ဘာသာပြန်သူ - ဒီနိုဗို

မူရင်းစာရေးသူ - ပေါလ်အော်စတာ

စာအုပ်တန်ဖိုး - ၂၀၀၀ ကျပ်

စာမျက်နှာ - ၁၄၇ မျက်နှာ 

ထုတ်ဝေသူ - စွယ်တော်စာပေ (ဦးတင်အောင်ကျော်၊ စွယ်တော်ပုံနှိပ်တိုက်၊ အမှတ်၁၄၇၊ ၅၁ လမ်း အထက်၊ ၁၀ရပ်ကွက်၊ ပုဇွန်တောင်မြို့နယ်။ 

ဖြန်ချိရေး - ၀၉ ၃၂၅၀ ၂၈၁၁၈၊ ၀၉  ၃၃၀၁ ၃၀၂၃၊ ၀၉ ၅၀၁၄ ၈၁၇။ 

ပထမအကြိမ်၊ အောက်တိုဘာလ၊ ၂၀၁၄ ခုနှစ်။ 

ပေါလ်အော်စတာနဲ့ ဒီနိုဗိုကို ကြိုက်ပြီလို့ ဆုံးဖြတ်မိတဲ့ စာအုပ်တစ်အုပ်လို့ ပြောရမယ်။ ဒီနိုဗိုကို ဖတ်ဖူးပါတယ်။ ပေါလ်အော်စတာကို မှန်သားနန်းတော် မရလို့ တစ္ဆေနဲ့ ပိတ်ထားတဲ့ အခန်းကို အလှထိုင်ကြည့်နေရတာ လပေါင်းများစွာပဲ။ မှန်သားနန်းတော်ကို ဖတ်တုန်းမှာတော့ ပထမဆုံးတစ်အုပ်မို့ ပေါလ်အော်စတာကို မနည်းလိုက်ရ၊ ဒီနိုဗိုကို အမှတ်တမဲ့နဲ့ ကျန်ရစ်ပေါ့။ တစ္ဆေမှာ ကိုယ့်ရဲ့ အမြင်ကို လုံးဝ ပြောင်းသွားစေတယ်။ 

သူတို့နှစ်ယောက်လုံးကို ကိုယ်ရူးသွတ်သွားမိတဲ့အထိ ကြိုက်မိတယ်။ အပြာက အလွတ်စုံတောက်၊ အမည်းက အပြာလိုက်ကြည့်ရမယ့် သူ၊ အဖြူက အပြာကို စေခိုင်းသူ။ ဒီကြားထဲမှာ တစ်ခြားအရောင်တွေကလည်း ရှိလေရဲ့။ အပြာဟာ အမည်းကို စောင့်ကြည့်ဖို့ သူ့ရဲ့ ကိုယ်ပိုင်ဘဝကို လုံးဝနီးပါး စွန့်လွတ်ခဲ့ရတယ်။ အဆုံးစွန်ဆုံး သူ့ရဲ့ ဇနီးလောင်းကိုပါ ချန်ရစ်ထားခဲ့ရတယ်။ 

အမည်းရဲ့ မျက်နှာချင်းဆိုင် အခန်းမှာနေ၊ အမည်းလုပ်သမျှကို ၂၄နာရီစောင့်ကြည့်ရင်း သူ့ရဲ့ ဘဝတစ်ခုလုံး တစ်စတစ်စပျောက်ဆုံးလို့သွား။ အမည်းက တစ်ရက်လုံး စာထိုင်ရေးနေ၊ အပြင်ကိုထွက်ချင်မှ ထွက်၊ တစ်နှစ်ပတ်လုံးလုံး မိန်းမတစ်ယောက်နဲ့ နေ့လည်စာစားဖို့ ဆိုင်တစ်ဆိုင်မှာ တွေ့တာကလွဲလို့ ဘယ်သူနဲ့မှ စကားမပြော၊ တစ်ရက်တော့ လမ်းပတ်လျှောက်ရင်း စာအုပ်ဆိုင်တစ်ဆိုင်ကို ဝင်တယ်။ အပြာက အမည်းရေးတယ်လို့ ထင်ရတဲ့ စာအုပ်တစ်အုပ်ကို ဝယ်တယ်။ နေထိုင်ရာ အခန်းကို အသီးသီးပြန်လာတယ်။ 

