စာအုပ်အမည် - မုန်တိုင်းငှက်
ဘာသာပြန် - တင်မောင်မြင့်
မူရင်း - The Eagle Has Flown by Jack Higgins
စာအုပ်တိုက် - အားမာန်သစ်
ပုံနှိပ်မှတ်တမ်း - ၁၉၉၆၊ ဧပြီ (ပထမအကြိမ်)
မူရင်းတန်ဖိုး - ပ+ဒု ၆၀ ကျပ်
ယခုဝယ်ဈေး - ၂၅၀၀ ကျပ်
စာမျက်နှာ - ၂၈၆ (ပ)၊ ၂၉၆ (ဒု)
မျက်နှာဖုံးဒီဇိုင်း - စံတိုး
ဂျာမန်ဗိုလ်မှူးကြီးကတ်စတိန်နာတို့ အဖွဲ့ ဝင်စတန်ချာချီကို ပြန်ပေးဆွဲဖို့ ကြိုးစားကြသည်။ အခွင့်အရေးလည်း ရခဲ့သည်။ သို့သော် အကြောင်းကြောင်းတွေကြောင့် မအောင်မြင်ခဲ့။ သူနှင့်အတူ သူ့လက်အောက်မှ လေထီးတပ်သား ဆယ့်သုံးယောက်လုံး သေခဲ့ရသည်။ ဒါက ဆရာနတ်နွယ် ဘာသာပြန်သည့် The Eagle Has Landed by Jack Higgins စာအုပ်တွင် ကျွန်တော်တို့ ဖတ်ခဲ့ရသည့်ဇာတ်သိမ်းခန်း။ သို့သော် တကယ့်တကယ် သူတို့ဇာတ်သိမ်းခဲ့ရာကျေးရွာတွင် လေထီးတပ်သားတို့၏ အုတ်ဂူမှာ ဆယ့်သုံးခုသာ ရှိနေ၏။ တစ်ဂူလိုနေသည်။ သည်တွင် စာရေးဆရာ Jack Higgins က အဆိုပါဖြစ်ရပ်တွင် ပါဝင်ပတ်သက်ခဲ့သော အိုင်ယာလန်သား ကြေးစားဖြစ်သူ လီယမ်ဒပ်ဗလင်နှင့် သွားရောက်တွေ့ဆုံမေးမြန်းရာမှ နောက်ဆက်တွဲဇာတ်လမ်းကို သိခွင့်ရခဲ့လေသည်။
ပထမစာအုပ်တွင် အများထင်ကြသလို ကတ်စတိန်နာ မသေခဲ့။ ဒဏ်ရာအပြင်းအထန်ရပြီး အင်္ဂလိပ်စစ်သုံ့ပန်း ဖြစ်ခဲ့ရသည်။ ပိုဆိုးသည်မှာ သူ ပြန်ပေးဆွဲဖို့ ကြံစည်မိသည်က ချာချီအတုဖြစ်နေ၏။ မအောင်မြင်တာပဲ တော်သေးဟုဆိုရမည်။ ဘာပဲဖြစ်ဖြစ် ဂျာမနီဘက်မှ သူ့ကိုကယ်ဖို့ ကြိုးစားကြမည်ဆိုတာ ဗိုလ်ချုပ်မွန်ရိုး နားလည်သည်။ သို့ဖြင့် စတိန်နာကို ထိန်းသိမ်းထားသည့်နေရာအား တဖက်လှည့်ဖြင့် သတင်းပေါက်ကြားစေ၏။
စတိန်နာကို ကယ်ဖို့ ဟင်းမလားက ဗိုလ်ချုပ်ရှလင်းဘတ်ကို ညွှန်ကြားသည်။ အရှေ့စာအုပ်တွင် စတိန်နာနှင့်တွဲပြီး အစွမ်းပြခဲ့သော လီယမ်ဒပ်ဗလင်ပါ ပြန်လည်ပတ်သက်လာရပြန်၏။ သူကတော့ ကံကောင်းထောက်မစွာ လွတ်ပြေးနိုင်ခဲ့သည်ကိုး။ စတိန်နာကိုကယ်ဖို့ တာဝန်မှာ သူ့ပခုံးပေါ်ကျလာ၏။ ရှလင်းဘတ်ကလည်း သူ့ကိုမက်လောက်အောင် ပေးခဲ့သည်လေ။ နောက်ဆုံးတွင် အင်္ဂလိပ်ဗိုလ်ချုပ်မွန်ရိုး၊ ဂျာမန်ဗိုလ်ချုပ်ရှလင်းဘတ်နှင့် ကြေးစားမျိုးချစ် လီယမ်ဒပ်ဗလင်တို့ ဉာဏ်ချင်းပြိုင်ကြရပြီ။
တစ်ဖက်တွင်လည်း ဟင်းမလားက ကာနာရစ်၊ ရွမ်းမဲလ်နှင့် ဟစ်တလာတို့ကို လုပ်ကြံဖို့ ကြိုးစားနေ၏။ ထိုသို့လုပ်ကြံနိုင်ရန်လည်း ဗိုလ်ချုပ်ရှလင်းဘတ်ကို (စတိန်နာအား ကယ်ရန်ဟု အကြောင်းပြကာ) ပထုတ်ခဲ့ခြင်းဖြစ်သည်။ ဒါကို မမျှော်လင့်ဘဲ ရှလင်းဘတ် သိလိုက်ရသည်။
တစ်ဖက်တွင် စတိန်နာကိုကယ်ဖို့၊ နောက်တစ်ဖက်တွင် ဟစ်တလာကိုကယ်ဖို့ ရှလင်းဘတ် ဘယ်လိုအကြံထုတ်မလဲ။
ဆည်ဝက ဗျိုင်းစောင့်သလို စောင့်နေကြသည့် အင်္ဂလန်မြေပေါ်မှ စတိန်နာကို ဒပ်ဗလင် ကယ်ထုတ်နိုင်ပါ့မလား။
ခေတ်ဟောင်းကို ရေးပြသည့်ဝတ္ထုတို့မှာ အဖြေကို ကိုယ်ကသိနေသည့်တိုင် စွဲမက်ဖွယ်ရာ ဇာတ်လမ်းဇာတ်ကွက်တို့၏ ဖမ်းစားမှုကြောင့် ဆုံးခန်းတိုင်သည့်အောင် ဖတ်မိရသည်ချည်း။ အထူးသဖြင့် စပိုင်ဇာတ်လမ်းတို့မှာ နောက်ဆုံးစာမျက်နှာ မရောက်မချင်း သိချင်ဇောဖြင့် စိတ်လောကာ အသည်းတယားယား ရင်တမမ ဖတ်ကြရသည်။ ဤစာအုပ်သည်လည်း ယင်းသို့သော အမျိုးအစားဖြစ်သည်ဟု ကျွန်တော်က ဆိုချင်ပါသည်။
ကျော်စွာ
၂၂:၅၀ နာရီ
၂၁.၅.၂၀၁၇
Publisher Name: အားမာန်သစ်စာပေ
Publisher Address: အမှတ်(၁၄၃)၊မြန်မာ့ဂုဏ်ရည်လမ်း၊ကန်တော်ကလေး၊ရန်ကုန်မြို့။ဖုန်း - 01394685, 0973041078
Publisher Phone Number: ဖုန်း - 01394685, 0973041078
