တေးဆိုငှက်ဒဏ္ဍာရီ
သင့်လူ
သင့်လူ
(ကိုယ်ရေးအကျဥ်းနှင့်စာအုပ်များစာရင်း)
https://savethelibrarymyanmar.org/author/12/show
မူရင်းစာအုပ်အမည် - The Wind-Up Bird Chronicle
မူရင်းစာရေးဆရာ - Haruki Murakami
ဘာသာပြန်စာအုပ်အမည် - တေးဆိုငှက်ဒဏ္ဍာရီ
ဘာသာပြန်စာရေးဆရာ - သင့်လူ
အမျိုးအစား - ဂျပန်ဘာသာပြန်(မော်ဒန်)ဝတ္ထုရှည်
ထုတ်ဝေသည့်တိုက် - ကံ့ကော်ဝတ်ရည်
ထုတ်ဝေသည့်ကာလ - ၂၀၁၉ ဇန်နဝါရီ
ထုတ်ဝေသည့်အကြိမ် - ဒုတ်ိယ
မျက်နှာဖုံးဒီဇိုင်း - ဇော်မောင်
တန်ဖိုး - ၈၅၀၀ ကျပ်
စာမျက်နှာ - ၆၆၄
ပင်ပေါင် (မကြိုက်)
ကပ်ဖ်ကာ (မကြိုက်)
နော်ဝေဂျီယံဝုဒ် (မကြိုက်)
နယ်ခြားတောင်ဘက် (အလွန်ကြိုက်)
တေးဆိုငှက် (အလွန်ကြိုက်)
ဖတ်ဖူးတဲ့ မူရာကာမိ ဘာသာပြန်တွေ တန်းစီပြီး စာရင်းတို့ကြည့်တော့ နည်းနည်းထူးခြားနေသလိုခံစားရတယ်။ သေချာပြန်တွေးမှ အရေး ခပ်ရှင်းရှင်းရေးထားတဲ့ မူရာကာမိတွေကို ကိုယ်သိပ်ကြိုက်တယ်ဆိုတာ နားလည်တော့တယ်။ ဒီတေးဆိုငှက်ဒဏ္ဍာရီ မှာဆိုလည်း အစပိုင်းလေးဟာ သိပ်လှတယ်။ တကယ့်ကို ရိုမန့်စ် ဖြစ်လွန်းတယ်။ (နောက်ပိုင်းမှာသာ မူရာကာမိ ပီသစွာ ပို့စ်မော်ဒန်အရေးအသားတွေ အိပ်မက်ဆန်ဆန်တွေ နိမိတ်ပုံတွေပါလာတာ)
စာအုပ် (၁) ခိုးခံလိ်ုက်ရသည့်မက်ပိုင်းမုန့်များ ၁၉၈၄ ဇွန်၊ ဇူလိုင်
စာအုပ် (၂) တမန်တော်ငှက်ငယ် ၁၉၈၄ ဇူလိုင်မှ အောက်တိုဘာ
စာအုပ် (၃) ငှက်ဖမ်းသူ ၁၉၈၄ အောက်တိုဘာမှ ၁၉၈၅ ဒီဇင်ဘာ ဆိုပြီး စာအုပ်ငယ် ၃အုပ်ခွဲထားပြီး အခန်းငယ်ပေါင်း များစွာ ပါတဲ့ စာမျက်နှာ ၆၀၀ ကျော် ဟာရူကီမူရာကာမိရဲ့ စာအုပ်ကို သင့်လူ ဘာသာပြန် တေးဆိုငှက် ဒဏ္ဍာရီ စာအုပ်ဟာ အစပိုင်း ဇာတ်အိမ်တည်ကာစ တချက် နည်းနည်းလေး အိုင်နေတာကလွဲလို့ နောက်ပိုင်းမှာ ဖတ်တဲ့သူကို တောက်လျှောက် ဆွဲခေါ်သွားခဲ့တယ်။ ကိုယ့်အဖို့ ဆိုရရင် ဖတ်တဲ့ညတွေမှာ အိပ်မက်တွေ မက်ခဲ့ရတယ်။ (အိပ်မက်တွေ မက်မှာစိုးလို့ ညဘက်မဖတ်ပဲ နေဖို့ ကြိုးစားပေမယ့် မသိစိတ်က အိပ်မက်တွေ မက်ချင်နေခဲ့တယ်) အဓိကဇာတ်ဆောင် တိုရုအိုကာဒါလို တက်ုယ်တည်း ရေမရှိတော့တဲ့ ရေတွင်းပျက်ထဲ ဆင်းထိုင်ပြီး အမှောင်ထုထဲ နက်နက်နဲနဲ စဉ်းစားခန်းတွေ ဖွင့်ချင်ခဲ့တယ်။ ဂျပန်စစ်ဗိုလ် ယာမာမိုတိုကို မွန်ဂိုတွေ အရှင်လတ်လတ် အရေပြားခွာတာကို အပြင်မှာ ကြည့်ချင်ခဲ့တယ်။ စစ်ဖြစ်တဲ့အတွက် တိရစ္ဆာန်ရုံထဲက တိရစ္ဆာန်တွေ လွတ်ပြီး လူတွေကို အန္တရာယ်ပေးမှာစိုးလို့ စစ်သားတွေက လှောင်အိမ်ထဲက အကောင်တွေကို အပြင်က ရက်ရက်စက်စက် သေနတ်နဲ့ တေ့ပစ်တာ ကြည့်ချင်ခဲ့တယ်။ လူတစ်ယောက်ကို ဘေ့စ်ဘောတုတ်နဲ့ အသေအကြေ ရိုက်ကြည့်ချင်ခဲ့တယ်။ တကယ့်ကို ဖတ်ပြီးတဲ့အချိန်မှာ လူရော စိတ်ရော နွမ်းလျ ကျန်ခဲ့တဲ့ စာအုပ်တစ်အုပ်ပါ။ စာအုပ်ဖတ်နေတဲ့ အချိန် လူကသတ်သတ် စာအုပ်ကသတ်သတ် ဖြစ်မနေပဲ ကိုယ်ပါရောပြီး စာအုပ်ထဲရောက်ရတဲ့ စာအုပ်မျိုးပေါ့။
