မျှဝေတဲ့စိတ်ကလေးနဲ့စာဖတ်ခြင်း
***********************************
လူဆိုတာ အရသာ သိမှ စွဲလမ်း ကြတယ်လို့ ဆိုပါတယ်

အရသာမသိတဲ့အရာကို စွဲလမ်းစေချင်ရင်  အရသာသိတဲ့သူက ပြောပြမှ ရှင်းပြမှသာ စမ်းသုံးကြည့်ကြလေ့ရှိပါတယ်

အစားအစာ၊အသုံးအဆောင်၊ခရီးသွားတာမျိုးတွေကအစ Facebook ပေါ်မှာ အပြိုင်အဆိုင် ပုံစံမျိုးစုံ ဆွဲ​ဆောင်ပြီး တင်နေကြတဲ့ခေတ်ကြီးထဲမှာ စာဖတ်ဖို့အတွက် ကြိုက်တဲ့စာဖတ် အကျိုးရှိတယ်ဆိုတာမျိုးထက်စာရင် ဖတ်စေချင်တဲ့စာအုပ်အကြောင်းလေးတွေကိုတော့ အညွှန်းလေးပြောပြသင့်တယ်လို့ ထင်ပါတယ်

ကျွန်တော်အနေနဲ့ညွှန်းဆိုချင်တဲ့စာအုပ်က​တော့ ဆရာလေးကိုတင်ရဲ့"စာအုပ်မိတ်ဆက်နှင့်ဖတ်ညွှန်းတိုတိုများ" ဘဲဖြစ်ပါတယ်
ဆရာက စာအုပ် ၇၅ အုပ်တိတိ ဖတ်ညွှန်းရေးသားပြီး တိုတိုနဲ့စာအုပ်တစ်အုပ်ချင်းစီရဲ့အကြောင်းကိုခြုံငုံမိအောင်ရေးသားထားတဲ့အတွက် စာဖတ်သမားတိုင်း အချိန်မကုန်ဘဲ ဖတ်ချင်တဲ့စာအုပ်အကြောင်းသိနိုင်မှာဖြစ်ပါတယ် ဒီလိုစာအုပ်တွေဟာ နောက်တစ်ကြိမ်ထပ်ထုတ်ဖို့ မလွယ်တာကြောင့် အပိုင်ဝယ်ထားသင့်တဲ့ စာအုပ်တစ်အုပ်လို့ဆိုချင်ပါတယ်

ဆရာလေးကိုတင်က စာအုပ်ဖတ်ညွှန်းနဲ့ပတ်သက်ပြီး သူ့သဘောထားကို တင်ပြထားပုံက

(ယနေ့ ပစ္စုပ္ပန်ကာလဖြစ်ပါသည်။မနက်ဖြန်ဆိုလျှင် အနာဂတ်ကာလဖြစ်သည်။ယနေ့ကာလတွင် ထွက်ရှိလာကြသော စာအုပ်များအကြောင်းကို မဂ္ဂဇင်းများ (မဟေသီ၊မြန်မာ့ဓန၊Beauty၊သရဖူ၊ဟန်သစ်၊ချယ်ရီ)နှင်ဂျာနယ်များ (စျေးကွက်၊အကျိုးဆောင်၊ယနေ့ခေတ်၊သတင်းလွှာ၊သဘင်အနုပညာ)တွင် ဖတ်ရှုတွေ့မြင်နေရခြင်းသည် မနက်ဖြန်ဆိုသောကာလတစ်ခု၌ အတိတ်၏ကောင်းမြတ်သော အကျိုးရလဒ်ကို ပြန်လည်ရှာဖွေတွေ့ရှိကြရမည်ဖြစ်ပါသည်။

အတိတ်၊ပစ္စုပ္ပန်၊အနာဂတ် ကာလသုံးပါးတွင် ဖြစ်တည်ရှင်သန်နေသော စာအုပ်များအကြောင်း အညွှန်းပြုရေးသားနေမှသာ စာအုပ်စာပေ လူ့မိတ်ဆွေဆိုသော စာအုပ်စာတမ်းများသည် စာကြည့်တိုက်များ၊စာအုပ်အသင်းများ၊စာဖတ်ပရိသတ်၏ ကိုယ်ပိုင်စာအုပ်စင်များ၌ထာဝရရှင်သန်ဝေဆာနေတော့မည်ဖြစ်ပါသည်ဟူ၍။)

ဖတ်ညွှန်းရေးသူ စာရေးဆရာရဲ့သဘောထားကိုမြင်ရတော့ ဖတ်ညွှန်းရေးသူကိုလည်း စာကြည့်တိုက်မှုးတစ်ယောက်လို မြင်မိပါတယ် စာကြည့်တိုက်ဆောင်ပုဒ်တစ်ခုဖြစ်တဲ့ "ပညာရှာသူ ဒို့ဝိုင်းကူ" ဆိုတဲ့စာသားလေးလိုပါဘဲ မျှဝေတတ်တဲ့စိတ်ကလေးကို ခံစားမိပါရဲ့။

ဖြည့်စွတ်ပြောရရင် ဆရာပြောတဲ့ မဂ္ဂဇင်း၊ဂျာနယ်တွေဟာ တဖြုတ်ဖြုတ်နဲ့မထွက်နိုင်ဘဲ ပျောက်ကွယ်ကုန်ကြပါပြီ သို့သော်လည်း စာအုပ်တွေကတော့ အပြိုင်အဆိုင် ထွက်နေကြတုန်းပါဘဲ

ဒီနေရာမှာ အဓိကပြောချင်တာက စာကြည့်တိုက်မှုးတွေပါ စာကြည့်တိုက်က စာအုပ်​တွေရဲ့အကြောင်း သိဖို့ စာအုပ်အကုန်ဖတ်နိုင်ဖို့မလွယ်ကူပေမယ့် စာအုပ်အဖြစ်ထွက်ထားတဲ့ ဖတ်ညွှန်းစာအုပ်တွေ၊Facebook ပေါ်က စာအုပ်ဖတ်ညွှန်းဂရုတွေထဲက ဖတ်ညွှန်းလောက်တော့ ဖတ်ကြည့် ကြဖို့ လိုပါလိမ့်မယ်
ကျွန်တော်ရဲ့Save The Library App ထဲမှာ ဖတ်ညွှန်းရေးသားသူတွေရဲ့စာတွေတင်မကဘဲ ဖတ်ညွှန်းဗီဒီယို ရိုက်ကူးထားတာတွေကိုပါ တင်ပေးထားပါတယ် လေ့လာနိုင်အောင် Link လေးပါတင်ပေးလိုက်ပါတယ်
https://play.google.com/store/apps/details?id=net.myanmarlinks.savethelibrary

#O Soe

Publisher Name: စိတ်ကူးချိုချို စာပေ

Publisher Address: ၉(က)၊ ၁၆၄ လမ်း၊ တာမွေ၊ ရန်ကုန်မြို့။ ဖုန်း - ၀၁၅၄၆၈၄၅

Publisher Phone Number: 01546845