ဆိုင်ဂုံ
မောင်ထွန်းသူ
စာအုပ်အမည် - ဆိုင်ဂုံ
ဘာသာပြန်သူ - မောင်ထွန်းသူ
မူရင်းစာရေးဆရာ - Anthony Grey
စာအုပ်တန်ဖိုး - ၁၃၀၀၀ ကျပ်
ကိုယ်ရေးအကျဥ်းနှင့်စာစုစာရင်း
ဒီစာအုပ်လေး ဖတ်ညွှန်း ရေးရမယ်ဆိုရင်
ရေးစရား ၊တွေးစရာ အတောမသတ်နိုင်အောင် ကျယ်ပြန့်လွန်းလှတာမို့ ပြောစရာ ၊ ဆွေးနွေးစရာ ကုန်နိုင်မယ် မဟုတ်ပါဘူး။
ဝင့်ဝါ လည်း စာအုပ်လေးထဲမှ
ပြည့်ပြည့်စုံစုံ အရေးပါပြီး ကောင်းမွန်တဲ့ အချက်အလက်များကို အပြည့်အဝ ပြောနိုင်မှာ မဟုတ်ပါဘူး။
သေသေချာချာ နားလည်သဘောပေါက်သွားခဲ့ရတာကတော့ နိုင်ငံတစ်နိုင်ငံမှာ ကြုံတွေ့နေရတဲ့ စစ်ပွဲရဲ့ အကျိုးသတ်ရောက်မှု ၊ ဆိုးယုတ်မှု အနိဌာရုံတွေကိုပါပဲ။
အထူးသဖြင့်တော့ ဒီကာလကြီးမှာ ဖတ်ခွင့်ရခဲ့တာဟာ ပြသနာတိုင်းရဲ့ အစွန်းနှစ်ဖက် သဘောတရားတွေကို ကြည့်တတ် မြင်တတ်လာတယ် လို့ပဲ ပြောရမယ်ထင်ပါတယ်။
ကိုယ့်နိုင်ငံ ၊ ကိုယ့်လူမျိုးတွေအပေါ်မှာ ကြုံတွေ့နေရတဲ့ ကောင်းခြင်း ၊ ဆိုးခြင်း နိုင်ငံရေးပြသနာတွေဟာ ကိုယ်နဲ့ တိုက်ရိုက် ပတ်သတ်ဆက်နွယ်နေမှု ၊ အကျိုးသက်ရောက်မှုများစွာကို ပိုလို့တွေးတောနိုင်ခဲ့တာတော့ အမှန်ပါပဲ။
စာအုပ်လေးက
ဘယ်လိုလူမျိုးက လေးစားစရာကောင်းတယ်။
ဘယ်လိုလူမျိုးက အတုယူအားကျဖွယ်ကောင်းတယ်။
ဘယ်လို လူမျိုးက စက်ဆုပ်စရာကောင်းတယ်။
ဘယ်လို ကိုယ်ကျိုးစွန့် အနစ်နာခံခဲ့တဲ့ လူမျိုးတွေ ရှိတယ် ဆိုတဲ့အကြောင်းကို
တွေးတောမှု အသိအမြင် များစွာပေးနိုင်ခဲ့ပါတယ်။
မူရင်းစာရေးဆရာ အန်သိုနီဂရေး ဆိုသလို
လူ့သမိုင်းသည် လူတစ်ယောက်တည်းနှင့်သာ ဆက်စပ် ပတ်သတ်နေသည့် ကိစ္စမဟုတ် ပါ။ လူတစ်စု တစ်ဖွဲ့တည်းနှင့်သာ ဆက်စပ် ပတ်သတ်နေသည့် အရေးလည်းမဟုတ်ပါ။
ဗီယက်နမ် လူမျိုးတို့၏ အတိတ်ဖြစ်စဥ် များကို မီးမောင်းထိုးပြထားသော ဤ ဆိုင်ဂုံ ဝတ္ထုကြီးကို စာရေးသူက မှားသည် ၊မှန်သည် ဝေဖန်ခြင်းမပြုခဲ့ပဲ
စာဖတ်သူများကို အမြင်အမျိုးမျိုးတွေးစေခဲ့ပါတယ်။
ဆိုင်ဂုံ ဆိုတာ ဗီယက်နမ်နိုင်ငံ ကို နောက်ခံပြု၍ ဇာတ်အိမ်တည် ရေးဖွဲ့ထားတဲ့ ဝတ္ထုကြီး တစ်ပုဒ်ပါ။
