မူရင်းစာအုပ်အမည် - Hogwarts Library
မူရင်းစာရေးဆရာ - J. K. Rowling
ဘာသာပြန်စာအုပ်အမည် - ဟော့ဂ်ဝပ်မှော်ကျောင်းတော်၏ စာကြည့်တိုက်မှတ်တမ်း
ဘာသာပြန်စာရေးဆရာ - ကောင်းမြတ်လွန်းသော် (ဆေးတက္ကသိုလ်)
အမျိုးအစား - Fantasy
ထုတ်ဝေသည့်တိုက် - Phoenix Kingdom
ထုတ်ဝေသည့်ကာလ - 2017 Dec
ထုတ်ဝေသည့်အကြိမ် - ပထမအကြိမ်
တန်ဖိုး - 2700
စာမျက်နှာ - 174
--------------------------------------------

Fantasy စာအုပ်တွေကို ဘယ်တုန်းက စ ပြီး ဖတ်ခဲ့တာလည်းလို့ ပြန်တွေးမိတော့ ၆တန်းကျောင်းသားဘဝမှာ တရုတ်သိုင်းဝတ္ထုရှည်ကြီးတွေ ဖတ်ခဲ့တာက အဦးဆုံးပဲလို့ တွေးမိတယ်။ မာရှယ်အာ့တ်စာအုပ်တွေလို့ သတ်မှတ်လို့ရချင်ရပေမယ့် ဖန်တက်စီလို့ပြောရင်လည်း ကန့်ကွက်ရ ခက်ပါလိမ့်မယ်။ ပြောရရင် ဝူခုန်းဟာလည်း ဖန်တက်စီဇာတ်ကောင်ပါပဲ။ အဲ့တုန်းကတော့ ကိုယ်ဖတ်တာ၊ ကြည့်တာ ဖန်တက်စီလို့ မသိခဲ့ဘူးပေါ့လေ။
ဒီဘက်ခေတ် ဖန်တက်စီတွေထဲ အအောင်မြင်ဆုံးကတော့ အားလုံးသိကြတဲ့ ဟယ်ရီပေါ်တာဇာတ်လမ်းတွဲတွေပေါ့။ စာအုပ်ရော ရုပ်ရှင်မှာပါ မတရားအောင်မြင်တဲ့ ဟယ်ရီပေါ်တာဟာ ကိုယ်တို့လို စာသမားတွေအတွက်လည်း သဘောကျရတဲ့ စာအုပ်တွဲကြီးဖြစ်ခဲ့ရတယ်။ လေရူးသုန်သုန်ကို သဘောကျ၊ မြိုင်ကို အရမ်းကြိုက်၊ မြန်မာပြည်မြောက်ပိုင်း အသည်းစွဲတဲ့ ကိုယ်ဟာ ဟယ်ရီပေါ်တာကိုလည်း မက်မက်စက်စက် နှစ်ခြိုက်မိပါတယ်။ ဆယ်နှစ်လောက်အရွယ်ကနေ ၁၆ နှစ်လောက်အထိ ကလေးတွေဖတ်ရင် ကွစ်ဒစ်ပြိုင်ပွဲတွေ၊ မှော်တိုက်ခိုက်တာတွေ ... စသဖြင့် အရမ်းကြိုက်ကြတာမျိုးဖြစ်ပေမယ့် ကိုယ်တို့အရွယ်ဖတ်တဲ့အခါ အဲ့ဒါတွေထက် ဂျေကေရိုးလင်းရဲ့ ဇာတ်ကိုတည်ဆောက်မှု၊ ဇာတ်လမ်းကွင်းဆက် ချိတ်ဆက်မှု၊ ဇာတ်ကောင်မွေးမှုတွေကို လေ့လာဖတ်ရင်း တော်တော်စာရေးတတ်တဲ့ မိန်းမကြီးပါလားလို့ လေးစားမိရင်း အကြိုက်ဆုံးစာအုပ် စာရင်းတွေထဲ ဝင်ခဲ့ရပါတယ်။
ခုလည်း စာအရေးကောင်း၊ ဇာတ်ကောင်မွေးတာတော်၊ ဇာတ်လမ်းတည်ဆောက်တာကျွမ်းကျင်တဲ့ ဂျေကေရိုးလင်းရဲ့ စာအုပ်တစ်အုပ်ကို ဖတ်ခဲ့ရတယ်။ J.K Rowling ရေး Hogwarts Library ကို "ဟော့ဝပ်မှော်ကျောင်းတော်၏ စာကြည့်တိုက်မှတ်တမ်း" ဆိုတဲ့အမည်နဲ့ ကောင်းမြတ်လွန်းသော် ဘာသာပြန်တဲ့ စာအုပ်မှာ ဝတ္ထုတိုစာအုပ် (၃)အုပ်ကို ဖတ်ရပါမယ်။
