ကောင်းကင်စားကျက်
မောင်ရဲခိုင်
မောင်ရဲခိုင်
ကောင်းကင်စားကျက်
John Steinbeck ၏ The Pastures of Heaven ကို
ဘာသာပြန်ဆိုသည်။
ရာပြည့် စာအုပ်တိုက်၊
ပထမအကြိမ်၊ မတ် ၂၀၂၀။
မျက်နှာဖုံး ပန်းချီနှင့် ဒီဇိုင်း - လင်းဝဏ္ဏ။
၁၃.၁ စင်တီမီတာ x ၂၁ စင်တီမီတာ။
စာမျက်နှာ - ၂၄၈ ၊ တန်ဖိုး - ကျပ် ၃၅၀၀။
ရာပြည့် စာအုပ်တိုက် ငွေရတုအထိမ်းအမှတ်
( ၁၉၉၅ - ၂၀၂၀ ) အဖြစ် ထုတ်ဝေခြင်းအစီအစဉ် အမှတ် ၅ ဖြစ်သည်။
၁၉၃၂ ခုနှစ်က ထုတ်ဝေခဲ့သော ဂျွန်စတိုင်းဘက်၏ ဝတ္ထုတိုပေါင်းချုပ်ကို ၁၃ နိုဝင်ဘာ ၁၉၉၉ တွင် ဆရာမောင်ရဲခိုင်က ဘာသာပြန်ဆိုထားခြင်းဖြစ်သည်။
ဝတ္ထုတိုအရေးအသား ၁၂ ပုဒ် ပါရှိသည်။
ကောင်းကင်စားကျက်ဟု အမည်တွင်လာခြင်းကို အောက်ပါ အတိုင်းဖော်ပြထားသည်။
'' စည်းကမ်းထိန်းအရာခံဗိုလ်ကလေးသည် ဆိတ်ငြိမ်သော အလှအပ၏ ရှေ့မှောက်၌ အားမရှိတော့သလို ဖြစ်သွားလေသည်။ သူသည် အသားမည်း ကျောပြင်များကို စုတ်ပြတ်ကုန်အောင် ကြိမ်နှင့် ရိုက်ခဲ့၏။ သူ၏ လောဘစိတ်မူသော ယောက်ျားပီသမှုသည် ကာလီဖိုးနီးယားပြည်နယ်တွင် မျိုးနွယ်သစ်တစ်မျိုးကို တည်ထောင်နေခြင်းဖြစ်၏။ မုတ်ဆိတ်ပါးသိုင်းမွေးနှင့် ကြမ်းတမ်းသော သူသည် မြင်းပေါ်မှဆင်းကာ
သံခမောက်ကို ချွတ်လိုက်၏။
' အို မြတ်သောမယ်တော်' သူ တိုးတိုး ရေရွတ်လိုက်သည်။
' ကျွန်တော်တို့ကို ဘုရားသခင် လမ်းပြ ခေါ်ဆောင်လာခဲ့တဲ့ ဒီနေရာဟာ စိမ်းမြတဲ့ ကောင်းကင်ဘုံ စားကျက်မြေပါကလား။'
ယခုအခါ သူ့မြေးမြစ်တို့သည် အသားဖြူကုန်ကြပေပြီ။ ကျွန်ုပ်တို့ သူ၏ရှာဖွေတွေ့ရှိမှုခံစားချက်ကို ပြန်လည်ခံစားကြည့်ခြင်းသာဖြစ်ပါ၏။ သူပေးခဲ့သည့်
တောင်ကြားနာမည်မှာကား တွင်ကျန်ရစ်လေသည်။
ယနေ့ထိပင် ကောင်းကင်စားကျက်မြေဟု သိကြလေ သည်။ '' ( စာမျက်နှာ ၆ မှ )