ဗီယက်နမ် ပြည်သူတို့၏ နိုင်ငံရေးဘဝ ၊ စီးပွားရေးဘဝ ၊ လူမှုရေးဘဝနှင့် စစ်ရေးဘဝများကို နောက်ခံကျောရိုးအဖြစ် ထားကာ
ဗီယက်နမ်းပြည်သူတို့၏ ပျော်ရွှင်ချမ်းမြေ့စရာများ ၊
စိတ်နှလုံးထိခိုက် ကြေကွဲစရာများ ၊
ထိတ်လန့်ချောက်ချားစရာများ ၊
ဝမ်းနည်းစရာ ကြေကွဲစရာများ ကို တသသ ဖတ်ရှုခဲ့ရပါတယ်။
ဗီယက်နမ်ပြည်သူများသည် ရိုးသားအေးဆေးသော ၊ အသိပညာဗဟုသုတ ကင်းမဲ့သော ၊ ကိုလိုနီနယ်ချဲ့ ပြင်သစ်တို့၏ အဖိအနှိပ် အချုပ်အချယ်ကို အလူးအလိမ့်ခံနေကြရသော ၊
မိမိတို့ လူမျိုးခေါင်းဆောင်ဆိုသူ လူတစ်စု၏ လက်ဝဲ -လက်ယာ အစွန်းရောက်မှုဒဏ်ကို ခံနေကြရရှာသော ဗီယက်နမ်ပြည်သူတို့၏ ဘဝကို အပီအပြင် ဇာတ်အိမ်တည် ရေးဖွဲ့ထားပါတာတွေ့ရပါတယ်။
ဆရာမောင်ထွန်းသူ ရဲ့ အမှာစာလေးမှာ ပြောထားသလိုပဲ
ဗီယက်နမ်နိုင်ငံ၏ သမိုင်းဖြစ်စဥ်များကို သူ့နေရာနှင့်သူ ဝတ္ထုဇာတ်ကောင်များနှင့် အံဝင်ခွင်ကျ ရေးဖွဲ့ထားနိုင်မှုမှာ စာဖတ်သူကို သက်သောင့်သက်သာ စိတ်ဝင်စားစွာဖြင့် ဖတ်သွားနိုင်သည်သာမက သိလွယ် မြင်လွယ် မှတ်သားလွယ်ပါသည်။
သာမန် စာဖတ်သူတစ်ဦးသည် တစ်ထိုင်တည်း နှင့် ဗီယက်နမ်နိုင်ငံ၏ ဖြစ်စဥ်များကို သိမြင် နားလည်သွားနိုင်ပါတယ်။ ထိုအခါ မိမိနှင့်အတူ အာရှတိုက်ထဲရှိ ( အရှေ့တောင်အာရှထဲရှိ) နိုင်ငံတစ်နိုင်ငံ မှ ပြည်သူတို့၏ ကောင်းကွက် နှင့် ဆိုးကွက်များ ၊ အားသာချက် နှင့် အားနည်းချက်များ ၊ အားကျစရာနှင့် တရားရစရာများကို လွယ်လင့်တကူ မြင်လာ နိုင်စရာ ရှိပါသည်လို့ ဆရာ မောင်ထွန်းသူရဲ့ အမှာစာမှာ ဖော်ပြခဲ့သလိုပဲ
လွန်စွာ ကျယ်ပြန့်တဲ့ တွေးခေါ်မှုတွေ ပေးခဲ့သလို ၊ မတူညီတဲ့ စရိုက်သဘာဝများ ရှိတဲ့ လူသားတို့ရဲ့ ဖြစ်တည်မှု ကြားထဲမှ နိုင်ငံတစ်နိုင်ငံကို တွေ့မြင်ခဲ့ရပါတယ်။
အသိပညာ ချို့တဲ့လွန်းတဲ့ ဆင်းရဲသား တောင်သူလယ်သမား ဗီယက်နမ် လူမျိုးများသည်
စစ်ဒဏ် ၊ ဆင်းရဲမွဲတေသည့်ဒဏ် နှင့် ငတ်မွတ်ခေါင်းပါးသည့်ဒဏ်များကို ခါးစည်း၍ ခံခဲ့ကြရသည်။
အင်အားကြီးနိုင်ငံများ၏ အုပ်စိုး ခြယ်လှယ်မှုများကြားမှ ရုန်းကန်တိုက်ခိုက် ကြသော ဗီယက်နမ် ပြည်သူတို့၏ ကျေးဇူးရှင် ဟိုချီမင်း၏ ဖြစ်ရပ်မှန် ဘဝပုံရိပ်များကိုလည်း ဇာတ်ကောင်များစွာကြားထဲတွင် လေးစား အတုယူဖွယ် ဖော်ပြထားပေ၏။
