တန်ဖိုး- ၅၀၀၀ ကျပ်

၁ ရက်နေ့၊မတ်လ၊၂၀၁၈ တွင်ထုတ်ဝေပါသည်။

ရှေ့ရပ်စာပေ

အခန်း (၁)၊တိုက် (၃၅)၊ရန်နိုင်လမ်းသွယ်(၁၃)(၄) ရပ်ကွက်၊ရန်ကင်းမြို့နယ်၊ရန်ကုန်မြို့။

............:.............................................

မြန်မာပညာရပ်များ (၃) စာစဉ်အနေဖြင့် သုံးအုပ်မြောက် ထုတ်ဝေနိုင်ခဲ့ခြင်းဖြစ်သည်။ မြန်မာပညာရပ်များ (၁) နှင့် (၂) စာအုပ်များတွင် ပညာရှင်များစုပေါင်းရေးထားသော စာတမ်းများကို ပေါင်းချုပ်အဖြစ် ထုတ်ခဲ့သည်။ ယခု အမှတ်စဉ် (၃) စာအုပ်တွင် စာရေးသူ တစ်ဦးတည်းက ပြုစုထားသော အကြောင်းအရာကောင်း တစ်ခုတည်းကို ဖတ်ရှုရပါသည်။

မြန်မာပညာရပ်များစာစောင်ကို မြန်မာပညာရပ်များအဖွဲ့က ထုတ်ဝေခြင်းဖြစ်ပါသည်။ မြန်မာ ပညာရပ်များအဖွဲ့ ဆိုသဖြင့် အစိုးရအဖွဲ့အစည်းကြီး တစ်ခုမဟုတ်။ တက္ကသိုလ်ရှိ ဆရာ၊ ဆရာမများကို အဖွဲ့လေးတစ်ဖွဲ့ ဖွဲ့ကာ ငွေများစုဆောင်းပြီး မြန်မာ့စာပေလောကအတွက် လိုအပ်ချက်များကို ဖြည့်ဆည်းပေးနေခြင်းဖြစ်ကြောင်း သိရသဖြင့် ပိုပြီး စိတ်မကောင်းဖြစ်မိသည်။ 

ပညာရပ်ဆိုင်ရာ စာတမ်းများကို တက္ကသိုလ်အဖွဲ့အစည်းများက အားပေးထုတ်ဝေလျှင် မည်မျှတွင်ကျယ်မည် နည်း။ ယခုတော့ အလွန်တန်ဖိုးရှိသော ပညာရှင်များ၏ စာတမ်းများသည် လူဦးရေ သန်း ၅၀ ကျော်ရှိသော နိုင်ငံတွင် အုပ်ရေ ၅၀၀ သာ ထုတ်နိုင်ခဲ့သည်ဆိုသောကြောင့် ပိုပြီးစိတ်မကောင်းဖြစ်မိသည်။ 

လူတွေကို စာမဖတ်ဘူးဟု ပြောကြသည်။ ဖတ်စရာစာအုပ်စာပေတွေကို ဈေးနှုန်းသက်သာစွာဖြင့် ပေါပေါများများ ဖြန့်ချိပေးနိုင်မှ လူတွေစာပိုဖတ်လာနိုင်ပါလိမ့်မည်။ တက္ကသိုလ်ကြီးများတွင်ပင် ကျောင်းသား များ ဈေးနှုန်းသက်သာစွာ ဝယ်ဖတ်နိုင်ရန် စီစဉ်ပေးနိုင်ပါက မည်မျှကောင်းမည်နည်း။ ဆရာတွေက စုပေါင်းပြီး စာပေစိတ်ဓာတ်ဖြင့် အရှုံးခံထုတ်နိုင်ခြင်းကိုပင် ကျေးဇူးတင်ပါသည်။ မည်သို့ဆိုစေ လူ ၅၀၀ ခန့်လက်ထဲတော့ စာအုပ်တွေရောက်စေလိမ့်မည်။

စာရေးသူ၏ ကိုယ်ရေးအကျဉ်းမပါ။ ဒေါက်တာဘွဲ့ရထားသော်လည်း (အာကာမိုးသူ) ဟုသာ တုံးတိတိ တပ်ထားသည်။ သို့သော် ပြုစုစီစဉ်ထားပုံကြည့်ကတည်းက သာမန်စာရေးသူမဟုတ်။ ပညာရှင်ဆန်စွာ လုပ်ဆောင်ထားသည့် လက်ရာကိုတွေ့မြင်ရသည်။ 

