တပ်မှူးများ
မြသန်းတင့်
မြသန်းတင့် (ကိုယ်ရေးအကျဥ်းနှင့်စာအုပ်များစာရင်း)
အိမ်အရောက်စာအုပ်ငှားဖတ်ချင်သူများအတွက်အစီအစဥ်
မြသန်းတင့်
တပ်မှူးများ
Bob Woodward ၏ The Commanders ကို
ဘာသာပြန်သည်။
တိုးမြစ်စာအုပ်တိုက်၊ပထမအကြိမ်၊ ၁ နိုဝင်ဘာ ၂၀၁၉။
မျက်နှာဖုံးပန်းချီနှင့် ဒီဇိုင်း - ဇော်မောင်။
၁၃.၆ စင်တီမီတာ x ၂၁ စင်တီမီတာ။
စာမျက်နှာ - ကမှဍ နှင့် ၁၆၉၊ တန်ဖိုး - ကျပ် ၃၀၀၀။
၁၉၉၄ ခုနှစ် ဖေဖော်ဝါရီလမှ ၁၉၉၅ ခုနှစ် မေလအထိ
တော်ဝင်ဂျာနယ် တွင် အခန်းဆက်ဘာသာပြန်ဆိုခဲ့ သည့် အရေးအသားတို့ကို စုစည်းထုတ်ဝေထားခြင်းဖြစ်သည်။
၇ အောက်တိုဘာ ၂၀၁၉ ရက်စွဲဖြင့် ရေးသားထားသော တိုးမြစ်၏ မှတ်ချက်၊ မြန်မာပြန်သူ၏အမှာနှင့် အက္ခရာ စဉ်အညွှန်း တို့ပါရှိသည်။
ဝါရှင်တန်ပို့စ် သတင်းစာကြီး၏ အယ်ဒီတာတစ်ဦးဖြစ်သူအမေရိကန်သတင်းစာဆရာ ဘော့ဝုဝါ့ဒ်၏ ၁၉၉၁ ခုနှစ်တွင် ထုတ်ဝေခဲ့သော အရေးအသားကို ဘာသာ ပြန်ဆိုထားခြင်း ဖြစ်သည်။
အခန်း ၁၊ ပါဝဲနှင့် ရွှာဇကော့ဖ်၊ ဆဒမ်၏တင့်ကားများ၊ ဆုံး ဖြတ်ချက် မကျသော အစည်းအဝေး၊ တန်ပြန်ပြင်ဆင်မှုများ၊ ကန့်လန့်ကာနောက်ကွယ်မှာ၊ တိုက်မည်လော ဆုတ်မည်လော၊ ဆက်ဒမ်၏စိတ်နေစိတ်ထား၊ တစ်ဆယ် - သုည - နှစ်၊ သံတမန်လမ်းခင်းမှုများ၊ အမေရိကန် ဘာလုပ်မလဲ၊ သံတမန်အောင်ပွဲ၊ လေတပ်ဦးစီးချုပ်ကို ဖယ်ရှားခြင်း၊ သမ္မတနှင့် စစ်ဦးစီးချုပ်ဥက္ကဋ္ဌ တို့၏ အကွဲ စသည့် အခန်း ၁၄ ခန်း ပါရှိသည်။
'' ယခုဆောင်းပါးသည် သတင်းစာ အတတ်ပညာနှင့် သမိုင်းဗေဒကို ပေါင်းထားသည့် ဆောင်းပါးတစ်ပုဒ်ဖြစ်သည်။ သတင်းစာဆရာက ယနေ့ဖြစ်ပျက်နေသောအခြေအနေကို ပြောပြသွားပြီး သမိုင်းဆရာက ထိုအဖြစ်အပျက်များ မည်သို့ မည်ပုံ ဖြစ်လာကြောင်းကို ခြေရာကောက်ပြသည်။ သို့ရာတွင် သူခြေရာကောက်ပြသည့် အတိတ်သမိုင်းကြောင်းသည် ပင့်ကူမျှင်တို့ ရစ်ဖွဲ့နေ သည့် မှုန်ရီသော အတိတ်သမိုင်း မဟုတ်ပါ။ စိမ်းစိုလတ်ဆတ်နေသော မျက်မှောက်ခေတ် သမိုင်းသာ ဖြစ်ပါ သည်။ ''ဟု မြန်မာပြန်သူ၏အမှာတွင် ဖော်ပြထားသည်။
ပင်လယ်ကွေ့စစ်ပွဲ မတိုင်မီ အမေရိကန် နိုင်ငံခြားရေးနှင့် စစ်ရေး ဆုံးဖြတ်ချက်များကို ချမှတ်ခဲ့သူ အထက်တန်း အရာရှိ များအကြား သဘောထားကွဲလွဲမှုများ၊ ပဋိပက္ခ များ၊ နောက်ခံအဖြစ်အပျက်များကို ဖော်ပြထားသည့် ဤစာအုပ်ကို ရေးသားရာတွင် ဝုဝါ့ဒ်သည် ထိုဆုံးဖြတ်ချက်များကို ချမှတ်ခဲ့သူများနှင့်အကြိမ်ပေါင်းများစွာ တွေ့ဆုံမေးမြန်းခဲ့သည်။ လပေါင်း ၂၇ လ အတွင်းတွင် အိမ်ဖြူတော်နှင့်ပင်တဂွန်စစ်ဋ္ဌာနချုပ်မှ အရာရှိကြီးပေါင်း ၄၀၀ ကျော်တို့ကို တွေ့ဆုံမေးမြန်းခဲ့သည်။
