အိုင်ဗင်ဘယ်လ်ကင်၏ ဒဏ္ဍာရီများ
ကျော်အောင်
ကျော်အောင်
အိုင်ဗင်ဘယ်လ်ကင်၏ ဒဏ္ဍာရီများ
စိတ်ကူးချိုချိုအနုပညာ၊
ပြန်လည်ရိုက်နှိပ်ခြင်း၊ သြဂုတ် ၂၀၂၀။
( ၁၉၅၆၊ အာရုံသစ်စာပေ၏ ပထမအကြိမ်မူ )
၁၀.၈ စင်တီမီတာ x ၁၈.၅ စင်တီမီတာ။
စာမျက်နှာ - က မှ ဖ နှင့် ၁၈၆၊ တန်ဖိုး - ကျပ် ၂၀၀၀။
စိတ်ကူးချိုချို စာအုပ်တိုက် တည်ထောင်ခြင်း ၂၁ နှစ်ပြည့် အဖြစ် အမှတ်တရ ၂၁ အုပ်ထုတ်ဝေခြင်း အစီအစဉ်ဖြစ်သည်။ '' နိုင်ငံတကာစာ '' ဟု အမည်ပေး ထားသည်။။
၁၉ အောက်တိုဘာ ၁၉၅၆ ရက်စွဲဖြင့်
ဆရာကျော်အောင်ရေးသားထားသော '' ပွတ်ရှကင်း၏ အတ္ထုပ္ပတ္တိနှင့် စာပေ '' မိတ်ဆက်ပါရှိသည်။
၁၆ နိုဝင်ဘာ ၁၈၃၀ က '' အယ်ဒီတာ၏အမှာ '' ကို ဘာသာပြန်ဆိုထည့်သွင်းထားပြီး မှတ်စုများကိုလည်း နောက်ဆက်တွဲအဖြစ်ဖော်ပြထားသည်။
'' သေနတ်တစ်ချက်၊ သုဘရာဇာ၊ မုန်တိုင်း၊ စာတိုက်ဗိုလ်၊ ချစ်စရာမလေး '' စသည့် '' အိုင်ဗင်ဘယ်လ်ကင်၏ ဒဏ္ဍာရီများ '' ကို ဘာသာပြန်ဆိုထားသည်။
'' အိုင်ဗင်ဘယ်လ်ကင်၏ ဒဏ္ဍာရီများကို ရေးသားထုတ်ဝေလိုက်သည့်အခါ ပွတ်ရှကင်းသည် ရုရှားစာပေကို တစ်မျိုးတစ်ဖုံ ဆန်းသစ်လိုက်သည့်အချိန်ဖြစ်၏။ ပွတ်ရှကင်းသည် ရဲရဲဝံ့ဝံ့ ရုရှားစာပေတွင် 'သရုပ်ဖော်စာပေ နှင့် ဒီမိုကရေစီသဘော ' ကို သွတ်သွင်းခဲ့၏။
ဘယ်လ်ကင်၏ဒဏ္ဍာရီများကို ရေးသားလိုက်ခြင်းဖြင့် သူ့နေ့စဉ်ဘဝ၊ သူ့အာသာဆန္ဒများ၊ ပျော်ရွှင်ခြင်း၊ ဝမ်း နည်းကြေကွဲရခြင်း၊ ခံစားရခြင်း၊ မညီမျှသော လောက အလယ်၌ သူ၏လူအဖြစ်မှာ ကြေကွဲစရာကောင်းခြင်း စသည်တို့ကို စာပေတွင် ထင်ဟပ်၍ ပြလိုက်ခြင်း ဖြစ်ပေသည်။ ''
( ပွတ်ရှကင်း၏ အတ္ထုပ္ပတ္တိနှင့် စာပေ၊ စာမျက်နှာ ကနှင့် ခ မှ )
'' သူက' မပစ်တော့ဘူး၊ငါကျေနပ်သွားပြီ၊မင်း ဒီလောက်စိတ်တုန်လှုပ်ချောက်ချားနေတာမြင်ရရင် ကျေနပ်ပြီ၊မင်း ငါ့ကိုလည်း ပစ်အောင်လုပ်ပြီးပြီ၊ တော်လောက်ပြီပေါ့၊ မင်း ငါ့ကို အမြဲအမှတ်ရနေရစ်ပေတော့ဟေ့၊ မင်း အသိ တရားနဲ့သာ မင်းနေခဲ့ပေတော့ ' ဒီလိုပြောပြီး ထွက်သွား တော့မလို့ဘဲ။ ဒါပေမဲ့ တံခါးဝရောက်တော့မှ
ကျုပ် သေနတ်ကျည်ဆန်ထိတဲ့ ပန်းချီကားကို တစ်ချက်လှည့်ကြည့်ပြီး မချိန်ဘဲ တစ်ချက်ပစ်သွားတယ်ဗျ။
ပြီးတော့ ထွက်သွားတော့တာပါပဲ။ ''
( သေနတ်တစ်ချက်၊ စာမျက်နှာ ၄၆ မှ )