စာရေးသူက နိဒါန်းတွင်

“ယခုဖတ်ရှုနေသည့် ဗောဓိသတၳုပ္ပတ္တိကထာကျမ်းသည် မြန်မာနိုင်ငံထေရဝါဒီတို့ရရှိ လက်ခံယုံကြည်နေကြ သည့် ဗုဒ္ဓဝင်ကို မည်သည့်ဗုဒ္ဓဝင်ကျမ်းများမှ အများစု လက်ခံရရှိခဲ့ကြောင်း ဝေဖန်လေ့လာဆန်းစစ်သုံးသပ်ထား သည်ကို တွေ့နိုင်ပါသည်။ ထို့အပြင် မဟာယာနဗုဒ္ဓဝင်နှင့် အတန်ငယ်စိမ်းနေသည့် ထေရဝါဒီဗုဒ္ဓဝင် သုတေသီများအဖို့ များစွာ အတွေးပွားဖွယ်ရာ လမ်းစကို ဤဗောဓိသတၳုပ္ပတ္တိကထာကျမ်းတွင် ချန်ထားခဲ့ သည်ကို လေ့လာတွေ့ရှိနိုင်ပါသည်။ ဤကျမ်းသည် မဟာယာနဗုဒ္ဓဝင်များဖြစ်သည့် လလိတဝိတ္တာရကျမ်း၊ မဟာ ဝတၳုကျမ်းလာ ဖော်ပြပုံများနှင့်၊ မြန်မာဗုဒ္ဓဝင်များ၏ ကွဲပြားနေမှု၊ တူညီနေမှုအပါအဝင်၊ ပိဋကတ်တော်များနှင့်ပါ မည်မျှ ကွဲလွဲကြောင်း လေ့လာသည့် ကျမ်းတစ်ခုဖြစ်ပါသည်” ဟုဆိုထားသည်။ 

စာအုပ်ကို အခန်းကြီး (၅) ခန်းနှင့် ပြုစုထားပါသည်။ အခန်း (၁) တွင် ဘုရားဖြစ်ရန်အတွက် နတ်ဗြဟ္မာတို့က တောင်းပန်ခန်းဖြစ်သည်။ ကဏ္႑ပေါင်း (၁၀) ခုဖြင့်တင်ပြသည်။ အခန်း (၂) တွင် ဘုရားရှင်ဖွားတော်မူခန်းကို ပြဆိုသည်။ ကဏ္႑ပေါင်း (၁၇) ခုဖြစ်သည်။ အခန်း (၃) သည် ဗောဓိသတ္တ၏နိမိတ်ဖတ်ကြားခန်းဖြစ်ပြီး ကဏ္႑ပေါင်း (၄) ခုပါသည်။ အခန်း (၄) သည် ဗောဓိသတ္တတောထွက်ခန်းဖြစ်ပြီး၊ ကဏ္႑ပေါင်း (၁၇) ခုပါသည်။ အခန်း (၅) သည် ဒုက္ကရစရိယကျင့်ကြံတော်မူခန်းဖြစ်ပြီး ကဏ္႑ပေါင်း (၁၀) ခုပါသည်။

စာရေးသူက “မာရ်နတ်ကိုအောင်တော်မူခြင်း” တွင် စာကိုရပ်ထားသည်။ ဆန့်တငင်ငင်ဖြစ်ကာကျန်ခဲ့သည်။ ဤစာအုပ်သည် အများသူငါရေးသလို ဘုရားလောင်း၏ ဗုဒ္ဒုပ္ပတ္တိမျိုးလည်းမဟုတ်။ အကြောင်းအရာ အချက် အလက်တိုင်းကို ဆန်းစစ်ဝေဖန်မှုများကြောင့် မသိသေးသည်ကိုသိသည်။ နားမလည်သေးသည်ကို နားလည် လိုက်သည်။ တွေးဆစရာတွေကို တွေးဆနိုင်စေရန် တန်းလန်းဖြစ်စေခဲ့သည်။ 

စိတ်ဝင်စားစရာကောင်းသည့်အခန်းမှာ “ဖွားတော်မူခန်း” ဖြစ်ပါသည်။ ဘုရားရှင် ဖွားတော်မူသော ကာလ၊ နက္ခတ်ခုနှစ်များကို ယနေ့တိုင် အငြင်းပွားနေဆဲဖြစ်သည်။ သို့သော်စာရေးသူက

“ဗုဒ္ဓဝင်များတွင် ဖော်ပြသောနှစ်အမည်များသည် သာသနာနှစ်ကို မူတည်၍တွက်သော နှစ်အမည်လော၊ မြန်မာသက္ကရာဇ်ကိုပင် မူတည်၍တွက်ချက်သော နှစ်အမည်လောဟူသည်ကို စစ်ဆေးသင့်ပါသည်” ဟုထောက်ပြထားသည်။ ဤစာအုပ် အခန်းတိုင်းတွင် အစဉ်အလာကိုင်စွဲထားသည့် အကြောင်းအရာများကို ထပ်ဆင့်တွေးစရာများဖြစ်စေခြင်းက ထူးခြားသည်ဟုဆိုရမည်။

