ကမ္ဘာကြီးဇောက်ထိုးမိုးမျှော်
ဝင်းငြိမ်း
ကမ္ဘာကြီးဇောက်ထိုးမိုးမျှော်- ဝင်းငြိမ်း။
ငါတို့စာပေ၊ ပထမအကြိမ်။
စက်တင်ဘာ၊ ၂၀၂၀။
တန်ဖိုး-၃,၀၀၀ကျပ်။
မျက်နှာဖုံးဒီဇိုင်း-သိုးထိန်း။
ဒီဝတ္ထုက မော်ရီးန်လို့ခေါ်တဲ့ အိုင်းရစ်ရှ်-ဗမာကပြား ကလေးမလေးတစ်ယောက်ရဲ့ စစ်အတွင်း မြန်မာပြည်မှာနေထိုင်ခဲ့ရတဲ့ ကိုယ်တိုင်ရေးအဖြစ်အပျက်အစုံအလင်ကို ဆရာဦးဝင်းငြိမ်း ဘာသာပြန်ထားတာပါ။ သူ့ရဲ့ဖခင်ဟာ အိုင်းရစ်ရှ်လူမျိုးဖြစ်ပြီး လက်ထောက်ရုံးအုပ်ဘဝနဲ့ မြန်မာပြည်မှာ တာဝန်ထမ်းဆောင်နေသူပါ။ တောင်တွင်းကြီးဘက်ကို ခရီးသွားရင်းဆေးလိပ်ခုံအလုပ်သမ ဆတ်သွားသူလေးကို မြင်တွေ့သဘောကျကာ တောင်းရမ်းလက်ထပ်ယူခဲ့ကာ မော်ရီးန်ကိုတော့ ဖခင်တာဝန်ကျတဲ့ ရှမ်းပြည်မှာ မွေးဖွားခဲ့တယ်။ ငယ်စဉ်က ပြည့်စုံပျော်ရွှင်စွာ မိခင်နဲ့ အထိန်းနဲ့ ဘိုဆန်ဆန် နေရသူလေးပါ။ ဒီလိုပျော်ရွှင်အေးချမ်းနေရာကနေ ကလောမြို့မှာရှိတဲ့ အီတာလျံသီလရှင်များ တည်ထောင်ထားတဲ့ စိန့်အက်ဂနက်စ် ကွန်ဗင့်ကျောင်းမှာ ကျောင်းအိပ်ကျောင်းစား ပို့ခြင်းခံလိုက်ရပါတယ်။ မိဘနဲ့ ခွဲပြီးကျောင်းအိပ်ကျောင်းစား နေထိုင်ရတဲ့ ကနဦးကာလတွေမှာ အသက်အတော်ငယ်ပြီး နေရာစိမ်းမှာ စည်းကမ်းကလနားနဲ့ နေထိုင်ရတာ ခက်ခဲပေမယ့် မြန်မာပြည်ကို ဂျပန်တွေ ဝင်လာသောအခါမှ စတင်ပြီး တကယ့်ခက်ခဲသော နေ့ရက်များကို ရင်ဆိုင်ဖြတ်သန်းခဲ့ရတာပါ။ ဒီစာအုပ်အရင် ဆရာဦးဝင်းငြိမ်း ဘာသာပြန်တဲ့ ဗမာ့ဟယ်လင်တုန်းကလည်း အင်္ဂလိပ်အထွက် ဂျပန်တွေဝင်လာချိန် စစ်သုံ့ပန်း အဖြစ်နေခဲ့ရတဲ့ သူနာပြုဆရာမ ဟယ်လင့်အကြောင်းတုန်းကိုလည်း တော်တော်လေး ကျွန်မသဘောကျခဲ့တာပါ။ မတူတာက ဟယ်လင်ဟာ အရွယ်ရောက်ပြီး သူနာပြုဆရာမတစ်ယောက်ရဲ့ ဖြတ်သန်းခဲ့ရတဲ့ အတွေ့အကြုံဖြစ်ပြီး မော်ရီးန်ကတော့ အသက်၁၀နှစ်အောက် ကလေးမလေးပါ။ ပြီးတော့ စည်းကမ်းတင်းကျပ်တဲ့ သီလရှင်များအုပ်ချုပ်မှုအောက်မှာ နေရသူလည်းဖြစ်ပြီး မိဘတွေနဲ့ လုံးဝအဆက်အသွယ်မရဘဲ ကျောင်းမှာမျက်စိသူငယ် နားသူငယ်ဖြစ်နေရသူလေး။ ဒါပေမဲ့ ခက်ခဲတဲ့နေ့ရက်များအကြောင်းကို တိတိကျကျ တဖွဲ့တနွဲ့ပြန်ရေးထားတာကို ဖတ်ရင်း ရုပ်ရှင်ကြည့်နေရသလို မျက်စိထဲမြင်နေရတယ်။
တိတိကျကျလို့ ပြောရတာက ခုနစ်တွေ နေရာဒေသတွေနဲ့ အဖြစ်အပျက်တွေကို သေချာဖော်ပြထားလို့ပါ။ တဖွဲ့တနွဲ့ဆိုတာကတော့ ဘာသာပြန်ပြေပြစ်ကောင်းမွန်တာလို့ ဆိုရမယ်။ မိဘတွေ ဘယ်ရောက်နေမှန်းမသိရ၊ ကိုယ်တိုင်လည်း အစားအသောက်အနေအထိုင် ချို့တဲ့ရပြီး ပြင်ပလောကမှာ ဘာတွေဖြစ်ပျက်နေမှန်း မသိရတဲ့ ကလေးမလေး တစ်ယောက်ရဲ့ မြန်မာပြည်တွင်း နေရတဲ့နေ့ရက်များဟာ စိတ်လှုပ်ရှားရ ထိတ်လန့်ရ အတက်အကျများနဲ့ပါ။ ဘဝအလှည့်အပြောင်းကြီးမားတယ်လို့ဆိုရမယ့် မော်ရီးန်ဟာ ၁၉၄၆ ခုနှစ်မှာ သူမရဲ့ ဖခင်ဘက်က ဆွေမျိုးတွေနဲ့ ပြန်လည်အဆက်အသွယ်ရခဲ့ပါတယ်။ အဲဒီနောက် ဘယ်လိုဆက်ဖြစ်လဲဆိုတာကတော့ စာအုပ်သာဖတ်ကြည့်ပါလို့။ ကျွန်မတော့
စာအုပ်သိပ်အထူကြီးမဟုတ်တာမို့ မြန်မြန်ဖတ်မပြီးချင်လို့ ချွေတာဖတ်ရင်း ၃ရက်ကြာသွားတယ်။
စစ်အတွင်းနေရတဲ့ဘဝမှာ ကိုယ်တိုင်ဆိုရင်ရော ဘယ်လိုများ ကြုံရမလဲလို့ စာဖတ်ပြီး တွေးနေမိတယ်။
#Moonju Lay
Publisher Name: ငါတို့စာပေ
Publisher Address: Yangon Book Plaza သံစျေး ၅လွှာ ၁၇လမ်း ရန်ကုန်။ ဖုန်း - 09 73055543
Publisher Phone Number: 09 73055543
