Book Image

သံပုရာသီးတစ်တောင်းကြောင့် နှင့် နိုင်ငံတကာဝတ္ထုတိုများ

ဒေါက်တာခင်မောင်ညို

စာအုပ်အမည် - သံပုရာသီးတစ်တောင်းကြောင့် နှင့် နိုင်ငံတကာဝတ္ထုတိုများ

ဘာသာပြန် - ဒေါက်တာခင်မောင်ညို
မူရင်း - ကလောင်စုံ
စာအုပ်တိုက် - ဂလိုဘယ်အလင်း
ပုံနှိပ်မှတ်တမ်း - ၂၀၁၂၊ ဇွန်။ (ပထမအကြိမ်)
စာမျက်နှာ - ၁၈၆ (၁၃×၂၀.၅ စင်တီ)
တန်ဖိုး - ၁၈၀၀
မျက်နှာဖုံးဒီဇိုင်း - မောင်မောင်ထွေး


ဒီတစ်ခါ ဖတ်ဖြစ်သောစာအုပ်မှာ ဒေါက်တာခင်မောင်ညို၏ ဘာသာပြန်ဝတ္ထုတိုစာအုပ် ဖြစ်သည်။ စုစုပေါင်း ၁၆ ပုဒ်ပါသည့်အနက် ကျွန်တော်ကြိုက်တာ ၃ ပုဒ်ရှိသည်။ စာသမားမိတ်ဆွေ ကျွန်တော့်စီနီယာကြီး၏ စကားကို ကိုးကားရသော် တစ်အုပ်မှာ သုံးပုဒ်ကြိုက်ရင် ဝယ်ရတန်သတဲ့။ လက်ခံပါသည်။ သူကြိုက်လို့ သူရေးသောစာအကုန်လုံး ကိုယ်လိုက်ကြိုက်နိုင်ဖို့ဆိုတာ မဖြစ်နိုင်။ ဒီတော့ ဤမျှနှစ်သက်မိလျှင်ပင် တန်သည်ဟုသာ တွက်ရပါမည်။ ကျွန်တော်ကြိုက်သောသုံးပုဒ်ကို စာမြည်းကျွေးပါရစေ။


၁။ သံပုရာသီးတစ်တောင်းကြောင့်

မောရစ်ကိုဟင်နှင့် ဆေဗီယာကိုဟင်တို့မှာ ငွေကြေးပြည့်စုံသော လင်မယားများဖြစ်သည်။ လုပ်ငန်းကြီးလုပ်နေရသဖြင့် မိုးလင်းမှမိုးချုပ် အချိန်ကုန်နေသော မောရစ်ကြောင့် ဆေဗီယာ့မှာ အိမ်ထောင်ရေးသုခ မပြည့်စုံရပေ။ သည်မှာတွင် အိမ်မှာ တောက်တိုမယ်ရ လာကူလုပ်နေသော ဖာတမာ့ကို ဆေဗီယာ အားကျစိတ်ဝင်တော့သည်။ လင်ဖြစ်သူဟန်ဆင်က သူမကို တစ်ညတစ်မျိုး ချစ်မိုးစွေပုံတွေ ဖာတမာပြောသဖြင့်လည်း မောရစ်နှင့်နှိုင်းယှဉ်ကာ ဆေဗီယာ အားမလိုအားမရဖြစ်နေသည်။ တစ်နေ့တွင် ဒီအကြောင်းတွေကို မောရစ်အား ဆေဗီယာ ဖွင့်ပြောမိသည်။ မောရစ်က ဟန်ဆင့်ကို ခေါ်တွေ့သည်။ သူမအကြံအောင်တော့မည် ထင်ပြီး ဆေဗီယာပျော်နေသည်။ လက်တွေ့တွင် ဒီလိုမဟုတ်။ မောရစ်နှင့်တွေ့ပြီးနောက်မှာ ဟန်ဆင့်အကြောင်းတွေ ဖာတမာ လာမကြွားနိုင်တော့။ တစ်ခါတစ်ခါ အိပ်နေရင်းမှ သံပုရာသီးတွေ စပျစ်သီးတွေဟုလည်း အော်နေတတ်သည်ဆို၏။ သူမကိုလည်း အရင်လို ချစ်ပွဲမဝင်နိုင်တော့။ မောရစ် ဘာပြောလိုက်လို့ ဟန်ဆင်ပြောင်းလဲသွားတာလဲ ဆေဗီယာ သိချင်မိသည်။ မောရစ်ကရှင်းပြသည်။ ကလေးများသော ဟန်ဆင်တို့အိမ်ထောင်စု ချောင်လည်အောင် သံပုရာသီးရောင်းခိုင်းထားကြောင်း၊ တစ်ဆင့်တစ်ဆင့် စုဆောင်းပြီး သစ်သီးဆိုင်ထွက်နိုင်အောင် ကြိုးစားခိုင်းထားကြောင်း ဆို၏။ သံပုရာသီးတစ်တောင်းမျှနှင့်ပင် ဖာတမာ အခက်တွေ့နေရလျှင် ကုန်တိုက်များ၊ ကုမ္ပဏီများကို အုပ်ချုပ်နေရသောသူ့ကို ဆေဗီယာ နားလည်သင့်ပါကြောင်းဖြင့် ခပ်ရွှင်ရွှင် အဆုံးသတ်ထားလေ၏။