အလောင်းတော်ကို ဖွားတော်မူစဉ် မယ်တော်မှီတွယ်ကာကိုင်ခဲ့သောအပင်ကိုင်းသည် ပါဠိမှတ်တမ်းများအရ အင်ကြင်းပင်အကိုင်းဟုဆိုသည်။ မဟာဝတၳုကျမ်းတွင် ညောင်ကြတ်ပင်ဟု ဖော်ပြသည်။ လလိတဝိတ္တာရ ကျမ်းတွင် ပလချပင်ဟုဆိုသည်။ သက္ကတအဘိဓာန်တွင် ပလချဆိုသည်မှာ ပါဠိဘာသာအားဖြင့် ပိလက္ခဖြစ်ပြီး ညောင်ကြတ်ပင်ဟုပင်ဆိုလိုသည်။ ထို့ကြောင့် မယ်တော်မာယာ ကိုင်ထားသည့် ကိုင်းသည် ညောင်ကြတ်ပင် ကိုင်းလား၊ အင်ကြင်းပင်ကိုင်းလား စဉ်းစားစရာဖြစ်သည်။ မြန်မာ့ပန်းချီများကတော့ အင်ကြင်းတောတွင် အင်ကြင်းကိုင်းတွေချည်းဆွဲကြသည်။ စဉ်းစား စရာတွေဖြစ်ကုန်သည်။ (ဘုရားလောင်းဖွားမြင်တော်မူပုံ)

ဗုဒ္ဓဝင်ဆိုင်ရာ သုတေသီများက ဗုဒ္ဓသည် ဘီစီ ၆၂၄ တွင် မွေးဖွားသည်ဟု လက်ခံကြပါသည်။ မဟာသက္ကရာဇ် ၆၈ ခု၊ ကဆုန်လပြည့် သောကြာနေ့ဟု ထေရဝါဒီ ဗုဒ္ဓဝင်ဆရာအများစုက လက်ခံကြသည်။ ဗုဒ္ဓ၏ ဖွားမြင် ရက်ကို မြန်မာပညာရှင်များ၏ စနစ်ကျသည့် တွက်ချက်ပုံစနစ်များကိုလည်း “ဗောဓိသတ္တ ဖွားမြင်တော်မူသော နေရာနှင့် မွေးသက္ကရာဇ်ခုနှစ်” ကဏ္႑တွင်လေ့လာနိုင်သည်။ 

ဗောဓိသတ္တတရားအားထုတ်ရာတွင် မာရ်နတ်တွေကနှောက်ယှက်ဟန့်တားကြသည်။ မာရ်စစ်သည်တို့သည် အကောင်အထည်ရှိသော စစ်သည်များလော။ မာရ်စစ်သည်ဆိုသည်မှာ စိတ္တဇနာမ် အမျိုးအစားဖြင့် တွေ့ရပြီး ကိုယ်ကျင့်သီလဖြစ်သည်။ ဗောဓိသတ္တ ရင်ဆိုင်တိုက်ခိုက်ရသည့် မာရ်စစ်သည်မှာ အကောင်အထည်သဘော မဆောင်ဘဲ ကျင့်ကြံအားထုတ်မှု၌ စိတ်ဓာတ်ပျက်ပြားစေရန် အနှောင့်အယှက် အဟန့်အတားများပင်ဖြစ်သည်။ အတွင်းစိတ်သဘောနှင့် စိတ်ဓာတ်ဆိုင်ရာ အခြေအနေများပင်ဖြစ်သည်ဟု “ပိဋကတ်တော်မှ မာရ်စစ်သည်များ” တွင် ဆွေးနွေးပြထားသည်မှာ အစဉ်အလာသဘောကို ဖောက်ထွက်တွေးခြင်းပင်။

ဤစာအုပ်သည် အစဉ်အလာ ကထာမျိုးမဟုတ်။ ဖတ်ကောင်းအောင် ရေးဖွဲ့ထားသည်လည်းမဟုတ်။ ဖတ်နေရင်း ညွှန်းဆိုချက်များကို ရှာဖွေချင်၊ ထောက်ပြထားသည်များကို ဆက်ပြီးလေ့လာချင်သဖြင့် မှတ်သား၊ ကိုးကားစရာ ကျမ်းညွှန်းများကို ရှာဖတ်လိုသူများအတွက်မူ ကျမ်းကောင်းတစ်ခုဖြစ်သည်ဟု ဆိုရမည်။

ပညာကိုလိုလားပြီး သုတတိုးပွား ဉာဏ်ဆင့်ပွားစေရန် ကြိုးစားအားထုတ်ထားသည်ဆိုသော်လည်း ပိုပြီး အသိများရန် ကျောင်းသားကျောင်းသူများ အဖတ်များစေလိုပါသည်။ ပညာရှင်တို့အားထုတ်ထားသည်ကို ပညာရပ်ဝန်းက ပညာရှင်များပင် မသိမည်အား စိုးရိမ်ပူပန်မိသည်။ 

စာကြမ်းပိုး

Myanmar-Educo