(၁) ကွဒ်ဒစ်ချ်သမိုင်းကြောင်း
(၂) မှော်သတ္တဝါဆန်းများ ရှာဖွေခြင်း
(၃) စာဆိုတော်ဘီဒဲလ်၏ ပုံပြင်များ ဆိုပြီး (၃) မျိုးတွေ့ရမယ်။
(၁) ကွစ်ဒစ်ချ်သမိုင်းကြောင်း - ဟယ်ရီပေါ်တာဖန် (အခြားအမည်) ပေါ်တာဟက်တွေ အားလုံး ကွစ်ဒစ်ကစားပွဲကို သဘောကျမှာပါ။ ဒီစာအုပ်ငယ်ထဲမှာ မှော်တံမြက်စည်းပျံများ ဖွံ့ဖြိုးလာခြင်း၊ ရှေးခေတ်တံမြက်စည်းပျံသုံး ကစားပွဲများ၊ ရွှေဘောလုံးပျံ စတင်ပါဝင်လာခြင်း၊ မက်ဂဲလ်များ မမြင်နိုင်စေရန် ကြိုတင်ကာကွယ်ထားမှုများ၊ ဆယ့်လေးရာစုမှ စ၍ ကွစ်ဒစ်ချ်နှင့် ပက်သက်သော အပြောင်းအလဲများ၊ ယနေ့ကွစ်ဒစ်ချ် ... တို့အပြင် အခြားအခန်းတွေနဲ့ အခန်းခေါင်းစဉ်ခွဲပေါင်း (၁၀)ခန်းနဲ့ ပေါ်တာဟက်တို့ သဘောကျတဲ့ ကွစ်ဒစ်ချ်အကြောင်းကို ရေးပြထားပါတယ်။
(၂) မှော်သတ္တဝါဆန်းများ ရှာဖွေခြင်း - ဒီစာအုပ်ငယ်ဟာ ၂၀၁၇ အပြင်အဆင်အသစ်ဖြစ်ရုံမက နူ့စကာမန်ဒါရဲ့ မှတ်စုစာအုပ်ပုံစံ ဖြစ်လာပါတယ်။ မှော်သတ္တဝါတွေရဲ့ ပုံတွေကို ဂျေကေရိုးလင်းရဲ့ လက်ရာတွေနဲ့ တွေ့ရမယ်။ ဒီစာအုပ်ငယ်ထဲက အခန်းတွေရဲ့အထဲက မှော်သတ္တဝါဆန်းများ၏ မှတ်တမ်းအခန်းဟာ အတော့်ကို သဘောကျစရာပါ။ ခုနကရေးထားသလို ဂျေကေရိုးလင်းလက်ရာနဲ့ မှော်သတ္တဝါတွေကို တစ်ကောင်ခြင်းစီ ရှင်းပြထားတာမို့ စိတ်ကျေနပ်စရာပါပဲ။
(၃) စာဆိုတော်ဘီဒဲလ်၏ ပုံပြင်များ - အရင်ဆုံးပြောစရာရှိတာကတော့ ဒီစာအုပ်ထဲက ကိုယ့်အကြိုက်ဆုံးစာအုပ်ငယ်ပါပဲ။ ခုန်ပေါက်နေသော အိုးနှင့် စုန်းကဝေ၊ ကံကောင်းစေသော ရေပန်း၊ အမွှေးထူသော နှလုံးသား၊ ဘာဘစ်တီရက်ဘစ်တီနှင့် ရယ်မောတတ်သော သစ်ငုတ်၊ ညီအစ်ကို(၃)ယောက်နှင့် သေမင်း ဆိုပြီး ပုံပြင် (၅)ပုဒ်မှာ ပေါ်တာဟက်တွေအနေနဲ့ နောက်ဆုံးပုံပြင်ကို ကောင်းကောင်းကြီး ရင်းနှီးနေမှာပါ။ ဒီစာအုပ်ငယ်မှာ ပုံပြင်တွေကို ဖတ်ရရုံသာမက စာအရေးကောင်းလှတဲ့ ဂျေကေရိုးလင်းက အဲဘတ်စ်ဒမ်ဘယ်ဒိုးရဲ့မှတ်စုဆိုပြီး ပုံပြင်တစ်ပုဒ်တိုင်းစီမှာ ပရိသတ်နဲ့ မတူတဲ့ အမြင်တွေကို မှတ်စုပြန်ထုတ်ပေးထားတာ သဘောကျစရာကောင်းလွန်းပါတယ်။
Rating - 7/10
----------------------------------
ဖတ်ညွှန်းရေးသူ - ဟေမာန်လှဝင်း @ မိုးသားလတ်
7.Jan.2018 (14:21)
No automatic alt text available.

Publisher Name: Phoenix Kingdom