၂။ မုန်းစရာကောင်းလိုက်တဲ့ လူကြီးလူကောင်း

ဤဝတ္ထုတိုမှာ လှည့်ကွက်လေးဖြင့် အဆုံးသတ်ထားသည့်အတွက် ဇာတ်ကြောင်းပြောပြခြင်းအားဖြင့် မဖတ်ရသေးသူကို စာအရသာ မပျက်စေလိုပါ။ သည်တော့ မူရင်းစာရေးသူအကြောင်းကိုသာ မိတ်ဆက်ပြောပြပါရစေ။ ဤဝတ္ထုတို၏ ဖန်တီးရှင်မှာ သေမင်းနောက်သို့ခြေရာကောက်သော် (တက္ကသိုလ်နန္ဒမိတ်ပြန်၊ ဘဝတက္ကသိုလ်စာပေထုတ်) သို့မဟုတ် အိုဒက်ဆာဖိုင် (ထက်ဆွေပြန်၊ Bookhouse တိုက်ထုတ်)၊ ခွေးအ (ကျော်ထက်ထွန်းပြန်၊ ယဉ်မျိုးစာပေထုတ်) စသည့်ဝတ္ထုကြီးများကို ရေးသားခဲ့သူ စပိုင်နှင့် လျှို့ဝှက်သည်းဖို ဘတ်ဆဲလားစာရေးဆရာ Frederick Forsyth ပင်ဖြစ်ပါသည်။ အကြောင်းတိုက်ဆိုင်လျှင် ယင်းစာအုပ်များကို အညွှန်းရေးပါဦးမည်။

၃။ သတိထားဖို့တော့လိုတယ်

ဒီဇာတ်လမ်းကတော့ ဘယ်ခေတ်မှာဖြစ်ဖြစ် မှန်နေမည့် ဇာတ်လမ်းမျိုးပါပေ။ ဈေးလမ်းဆုံတွင် ယာဉ်တိုက်မှုဖြစ်သည်။ လမ်းထောင့်အကွယ်တွင် ရပ်ထားသောကားကို ထိုမြို့မှ ဘုရားဒကာသူဌေးကြီး၏ကားက ဝင်တိုက်မိသည်။ ရဲကြပ်ကြီးရောက်လာသည်တွင် ဘယ်သူအမှား၊ ဘယ်သူအမှန် ဆုံးဖြတ်ဖို့လုပ်သည်။ ရဲကြပ်ကြီးက ဘုရားဒကာဘက် လိုက်ချင်သည်။ သူတို့စခန်းကို ငွေလှူထားသည်မဟုတ်လား။ သို့သော် တစ်ဖက်ကားပိုင်ရှင်မှာ ရဲအုပ်ဖြစ်နိုင်ကြောင်း ပြောကြသောအခါ သူလေသံပြောင်းသွားသည်။ ရဲအုပ်က ဒီကားမျိုး စီးမှာမဟုတ်ဘူး ပြောကြပြန်တော့ သူ့စိတ်က ဘုရားဒကာဘက် ပြန်ယိုင်သည်။ ရဲအုပ်မစီးပေမဲ့ ရဲအုပ်အဖေစီးတာတွေ့တယ်ဆိုတော့ သူ့စကား ပြောင်းရပြန်သည်။ ဘက်ပင်းတတ်သော၊ အထက်ဖားတတ်သော လူတို့သဘောကို ကွက်ကွက်ကွင်းကွင်း ဖော်ပြနိုင်သည့် ဝတ္ထုပေတည်း။ ယင်းဇာတ်လမ်းကို ဆရာကြီး မောင်ထင်က ခွေးကိုက်မှှုအဖြစ် မှီငြမ်းပြုရေးဖူးသည် ထင်ပါ၏။ (လူအမှတ်မှားချင်လည်း မှားနိုင်ပါသည်။)

ကျန်သောဝတ္ထုများကိုတော့ စိတ်ဝင်စားလျှင် ဖတ်ကြည့်ကြဖို့ရန်သာ ရှိပါ၏။ လူတစ်ကိုယ်အကြိုက်တစ်မျိုး ဆိုကြသည်မဟုတ်လား။ ကျွန်တော်မကြိုက်တာနဲ့ပဲ မိတ်ဆွေလည်း ကြိုက်မည်မဟုတ်ဟု ကောက်ချက်ချရန်မှာ မဖြစ်နိုင်သည်သာတကား။
ကျော်စွာ
၁၄:၀၀ နာရီ
၁၄.၇.၂၀၁၇


Publisher Name: ဂလိုဘယ်အလင်းစာပေ

Publisher Address: အမှတ်(၂၉၇)၊အနော်ရထာလမ်း၊လမ်းမတော်မြို့နယ်၊ရန်ကုန်မြို့။ ဖုန်း - 01212300,098537549

Publisher Phone Number: 01212300,098537549


Related Books

Book Review Image

မြန်မာ့ဒီမိုကရေစီခရီးနှင့် သူရဦးတင်ဦး

တက္ကသိုလ်စိန်တင်
Book Review Image

စပွတ်နစ်ချစ်သည်း

ဒီနိုဗို