အပြာက အမည်းကို စုံစမ်းဖို့ သူတောင်းစားပုံ၊ ရွဲပစ္စည်းရောင်းသူ ပုံစံတွေ ရုပ်ဖျက်ခဲ့။ လောက်လောက်လျားလျား အဖြေကမရ။ တစ်ရက်မှာ အပြာက သူ့ဇနီးလောင်းကို တစ်ခြားအမျိုးသားတစ်ဦးနဲ့ တွဲသွားတာကို တည့်တည့်တွေ့မိ။ အပြာဟာ သူ့ဘဝပျောက်ဆုံးသွားတဲ့အထိ အမည်းနောက်ကို သဲကြီးမဲကြီးလိုက်နေမိတာ။ အပြာရဲ့ ဘဝဟာ အမည်းပဲကျန်တော့လောက်အောင် ဒီအမှုနောက်ကို လိုက်ခဲ့။ တစ်ဖြည်းဖြည်း အမည်းနဲ့ အပြာကို အမှုလိုက်ဖို့ ငှားထားတဲ့ အဖြူဟာ တစ်ယောက်တည်းလားလို့ သံသယတွေများရ။ 

အမည်းနာမည်နဲ့ ရေးထားတဲ့ စာအုပ်ဟာ အပြာအတွက် ခက်ခဲလွန်းလှတယ်။ ဒါပေမယ့် စာအုပ်တစ်အုပ်ရဲ့ စေရာကို လိုက်ရတဲ့အခါ၊ စာအုပ်က သင့်ဘဝကို မောင်းနှင်သွားတဲ့အခါ၊ စာအုပ်က အရှင်သခင်ဖြစ်သွားတဲ့အခါ…. ဒီစာအုပ်ဟာ၊ ဒီစာအုပ်ထဲက စာကြောင်းတစ်ကြောင်းဟာ သင့်ဘဝကို ပြောင်းလဲသွားဖို့ အကြောင်းအရာတစ်ခုလား။ စာအုပ်ဟာ လူကိုပြောင်းလဲစေတာလား၊ စာဖတ်သူရဲ့ ဖတ်ရှုနားလည်မှုဟာ လူကိုပြောင်းလဲစေလားတော့ ကိုယ်တို့ စာကြမ်းပိုးတွေက ပိုသိချင်သိမယ်။ 

ဘာပဲဖြစ်ဖြစ် ကိုယ်ပြောလိုတာက ပေါလ်အော်စကာဟာ မတူညီတဲ့ စာရေးသူတစ်ယောက်၊ သူဟာ ပျောက်ဆုံးနေတဲ့ တစ်ခုခုကို လောကကြီးထဲမှာ အလွတ်စုံထောက်တွေ လွတ်ပြီး စုံစမ်းနေသလားပဲ။ 

သူ့စာတွေဖတ်ပြီး ကိုယ်ကိုယ်တိုင် ရှာဖွေတွေ့ရှိလားလား၊ သို့မဟုတ် ကိုယ်ကိုယ်တိုင် ပျောက်ဆုံးသွားသလား ဝေခွဲမရဖြစ်မိတယ်။ လူတစ်ယောက်က သူ့မိန်းမဆီက တစ်ရက်မှာ ထွက်သွားကြီး သေသလားရှာသလားမသိ အကြာကြီး ပျောက်သွားဖူးတယ်။ အလွတ်စုံထောက်က သူ့ကို ပြန်တွေ့တော့ အိမ်နဲ့ မနီးမဝေး ဘားတစ်ခုမှာ၊ အလွတ်စုံထောက်က သူ့မိန်းမနဲ့ ပြန်တွေ့ပေးလိုက်တယ်။ သူက မိန်းမကို မမှတ်မိပေမယ့် သူဒီမိန်းမကို ချစ်သေးတယ်။ နောက်တစ်ကြိမ် ပြန်လက်ထပ်ကြတယ်။ ဒါပေမယ့် သူ့အတိတ်ကို သူမှတ်မိလို့တော့ မဟုတ်ဘူး။ 

လောကကြီးမှာ ဒီအဖြစ်အပျက်တွေဟာ ရှားပါးကောင်း ရှားပါးပါလိမ့်မယ်။ ဒါပေမယ့် မဖြစ်နိုင်ဘူးလို့ ငြင်းချက်ထုတ်လို့မရ။ ကိုယ်ဟာ နက်ဖြန်ပျောက်ဆုံးသွားကောင်း ပျောက်ဆုံးသွားမယ်။ တစ်ချိန်မှာ မင်းဘဝထဲ ကိုယ်စောင့်နတ်လို သို့မဟုတ် နတ်ဆိုးတစ်ကောင်လို ဒါမှမဟုတ် တစ္ဆေတစ်ကောင်လို လာမခြောက်ဘူးလို့တော့ မင်းတရားသေမမှတ်ထားနဲ့ပေါ့။ အဲလို သတင်းစကားမျိုးကို ဒီစာအုပ်တွေက တဆင့် ပေါလ်အော်စကာက ကိုယ့်ကို ပေးနေတယ်။ 

ကိုယ်ရတဲ့ သတင်းစကားမျိုး တစ်ခြားစာဖတ်သူတွေရလား ကိုယ်သိလိုပါသေးတယ်။ 

မယ်ကျွိ

သန်းခေါင်ယံ ၂၀၁၇ ဇူလိုင်လ ၆ရက်။ 

(မီးတွေပျက်နေတာ)