ပင်ကိုယ်ရေးစာများ
တင်မောင်မြင့်
ပထမအကြိမ် - လင်းလွန်းခင်စာပေတိုက် ၂၀၂၀
စာမျက်နှာ - ၃၂၄မျက်နှာ
စာအုပ်တန်ဖိုး - ၅၀၀၀ကျပ်
ပင်ကိုယ်ရေးစာများ - တင်မောင်မြင့်
စာဖတ်သူတော်တော်များများ တွေးမိကြပါလိမ့်မယ်။
"နိုင်ငံခြားစာအုပ်ကောင်းများကို ဘာသာပြန်စာပေ
အဖြစ် မိခင်မြန်မာဘာသာသို့ ပြန်ဆိုရေးသားရင်း အောင်မြင်နေကြသော ဘာသာပြန်စာရေးဆရာများဟာ မိမိတို့ကိုယ်ပိုင် ဖန်တီးရေးသားထားသော ပင်ကိုယ်ရေး စာပေများမှာ ဘာသာပြန်စာပေများလောက် သုတ
ရသ အဖွဲ့အနွဲ့ကောင်းလောက်ပါရဲ့မလား" ဆိုတဲ့
မသိစိတ်က နှိုင်းယှဉ်မှု လေ့လာလိုမှု သိလိုမှုတွေပါ။
ဆရာတင်မောင်မြင့်သည် ဘာသာပြန်စာပေနယ်တွင်
"မဒမ်ကျူ ရီ-၂၀၀၁" "တောင်ပံမဲ့ သင်းကွဲတေးဆိုဌက်-၂၀၀၄" "အနက်ရောင်အိပ်မက် စိမ်းမြမေတ္တာ-၂၀၀၇" "မျှော်-၂၀၁၁" "ပြစ်မှုနှင့်ပြစ်ဒဏ်-၂၀၁၂" စတဲ့စာအုပ်၅အုပ်ဖြင့် အမျိုးသားစာပေဆု(ဘာသာပြန်) ၅ကြိမ်ရရှိထားပြီး ယနေ့အထိ ဘာသာပြန်စာအုပ်ပေါင်း၁၀၀ကျော် ရေးသားထားသော တသက်တာစာပေဆုကို ၂၀၁၈ခုနှစ်ရရှိခဲ့သည် စာရေးဆရာဖြစ်ပါသည်။
ယခုစာအုပ်မှာတော့ ဆရာ့ရဲ့ပင်ကိုယ်ရေးစာပေ အမျိုးအစားလို့ ခေါ်ဆိုနိုင်မည့် စာများကို
၁ - အောက်မေ့ဖွယ်စာ
၂ - အမှာစာများ
၃ - မဂ္ဂဇင်းဝတ္ထုများ
၄ - ဆောင်းပါးများ ဟူ၍ ၄ပိုင်းခွဲ တင်ဆက်ထားသည်။
အောက်မေ့ဖွယ်စာတွင် စာပေနယ်ပယ်မှ မိတ်ဆွေများဖြစ်သည့် ဆရာနန္ဒမိတ်အကြောင်းကို "နန္ဒာပုလဲဖန်ဆင်းရှင်နှင့် ဆုံမိခြင်း"ဟူ၍လည်းကောင်း
ပန်းချီဆရာစံတိုးအကြောင်းကို "လွမ်းဖွယ့်စံတိုး"ဟူ၍ လည်းကောင်း သတိတရရေးဖွဲ့ထားသည်။
အမှာစာများအပိုင်းတွင်မူ ဆရာဘာသာပြန်ခဲ့သည့် စာအုပ်များနှင့်ပတ်သက်၍ အမှတ်ရစရာများ အဆိုပါစာအုပ်များကို ဘာသာပြန်ဖြစ်ခဲ့သည့် တွန်းအားများ အမှတ်ရစရာများ စာဖတ်ပရိသတ်ကို သိလိုစေသည်များကို
ဆရာဘာသာပြန်ခဲ့သည့်စာအုပ်များမှ အမှာစာများကို
ပေါင်းစည်းစုစည်းတင်ပြထားခြင်း ဖြစ်သည်။
ဆရာတင်မောင်မြင့်သည် အမှာစာရေးသားမှုတွင်
