မြစ်ပြင်တကြော လွင့်လို့မျော
မယ်ကျွိ
မယ်ကျွိ
မြစ်ပြင်တကြော လွင့်လို့မျော...
Fernando Vilela ပေါ်တူဂီဘာသာဖြင့်ရေးသားပြီး
Daniel Hahn အင်္ဂလိပ်ဘာသာပြန်ဆိုထားသည့်
'' Along the Tapajós '' ကို ဘာသာပြန်သည်။
ကံ့ကော်ဝတ်ရည် စာပေ
ပထမအကြိမ်၊ ဇူလိုင် ၂၀၂၀။
မျက်နှာဖုံးနှင့်
အတွင်းသရုပ်ဖော် - Fernando Vilela ၏ မူရင်းသရုပ်ဖော်လက်ရာတို့ကို ဉာဏ်ထက်ကို နှင့် စုစု
ဒီဇိုင်းဖွဲ့သည်။
၂၁.၁ စင်တီမီတာ x ၁၄.၅ စင်တီမီတာ။
စာမျက်နှာ - ၄၀၊ တန်ဖိုး - ကျပ် ၂၀၀၀။
၁ အောက်တိုဘာ ၂၀၁၉ တွင် အင်္ဂလိပ်ဘာသာပြန်မူ ထွက်ရှိထားသည့် လက်ရာကို '' ဟွမ်ဟွမ်နဲ့ ဟက်ဟက်အတွက် ချစ်ခြင်းဖြင့် '' ဟု ရည်ညွှန်း၍ မယ်ကျွိက မြန်မာဘာသာသို့ ပြန်ဆိုထားသည်။
'' မြစ်ပြင်တကြော လွင့်လို့မျော ... '' ဟူသော စာအုပ်အမည်ကို ဆရာသင့်လူ က ပေးထားခြင်းဖြစ်သည်။
တစ်အုပ်လုံး ရောင်စုံပုံနှိပ်ထားသည့် စာအုပ်လည်းဖြစ်ရာ မူရင်းစာရေးဆရာ၏ သရုပ်ဖော်ပုံလက်ရာတို့ကို လည်း ခံစားနိုင်မည့် စာအုပ်တစ်အုပ်ဖြစ်သည်။
ဘရာဇီးနိုင်ငံရှိ အမေဇုံ မိုးသစ်တောကို ဖြတ်သန်း စီး ဆင်း လျက်ရှိသည့် အလျားမိုင် ၁၂၀၀ ရှည်လျားသော တာပါဂျောစ် Tapajós မြစ်ကမ်းနံဘေးနေထိုင်ကြသူတို့ အကြောင်း ရေးဖွဲ့ထားသည့် ဇာတ်လမ်းလေးတစ်ပုဒ်ဖြစ်သည်။
မြစ်ကမ်းနံဘေးနေထိုင်ကြသူများဟု အဓိပ္ပာယ်ရသည့် ပေါပူလားစွန်အေ ရီဘီရီဟာစ် populaçőes ribeirinhas တို့မှာ မြို့ပေါ်၌ နေထိုင်ကြသူများနှင့် နေထိုင်မှုပုံစံ လုံးဝကွဲပြား ခြားနားကြသူများဖြစ်သည်။
ခြေတံရှည်အိမ်များဖြင့်နေထိုင်ကြသည်။ ကြိုးပုခက်များဆင်၍ အိပ်စက်လေ့ရှိကြသည်။ လှေဖြင့်သာ သွား လာလှုပ်ရှား ကြသည်။ ဆောင်းရာသီ၌ တာပါဂျောစ်မြစ်ရေတက်ချိန်တို့တွင် ရေမြှုပ်သွားသော နေအိမ်များ၊ စာသင်ကျောင်းများနှင့် ဝတ်ကျောင်းတို့ကို ထားရစ်ကာ မိုးသစ်တော အလယ်ပိုင်းရှိ နေရောင်လည်းရ၊ ရေလမ်း နှင့်လည်းနီးသော ကုန်းမြေများရှိ ရာသို့ ပြောင်းရွှေ့နေ ထိုင်ကြရမြဲဖြစ်သည်။ ထိုသို့ ရွှေ့ပြောင်း နေထိုင်ကြရာ တွင် အိမ်မွေးတိရစ ္ဆာန်တို့ကိုလည်း ခေါ်ဆောင်သွား တတ်ကြသည်။ နွေရာသီကာလတွင်မူ မြစ်ကမ်းနံဘေးနေထိုင်ကြသူတို့၏ မြို့လေး၊ ရွာလေးများမှာ ပြန်လည်စည်ကားသိုက်မြိုက်လာကြမြဲဖြစ်သည်။