'' သုဘရာဇာ၏အိပ်ရာပေါ်သို့ နေရောင်ခြည် ထိုးဝင်လာ ၏။ နောက်ဆုံးတွင် မျက်လုံးများကိုဖွင့်၍ ကြည့်လိုက်လျှင် အစေခံမလေး မီးမွှေးနေသည်ကို မြင်ရလေသည်။ အဒရီယန်သည် ညကကြောက်စရာကောင်းလှသည့် အဖြစ်ကိုတွေးရင်း ကြက်သီးများပင် တဖြန်းဖြန်းထမိ သည်။ မုဆိုးမကြီး ထရီယူစီိနာ၊ တပ်မှူးကြီးနှင့်ဆာဂျင်ပိုင်အိုတာတို့သည် အစီအရီ သူ့အတွေးတွင် ဝင်လာ ကြသည်။ အစေခံမကလေးအား ညက အသည်းထိတ်ဖွယ်အဖြစ်ကိုပြောပြမည်ဟု စောင့်စားနေ၏။ ''
( သုဘရာဇာ၊ စာမျက်နှာ ၆၆ မှ )
'' ' ဟင့်အင်း မသိရပါဘူး။ ငါတို့ လက်ထပ်တဲ့ရွာရဲ့ နာမည်တောင် ငါမသိဘူး။ ဘယ်နေရာက လာမှန်းကို ငါအခု အမှတ်မရတော့ဘူး။ ငါလည်း အဲဒီဘုရားရှိခိုးကျောင်းက ထွက်လာပြီး မြင်းလှည်းပေါ်မှာ အိပ်ပျော်သွားတယ်။ နောက်တစ်နေ့ မနက်အထိ မနိုးတော့ဘူး။ ဘယ်ရွာတွေ လွန်ခဲ့မှန်း ဖြတ်လာခဲ့မှန်းလည်း မသိရတော့ဘူး။ အဲဒီတုန်းက ငါ့တပည့်ကလည်း တိုက်ပွဲမှာ ကျသွားပြီကွဲ့။ ဒီတော့ အဲဒီတုန်းက ငါ နောက်ပြောင်ပြီး ခပ်ပေါ့ပေါ့ လက်ထပ်ခဲ့တဲ့မိန်းကလေးဟာ ဘယ်သူ ဘယ်ဝါဆိုတာ ခုနေမှာ သိနိုင်ဖို့ အခက်သားကလား။ ' ''
( မုန်တိုင်း ၊ စာမျက်နှာ ၉၉ နှင့် ၁၀၀ မှ )
'' ကျွန်တော်တို့သည် သင်္ချိုင်းသို့ ရောက်လာကြသည်။ သင်္ချိုင်း ကား အကာအရံ မရှိ၊ လက်ဝါးကပ်တိုင်များ ကျိုးကျဲသာ ရှိသည်။ နေပူမိုးရွာဒဏ်ကို ကာကွယ်ရန် အမိုးအကာလည်း မရှိပေ။ သည်လို ခြောက်သွေ့ကြေကွဲဖွယ်ကောင်းသော သင်္ချိုင်းမျိုး ကျွန်တော်
တစ်ခါမျှ မတွေ့ရဖူးပါ။ ''
( စာတိုက်ဗိုလ်၊ စာမျက်နှာ ၁၃၀ မှ )
'' အခန်းတွင်းသို့ ဝင်မိလျှင် လျှပ်စီးပြက်လိုက်သည်ဟု ထင်မိလေသည်။ လီဆာ မဟုတ်ပါ၊ အကူလီနာ။ သူ၏ ချစ်စရာမလေး သံလွင်သီးရောင် တောက်နေသော အကူလီနာအား ကျေးတောသူမ အဝတ်အစားနှင့် မဟုတ်ဘဲ အင်္ကျီဖြူဆွဆွကို ဝတ်ကာ ပြတင်းပေါက်၌ ထိုင်ရင်း သူ့စာကိုဖတ်နေသည်ကို တွေ့ရလေသည်။ ''
( ချစ်စရာမလေး၊ စာမျက်နှာ ၁၇၇ မှ )
ရုရှားစာပေကို ကမ ္ဘာ့ဂန ္ထဝင်စာပေနယ်ပယ်သို့ ရောက်အောင်ဆောင်ကြဉ်းပေးခဲ့သူ ပွတ်ရှကင်း၏ အရေးအ သားတို့ကို မြည်းစမ်းခွင့်ရစေသည့်'' အိုင်ဗင်ဘယ်လ်ကင်၏ ဒဏ္ဍာရီများ'' ပင်ဖြစ်ပါသည်။
မိုးမင်းသိမ်း
၂၈ စက်တင်ဘာ ၂၀၂၀
Publisher Name: စိတ်ကူးချိုချို စာပေ
Publisher Address: ၉(က)၊ ၁၆၄ လမ်း၊ တာမွေ၊ ရန်ကုန်မြို့။ ဖုန်း - ၀၁၅၄၆၈၄၅
Publisher Phone Number: 01546845