'' ကာလအတန်ကြာသောအခါ ကျူးကျော်မိသားစု တချို့ ထိုကောင်းကင်စားကျက်မြေ ထဲသို့ဝင်ကာ ခြံစည်းရိုးတွေကာ၊ သီးပင်စားပင်တွေ စိုက်ကြသည်။ မြေကို ပိုင်ဆိုင်သူ တစ်ဦး တစ်ယောက်မျှ မရှိသဖြင့် သူရထိုက် ငါရထိုက် အတော်ပင် အငြင်းအခုံဖြစ်ကြသေးသည်။ နှစ်တစ်ရာလောက်ကြာသောအခါ
ကောင်းကင်စားကျက်မြေပေါ်၌ မိသားစု နှစ်ဆယ်နှင့် လယ်တော နှစ်ဆယ် ရှိလာသည်။ တောင်ကြား အလယ်ခန့် တွင် အထွေထွေကုန်စုံဆိုင်နှင့် စာတိုက်ရှိ လာသည်။ စမ်းချောင်းအထက်ဘက်မိုင်ဝက်ခန့်တွင် အကြိမ်ကြိမ်ကြိုးစားခဲ့ကြရသော စာသင်ကျောင်းလေးပေါ်လာသည်။
ထိုမိသားစုများသည် အေးချမ်းစည်ပင်စွာ နေထိုင်လာ ခဲ့ကြ၏။ သူတို့မြေယာက ကောင်းပြီး လုပ်ကိုင်ရတာ လွယ်ကူသည်။ သူတို့ဥယျာဉ်များမှထွက်သော သစ်သီး များဆိုလျှင် အလယ်ပိုင်းကာလီဖိုးနီးယားမှာ အကောင်း ဆုံးဖြစ်လေသည်။'' ( စာမျက်နှာ ၇ မှ )
ထိုသို့သော အခြေအနေရှိသည့် ကောင်းကင်စားကျက်၌ အခြေချနေထိုင်ကြပြီး အချင်းချင်းလည်း ဆက်စပ်ပတ်သက်မှုများရှိနေကြသည့် မိသားစုအသီးသီးတို့အကြောင်းကို ရေးဖွဲ့ထားသည့် ဝတ္ထုတိုအရေးအသားများ ဖြစ်သည်။
'' သရုပ်မှန်နှင့် စိတ်ကူးစိတ်သန်းကောင်းအရည်အသွေး ဖြင့် ရေးသားလေ့ရှိပြီး စာနာသက်ညှာသော ဟာသနှင့် စူးရှထက်မြက်သော လူမှုရေးသိမြင်ချက်များ ပေါင်းစည်းပေးနိုင်ခြင်းကြောင့် '' ဟု နိုဘယ်လ်ဆု ကော်မတီက မှတ်ချက်ပေးခဲ့ပြီး ၁၉၆၂ ခုနှစ်တွင် စာပေနိုဘယ်လ်ဆုချီးမြှင့်ခံခဲ့ရသည့် ဂျွန်စတိုင်းဘက်၏ အစောပိုင်း လက်ရာ ဝတ္ထုတိုများကို ဆရာမောင်ရဲခိုင်က ရွှင်ရွှင်သွက်သွက် ဘာသာပြန်ဆိုထားရာ ဘာသာပြန်ဝတ္ထုတိုအရေးအသားတို့အား နှစ်ခြိုက်သည့် စာဖတ်ပရိသတ်တို့ သဘောတွေ့ကြမည်မလွဲ ဟု ယူဆမိပါ သည်။
မိုးမင်းသိမ်း
၁ ဇွန် ၂၀၂၀
Publisher Name: ရာပြည့်စာအုပ်တိုက်
Publisher Address: အမှတ် ၂၆၂(ခ)၊ ပန်းဆိုးတန်း (အထက်)၊ ကျောက်တံတားမြို့နယ်။ ဖုန်း - ၀၁ ၂၄၃၃၅၁
Publisher Phone Number: 01243351