ယခုဇာတ်လမ်းကို ကာဝိုန်း အမည်ရှိ ကောင်လေးတစ်ဦးက ပြန်ပြောင်းပြောပြဟန်ဖြင့်ရေးဖွဲ့ထားသည်။
ဆောင်းရာသီကာလ မြစ်ရေတက်လာရာ ကာဝိုန်းနှင့် အီနဲ့တို့ မောင်နှမသည်လည်း မိသားစုနှင့်အတူ ပြောင်း ကြရွှေ့ကြရသည်။ သူတို့မေမေနှင့် အီနဲ့ တို့က
စားသောက်စရာများစီစဉ်ခြင်း၊ ပစ္စည်းပစ္စယများနေရာ ချထားခြင်းတို့လုပ်ဆောင်ကြသည်။ သူတို့ဖေဖေနှင့် ကာဝိုန်းတို့က အိမ်ဆောက်ရန် သစ်များရှာဖွေကြသည်။
အမျိုးသားများက နေအိမ်တို့ကို ကြမ်းခင်း ထရံကာကြ ပြီးနောက် အမျိုးသမီးတို့က ကောက်ရိုးများဖြင့် အမိုးမိုး ကြသည်။ နေရာတကျ ဖြစ်ချိန်တွင် ကျန်ရစ်ခဲ့သူကို
ကလေးများက သတိရမိကြသည်။ သူတို့မွေးထားကြ သည့် တီတီအမည်ရှိ လိပ်ကြီးတစ်ကောင်ပင်ဖြစ်သည်။ ထိုလိပ်ကြီးအား ကာဝိုန်းနှင့် အီနဲ့ တို့က သွားရောက်ကယ်တင်ရန်ဆုံးဖြတ်လိုက်ကြသည်။ မနက်နေထွက်ချိန်မှစ၍ တစ်ရက်လုံးလှေလှော်လာကြရာ ညနေစောင်း တော့မှပင် ရွာသို့ရောက်သည်။
ရေမြှုပ်နေသည့် သူတို့အိမ်၏ ခေါင်မိုးထက်တွင် တီတီ ကိုတွေ့ရသည်။ တီတီနောက်တွင် ဧရာမမြွေကြီးတစ်ကောင်။ တီတီကို အချိန်မီကယ်တင်၍ ရပါဦးမည်လော။
'' မြစ်ပြင်တကြော လွင့်လို့မျော...'' သည် ဆေးရောင်စုံ သရုပ်ဖော်လက်ရာများဖြင့် ယှဉ်တွဲခံစားနိုင်မည့်
ချစ်စရာဇာတ်လမ်းလေးတစ်ပုဒ်ပင် ဖြစ်ပါသည်။
မိုးမင်းသိမ်း
၂၅ စက်တင်ဘာ ၂၀၂၀
Publisher Name: ကံကော်ဝတ်ရည်စာပေ
Publisher Address: အမှတ်-၂၂၊ မဟာဇေယျလမ်း၊ပုဇွန်ထောင်မြို့နယ်၊ ရန်ကုနမြို့။ ဖုန်း- 09250012348 ၊ 0931561418 ၊ 0973041137 email:kantkawwutyee@gmail.com http://kantkawwutyee.myanmaronlinesales.com
Publisher Phone Number: 09250012348 ၊ 0931561418 ၊ 0973041137