ဒီစာအုပ်လေးက ဒီကာလ လေးမှာ ဖတ်ရတာ ပိုလို့ အနှစ်သာရ ရှိလှပါတယ်။
လူတိုင်းမှာ အကြောင်းပြချက်မျိုးစုံ အစွန်းနှစ်ဖက်တွေ ရှိနိုင်ပါတယ်။
နိုင်ငံရေးမှာ ပိုလို့ အစွန်းနှစ်ဖက်အမြင်တွေ တွေ့နိုင်ပါတယ်။
မိသားစုချင်း ၊ သူငယ်ချင်းမိတ်ဆွေချင်း နိုင်ငံရေး ရပ်တည်ချက် တွေ မတူညီနိုင်ပါဘူး။
ဒီစာအုပ်လေးမှာဆို ဗီယက်နမ်နိုင်ငံအပေါ် အုပ်စိုး ခြယ်လှယ် ခဲ့သော ပြင်သစ် ၊ ဂျပန် ၊ အင်္ဂလိပ် ၊ အမေရိကန် စသော လူမျိုးများစွာ၏ မတူညီနိုင်တဲ့
ခံယူချက်၊ ရပ်တည်ချက်တွေ ကို ဇာတ်ကောင်များစွာ မှာ တွေ့မြင် သိရှိခဲ့ရမှုကြောင့်
စာဖတ်သူအပေါ် ယူတတ်ရင် ယူတတ်သလို အတွေးအခေါ် အသစ်တွေ ရရှိနိုင်ပါတယ်။
ဒီစာအုပ်လေးမှာ မျိုးမတူသော မိသားစုလေးစု၏ မျိုးဆက် သုံးဆက် ရင်ဆိုင်ဖြတ်သန်းမှု
ဇာတ်ကောင်များစွာထဲမှာ အမေရိကန်လူမျိုး ဂျိုးဇက်ရှားမင်းက တော့ မမေ့နိုင်တဲ့ ဇာတ်ကောင်တစ်ဦးပါပဲ။
အမေရိကန်လူမျိုး ရှားမင်းမိသားစု ၊
ဗီယက်နမ် လူမျိုး ထရန်ဗန်ကင် မိသားစု၊
ပြင်သစ်လူမျိုး ဂျက်ဒီးဗရော့စ် မိသားစု
သူ့နိုင်ငံ နှင့်သူ
နိုင်ငံအပေါ်ထားရှိတဲ့ အမြင်များစွာ ၊ ခံယူချက်များစွာ ၊ အတွေ့အကြုံများစွာကို
ဇာတ်ကောင်တစ်ဦးချင်းအလိုက် စာဖတ်သူအပေါ် လွှမ်းမိုးခြင်းများစွာဖြင့်
တစိမ့်စိမ့် တသသ ခံစား ဖတ်ရှုခဲ့ရပါတယ်။
တစ်လ လုံးနေမှ ဒီတစ်အုပ်ထဲ ဖတ်ဖြစ်ခဲ့လည်း အင်မတန်အကျိုးရှိစေတဲ့ စာအုပ်လေးပါ။
ဝင့်ဝါကတော့ ၁၅ရက် တိတိ အချိန်ပေးခဲ့ရပါတယ်။
စာမျက်နှာ ၁၀၉၈ မျက်နှာ ရှိတဲ့ ဆိုင်ဂုံစာအုပ်လေးက တစိမ့်စိမ့်တသသ စွဲမက်စွာ ဖြင့် ဖတ်ရှုရင်း ခံစားချက်မျိုးစုံ ရရှိမှာဖြစ်သလို ဒီကာလမှာ ဖတ်ဖို့ အသင့်တော်ဆုံး စာအုပ်လေး တစ်အုပ်ပါလို့ ညွှန်းလိုက်ရပါတယ်။
ဝင့်ဝါ
19..11..2021
Publisher Name: စိတ်ကူးချိုချို စာပေ
Publisher Address: ၉(က)၊ ၁၆၄ လမ်း၊ တာမွေ၊ ရန်ကုန်မြို့။ ဖုန်း - ၀၁၅၄၆၈၄၅
Publisher Phone Number: 01546845
