွယ်နာရေးကိစ္စ ပေါ်ပေါက်လာသော်လည်း ဝမ်းနည်း ကြေကွဲပုံမရ သာမန်ဖြစ်ရိုးဖြစ်စဉ်တစ်ခုလို ပေါ့ပြက်ပြက်သဘောထားနိုင်သည့်အကြောင်း ဖတ်ရပါမည်။ တရုတ်ဝတ္ထုတို ‘အင်တာနက်ပေးတဲ့ ပြဿနာ’တွင် မိသားစုဝမ်းရေးအတွက် နိုင်ငံရပ်ခြား၌ ပင်ပန်းဆင်းရဲစွာ ရှာဖွေလုပ်ကိုင်နေသော အစ်မကြီးနှင့် ဇာတိမြေတရုတ်ပြည်ရှိ ညီမငယ်တို့ကြား အင်တာနက်မှတစ် ဆင့်အပြန်အလှန်ဆက်သွယ်ပုံအကြောင်း ဖော်ပြထားရာ အဆုံးတွင် လိုချင်နေသော ကားတစ်စီးမရပါက ခန္ဓာကိုယ်ကို အင်တာနက်တင် ရောင်းမည်ဆိုသည့် ဖိအားကြောင့် ပင်ပင်ပန်းပန်း ရှာဖွေခဲ့ရသော ငွေများကို လွှဲပေးခဲ့ရသည့်အကြောင်း ဖတ်ရှုပါမည်။ ဂျပန်ဝတ္ထုတို ‘နွေနေ့လယ်ဧည့်သည်’ တွင် နွေလယ်တစ်နေ့ နေ့ခင်းဘက်၌ စိတ်ရောဂါအထူးကုဆရာဝန် အခန်းကို ရှေ့နေရုံးခန်းဟု မှားယွင်းယူဆပြီး ဝင်ရောက်တိုင်ပင်မိသော လူသတ်တရားခံ အမျိုးသမီးငယ်တစ်ဦး၏ အူကြောင်ကြောင်လုပ်ရပ်အပေါ် အခြေခံ၍ ထိုဆရာဝန်၏ ကြုံတွေ့မှုကို ဖွဲ့ဖွဲ့နွဲ့နွဲ့ရေး ထားရာ အကြောင်းအရာပိုင်းသာမက အတတ်ပညာအရပါ အားရစေသည့် ဝတ္ထုတစ်ပုဒ်ဖြစ်ပါသည်။ နိုင်ငံမဟုတ်သော်လည်း ထည့်သွင်းဖော်ပြထားသည့် ကက်ရှ်မီးယားဝတ္ထုတို ‘ရန်သူ’တွင် အိန္ဒိယနှင့် ပါကစ္စ တန်တို့ကြား ပဋိပက္ခဖြစ်စေသော ကက်ရှ်မီးယားဒေသရှိ ညီအစ်ကိုနှစ်ဦးကြား သံယောဇဉ်ကို ဒေသစွဲ၊ လူမျိုးစွဲများကြောင့် ဖြစ်ပေါ်လာသည့် အာဃာတတရားက တစ်ယောက်တစ်နေရာ ခြားပစ်လိုက်ကာ အဆုံး၌ ညီဖြစ်သူ သေဆုံးသွားသော်လည်း သွားရောက်ခွင့်မရသော အဖြစ်အပျက်ကို ရေးထားရာ ဖတ်ရသူ ကရုဏာသက်စေပါမည်။ ယခု ဝတ္ထုတိုများကို စာနဒီစာအုပ်တိုက်က တန်ဖိုုး ၅,၀၀၀ ကျပ်ဖြင့် ဖြန့်ချိပြီး အိမ်တိုင်ရာရောက် ဖတ်လိုသူများ ဖုန်း ၀၉- ၂၅၀၀၉၁၉၁၃ နှင့် Facebook/We Distribution သို့ ဆက်သွယ်မှာယူနိုင်ပါသည်။

ဖတ်ညွှန်း  - 7daydaily


Publisher Name: စာနဒီ စာအုပ်တိုက်

Publisher Address: အမှတ်-၉၇၃၊ ပျဉ်းမမြိုင်လမ်း၊ ၃၄ ရပ်ကွက်၊ မြောက်ဒဂုံမြို့နယ်၊ ရန်ကုန်မြို့။

Publisher Phone Number: 095071196, 095071197


Related Books

Book Review Image

ဆင်ကုန်သည်

မောင်ထွန်းသူ