ဇာတ်လမ်းရဲ့ အဓိကဇာတ်ဆောင်က ဥပဒေအကျိုးတော်ဆောင် အလုပ်ကနေ ထွက်ချင်လို့ ထွက်လိုက်တဲ့ တိုရုအိုကာဒါ။ သူအလုပ်ထွက်တော့ သူ့မိန်းမ ကူမီကိုက အလုပ်သွား၊ သူက အိမ်အလုပ်လုပ်။ အဲ့ကာလမှာ သူတို့ အိမ်ထောင်ဦးကတည်းက မွေးထားတဲ့ ကြောင်ကြီး နိုဘိုရုဝထရာ အိမ်ကပျောက်သွားတာနဲ့ အားနေတဲ့ တိုရုအိုကာဒါဟာ လိုက်ရှာရတာပေါ့။ လိုက်ရှာရင်း အသိရခက်တဲ့ မေကာစာဟာရ(မေ) နဲ့ ဆုံတယ်။ တိုရုတို့ အိမ်ရဲ့နောက်ဖေးလမ်းကြားကနေ သွားရင်းဆုံတာ။ မေတို့ရဲ့ အိမ်နားမှာ လူမနေတဲ့ အိမ်တစ်အိမ်ရှိတယ်။ အဲ့ဒီ အိမ်ကလည်း ကျိန်စာသင့်အိမ်။ တိုရုဟာ ကြောင်ရှာရင်း မေနဲ့ရင်းနှီးသွားသလို သူ့မိန်းမဟာလည်း ကြောင်ကိုရှာတာ အကူအညီဖြစ်ဖို့ အကြားအမြင် ဆရာမ မော်တာကာနိုကို သူနဲ့ ချိတ်ပေးခဲ့တယ်။ မော်တာကာနိုက တဆင့် သူ့ညီမ ခရီတာကာနိုပါလာတယ်။ တိုရုကြောင်ရှာတဲ့ရက်တွေအတွင်း တစ်ရက် ကူမီကိုဟာ အလုပ်ကပြန်မလာပဲ ပျောက်သွားခဲ့တယ်။ သိပ်မကြာခင် ကူမီကိုဆီက စာလာတယ်။ သူနောက်ယောက်ျားနဲ့ လိုက်သွားပြီဆိုပြီး .... ။ အရှေ့မှာ ရေးထားတဲ့ အချိန်ကာလတွေမှာ တိုရုရဲ့ ဘဝဟာ အတက်အကျအများကြီးဖြစ်ခဲ့တယ်။ မထင်မှတ်တဲ့ ဘဝရဲ့ ရုန်းကန်ရတဲ့ကာလကို တိုရုဖြတ်သန်းခဲ့တယ်။ စာမျက်နှာ ၆၀၀ ကျော်စာအုပ်မှာ ဇာတ်ဆောင်အားဖြင့် ဘယ်လောက်မှသိပ်မပါဘူး။ ဒါပေမယ့် မူရာကာမိဟာ ဖတ်တဲ့သူကို အမျိုးမျိုးကိုင်လှုပ်သွားတယ်။ တစ်ပတ်လောက် စိတ်ရောကိုယ်ပါ နှစ်ပြီိး ဖတ်ခဲ့ရတဲ့ ဇာတ်လမ်းတစ်ခုလုံးကို ပြန်ပြောပြဖို့ မလွယ်ပါဘူး။ ရေးပြရင်လည်း ဘယ်လိုမှ စုံမှာမဟုတ်ဘူး။ ကိုယ်က နှမ်းဖြူရုံလောက်ပဲ ညွှန်းနိုင်တာပါ။
သင့်လူရဲ့ ဘာသာပြန် ဖတ်ဖူးသမျှထဲမှာ အကောင်းဆုံးလောက်ကို ရှိပါတယ်။ ဘာသာပြန်လက်ကလည်း အကောင်းဆုံးပါ။ မလိုတဲ့နေရာတွေမှာ စကားပုံတွေနဲ့ အတင်းကာရော ပြန်တာမျိုးတွေ မပါပါဘူး။
Rating 8/10
-------------------------------
ဖတ်ညွှန်းရေးသူ - က်ိုဟေမာန်လှဝင်း
၁၇.၁၁.၁၇ (၁၂:၀၀)
Publisher Name: ကံကော်ဝတ်ရည်စာပေ
Publisher Address: အမှတ်-၂၂၊ မဟာဇေယျလမ်း၊ပုဇွန်ထောင်မြို့နယ်၊ ရန်ကုနမြို့။ ဖုန်း- 09250012348 ၊ 0931561418 ၊ 0973041137 email:kantkawwutyee@gmail.com http://kantkawwutyee.myanmaronlinesales.com
Publisher Phone Number: 09250012348 ၊ 0931561418 ၊ 0973041137