အားနည်းသည့်စာအုပ်ဆရာတစ်ယောက် ဖြစ်သည့်အတွက် ဆရာ့အနေဖြင့် သူဘာသာပြန်ခဲ့သည့် စာအုပ်များအပေါ် မည်သို့မှတ်ချတ်ပြု အမှာစာများ ရေးသားထားသည်ကို ဖတ်ရှုရသည်မှာလည်း စိတ်ဝင်စားဖွယ်ဖြစ်သည်။
မဂ္ဂဇင်းဝတ္ထုများတွင်မူ ဆရာတင်မောင်မြင့်ကိုယ်တိုင် ရေးသားထားသည့် "ငပလီအမုန်း" "အိပ်မက်ဆိုး"စသည့် ဝတ္ထုတိုများကို မဂ္ဂဇင်းများတွင် ဖော်ပြခံရသည့်
ဝတ္ထုတို၉ပုဒ်စုစည်းမှုအနေဖြင့် ဖတ်ရှုရပေမည်။
ဆရာတင်မောင်မြင့်၏ ပင်ကိုယ်ရေးဝတ္ထုတိုစစ်စစ်များ ဖြစ်သည့်အတွက် စာဖတ်သူများအတွက် စာပေရေးသားမှုပုံစံကို လေ့လာရတွင် အထောက်အကူဖြစ်ရုံမက ရသခံစားမှုပါ ရရှိပေလိမ့်မည်။
"သည်းဦးပန်းကိုစွှန့်လွှတ်ခြင်း" ဝတ္ထုတိုကို ဖတ်ရာတွင်
ဆင့်ပွား တွေးစရာများကျန်ခဲ့ရုံသာမက ဆရာအောင်သင်း၏ ဝတ္ထုအပေါ် မှတ်ချက်အမြင်ကိုပါ ဖတ်ရမည်။
ဆောင်းပါးများတွင်မူ ၁၉၅၈ဝန်းကျင်သတင်းစာများတွင်
ဆရာတင်မောင်မြင့်ကိုယ်တိုင် အခြားကလောင်နာမည် များစွာဖြင့် ရေးသားခဲ့သည့် သတင်းဆောင်းပါးများကို
ဖတ်ရှုနိုင်ပေလိမ့်မည်။
ဆရာသည် မြန်မာ့ရေနံအလုပ်သမားတစ်ဦး ဖြစ်ခဲ့သည့်အတွက် ၄င်း၏ဆောင်းပါးများတွင် မြန်မာ့ရေနံလုပ်ငန်းအကြောင်း ဆောင်းပါးများစွာ ရေးသားဖော်ပြခံခဲ့ ရသည်ကိုလည်း သိရှိနိုင်သည်။
အနှစ်ချုပ်အနေနဲ့ ပြောရလျှင် ယခုစာအုပ်သည်
သုတရသရောယှက်နေသည့်စာပေအမျိုးအစားဖြစ်သည်။ ဝတ္ထုတိုများကို ရသမြောက်ဖွယ် ဖတ်ရှုနိုင်သလို
ဆောင်းပါးများကိုလည်း သုတရဖွယ် လေ့လာနိုင်သည်။
ဘာသာပြန်ခဲ့သည့် စာအုပ်များစွာအနက်မှ စာအုပ်၂၀အုပ်အတွက် အမှာစာများကိုဖတ်ရှုရင်း အဆိုပါစာအုပ်များကိုပါ ထပ်မံလေ့လာ ဖတ်ရှုလိုစိတ်များ ပေါ်လာစေမည်ဟု ဆန္ဒပြုရင်း ဆရာတင်မောင်မြင့်၏
"ပင်ကိုယ်ရေးစာများ"စာအုပ်အကြောင်း ယခုမျှသာ
ညွန်းဆိုရေးသားပါရစေ။ ။
စာညွှန်းရေးသားသူ - ထက်ဝေ(Htet Dendrophile)
Publisher Name: လင်းလွန်းခင်စာအုပ်တိုက်
Publisher Phone Number: 01 293401, 09 220 1730