'' ပင်လယ်ကွေ့စစ်ပွဲအကြောင်းကိုရေးသည့် စာအုပ်များ ပေါ်ထွက်ခဲ့ပြီးဖြစ်သော်လည်း ဝုဝါ့ဒ်၏ စာအုပ်လောက် အချက်အလက်ပြည့်စုံခြင်းမရှိ။ ယခုစာအုပ်မှာ ပင်လယ်ကွေ့စစ်ပွဲနှင့် ပတ်သက်၍ ကန့်လန့်ကာနောက်မှ အဖြစ်အပျက်များကို ရေးပြသဖြင့် နောက်ကွယ်က အဖြစ်အပျက်များကို ကျွန်တော်တို့ တွေ့နိုင်သည်။ ဝုဝါ့ဒ်သည် ကန့်လန့်ကာကို ဆွဲဖွင့် ပြလိုက်လေပြီ။'' ဟုလည်း မြန်မာပြန်သူ၏အမှာတွင် ဖော်ပြထားသည်။
'' ၁၉၉၀ ခု ဧပြီလဆန်းတွင် အမေရိကန်ပြည်ထောင်စု ဆိုင်ရာဆော်ဒီအာရေးဘီးယားသံအမတ်ကြီး မင်းသား ကြီး ဘန္ဒာဘင်းစူလတန်သည် ဦးရီးတော် ဘုရင်ဖာ့ဒ်ထံမှ တယ်လီဖုန်း သတင်းတစ်ခုကို ရခဲ့သည်။ ''
( စာမျက်နှာ ၁ မှ ) ဟု '' တပ်မှူးများ '' ကို အစပျိုးထား သည်။
အီရတ်သမ္မတကြီး ဆက်ဒမ်ဟူစိန်က အမေရိကန်ပြည်ထောင်စုနှင့် ပတ်သက်၍ အရေးတကြီးဆွေးနွေးစရာ ရှိသဖြင့် သူ့ထံသို့တစ်ယောက်ယောက်ကို စေလွှတ်ပေးစေလိုကြောင်းပြောသဖြင့် ဘန္ဒာအား အီရတ်သို့စေ လွှတ်ရန်ဖြစ်သည်။
အသက် ၄၁ နှစ်အရွယ်ရှိ အမေရိကန်ပြည်ထောင်စု ဆိုင်ရာ ဆော်ဒီအာရေးဘီးယား သံအမတ်ကြီးသည်
အမေရိကန်သမ္မတ ဘုရှ်၊ နိုင်ငံခြားရေးဝန်ကြီး ဘေကာ၊ ကာကွယ်ရေးဝန်ကြီး ရှေနီ၊ အမျိုးသားလုံခြုံရေးကောင်စီဥက္ကဋ္ဌ စကိုးကရော့၊ပူးတွဲစစ်ဦးစီးချုပ်ဥက္ကဋ္ဌကောလင်း ပါဝဲ စသူတို့နှင့် ရင်းနှီးသူဖြစ်သည်။
'' အစ္စရေးကို တိုက်ခိုက်ရန် ရည်ရွယ်ချက် မရှိကြောင်း '' ကို ဘုရ်ှထံသို့ ဘန္ဒာမှတစ်ဆင့် ဆဒမ်ဟူစိန်က အမှာစကားပါး လိုက်သည်။
နောက်သုံလအကြာ ၁၆ ဇူလိုင် ၁၉၉၀ တွင် ကူဝိတ်မြောက်ဘက်ရှိ အီရတ်နိုင်ငံအရှေ့တောင်ပိုင်း
သဲကန ္တာရအတွင်း၌ ထူးခြားမှုများတွေ့လာရသည်။
ပင်လယ်ကွေ့စစ်ပွဲကြီးဖြစ်ပွားစေမည့် ကူဝိတ်နိုင်ငံအား ကျူးကျော်တိုက်ခိုက်မှုကို အီရတ်တို့ဘက်မှ စတင်
မီးမွှေးလိုက်ခြင်းပေတည်း။
မိုးမင်းသိမ်း
၁၄ ဒီဇင်ဘာ ၂၀၁၉
Publisher Name: တိုးမြစ်စာအုပ်တိုက်
Publisher Address: အမှတ် ၁၇၀ (ဒုတိယထပ်) ဗိုလ်ချုပ်အောင်ဆန်းလမ်း (၄၅လမ်းနဲ့ မျက်နှာချင်းဆိုင်) ပုဇွန်တောင်၊ ရန်ကုန် 09449523317
Publisher Phone Number: 09449523317
