ရှာတော်ပုံ
တော်ကောင်းမင်း
စာအုပ်အမည် - ရှာတော်ပုံ
မူရင်း စာအုပ် - 文城 (Wen Cheng)
စာရေးသူ - Yu Hua ယွီဟွာ
ဘာသာပြန်သူ - တော်ကောင်းမင်း
ကံကော်ဝတ်ရည် စာအုပ်တိုက် (ပထမ အကြိမ်) သြဂုတ်လ ၂၀၂၂
အုပ်ရည် ၁၀၀၀
စာအုပ် တန်ဖိုး - ၁၂၀၀၀ ကျပ်
စာမျက်နှာ ၅၄၄
တော်ကောင်းမင်း
(ကိုယ်ရေးအကျဥ်းနှင့်စာအုပ်များစာရင်း)
ကိုယ်မှာက အလုပ် သုံးလ လုပ်ပြီးရင် တပတ်နားခွင့်ရတယ်။ အစက တူရကီလောက် နီးနီးနားနား သွားပြီး ပြန်လာဖို့ ကြံပေမဲ့ ဗီဇာကိစ္စက တော်တော် အာရုံတွေနောက်တာနဲ့ ထိုင်းသွားမယ်ဆိုပြီး ချက်ချင်းလက်ငင်းကြီး ဆုံးဖြတ်ပစ်တာပဲ။ ဒီလိုဆိုတော့ စားစရာ၊ စာအုပ်တွေ သယ်နိုင်သမျှ သယ်လာမယ်ဆိုပြီး ဆက်စီစဥ်ပေါ့။ စာအုပ်တွေချည်း ၁၀ ကီလို သယ်လာပစ်လိုက်တယ်။
ရှာတော်ပုံထွက်ကတည်းက အသည်းအသန်ဖတ်ချင်နေခဲ့တာ။ ယွီဟွာ စာအုပ်တွေ ဆရာ တော်ကောင်းမင်း ဘာသာပြန်သမျှ ကိုယ်ကြိုက်တာချည်းပဲကို။ သက်ရှင်နေ၊ ရွှီစန်းကွမ်း သွေးရောင်းမှတ်တမ်း၊ သတ္တမနေ့ စတာတွေပေါ့။
စာအုပ်ကို ၂ရက်နဲ့ အပြီး ဖတ်ပစ်လိုက်တယ်။ စာအုပ်တအုပ်ကို ဒီလို အရသာခံ မဖတ်ရတာ ဘယ်လောက်ကြာခဲ့ပီလဲ။ ကိုယ်မှတ်တောင် မမှတ်မိတော့ဘူး။ လက်ထဲရှိတဲ့ စာအုပ်တွေကို ချွေတာ ဖတ်နေရတာနဲ့.. တခြားဘာသာစကားနဲ့ဆို မြန်မာစာနဲ့ ဖတ်သလောက် အရှေ့မရောက်နိုင်တာနဲ့ ဒီအရသာကို ကိုယ်မရတာကြာခဲ့ပေါ့။ ထိုင်းနဲ့ အီရက် လေယာဥ်ခရီးက စုစုပေါင်း ၁၅ နာရီဝင်းကျင် စာဖတ်ချိန် နည်းနည်းရနိုင်တယ်။ ပင်ပန်းလို့ အိပ်နေတဲ့ အချိန်ရယ်။ လေဆိပ်မှာ ဟိုဟိုဒီီဒီသွားဖို့ အချိန်ရယ် နှုတ်ရသေးတာကို။
တော်တော်လေး အိပ်ပြီးမှ စာအုပ်ကို ထုတ်ဖတ်ဖြစ်တာပဲ။ လက်က ချမရအောင် ဖတ်မိသွားတော့တယ်။ ဘဲကြီးတပွေ နှင်းမုန်တိုင်း ကြားထဲမှာ မြို့တမြို့ကို ရောက်ခဲ့တယ်။ တယောက်ထဲမဟုတ်ပဲ ရင်ခွင်ပိုက် ကလေးလေး တယောက်ပါပါတယ်။ သူ့ပုံစံက အရူးလိုလို အကောင်းလိုလို၊ သူတောင်းစားလိုလို ဘာလိုလိုနဲ့။ နို့စို့ကလေးရှိတဲ့ အိမ်တိုင်းရှေ့ကို သူရောက်လာပြီး ကလေးကို နို့တိုက်ဖို့ တောင်းဆိုတယ်။ ဒင်္ဂါးတပြားပေးတယ်။ သူဘယ်ကလာတယ်ဆိုတာ ဘယ်သူမှ မသိကြဘူး။ အဝေးကြီးက လာမှန်းတော့ သိတယ်။ ဘာလို့လာလဲဆိုတာလည်း မသိကြဘူး။ သူဟာ ပုစ္ဆာတပုဒ်ဖြစ်လာတယ်။ သတင်းတခုဖြစ်လာတယ်။ ဒီလို နိဒါန်းပျိုးထားရာက သူ့ဘဝအကြောင်းကို အစကနေ ပြန်စပြထားတယ်။ သူဘာလို့ ဒီကို ရောက်လာတဲ့ အကြောင်း ဆက်သွား…
အဲဒီဒေသ နာမည်က သျှီကြန့်… သူသွားချင်တာက ဝန်းချိန်.. သို့ပေမဲ့ ဝန်းချိန် ဘယ်မှာရှိတယ်ဆိုတာ ဘယ်သူမှ မသိကြပြန်ဘူး။ ဝန်းချိန်ဆိုတာ သူဆီက ထွက်သွားတဲ့ သူ့ချစ်တဲ့ အမျိုးသမီးလေးရဲ့ မွေးရပ်မြေတဲ့။ ဘယ်ကပေါ်လာမှန်း မသိတဲ့ အမျိုးသမီးလေးဟာ သူအိမ်ကို တန်းတန်းမတ်မတ်ရောက်လာပြီး ချစ်ကျွမ်းဝင်။ ကလေးလေးတယောက် မွေးပေးခဲ့ပြီး ဘယ်အရပ်ကို ထွက်သွားမှန်းမသိ ပျောက်ဆုံးသွားခဲ့တာ။
ရှောင်မေဟာ ဘာလို့ ထွက်သွားတာလဲ…
သူရှာဖွေနေတာကို သူတွေ့မှာလား… ဘာဆက်ဖြစ်လဲ… ဆိုတဲ့ သိချင်စိတ်နဲ့ ဖတ်လိုက်တာ အချိန်တွေ ဘယ်လို ကုန်သွားမှန်းကို မသိတာ။
ရှာတော်ပုံဆိုပေမဲ့… ရှောင်မေကို ရှာရုံနဲ့ ပြီးသွားတာ မဟုတ်ပဲ လင်းသျှင်းဖူဟာ သျှီကြန့်မှာ အောင်မြင်တဲ့ လုပ်ငန်းရှင်တယောက် ဖြစ်လာတဲ့ အထိ၊ မြို့မျက်နှာဖုံးဖြစ်လာတဲ့ အထိ နေသွားတယ်။ ဒီမြို့သားတယောက် ဖြစ်လာတဲ့ အထိပေါ့… သူဘဝတခုလုံးကို မြင်ရသလို တရုပ် လူနေမှု စနစ်တွေကိုပါ တွေ့ရပြန်တာပဲ။
ဇာတ်ကောင်နာမည်တွေ မှတ်ရခက်တဲ့ ကိုယ်အတွက် တရုတ်နာမည်တွေကို မှတ်ရတာလည်း မလွယ်ဘူး။ ဇာတ်ကောင်တွေ တော်တော်များတဲ့ ဒီလိုစာအုပ်မျိုးဆို ပုံမှန်အတိုင်းဆို အကြာကြီး ဖတ်ရမှာပဲ။ ခုတော့ ဇာတ်လမ်းက ဆွဲဆောင်လွန်းတော့ ပြီးသွားတော့တာပဲ။
မှတ်မှတ်ရရ ကိုယ် ဘာသာပြန်ခဲ့တဲ့ ရွက်ကြွေထဲက စကားပုံတခုကိုလည်း တွေ့သေးတယ်။ “ရွက်ကြွေရင် အမြစ်ဆီ ပြန်သွားရတာပဲ” ဆိုတာလေး…
ကိုယ့်အမြစ်ဆီ ဘယ်တော့ ပြန်သွားခွင့်ရမလဲ….
မယ်ကျွိ
ည ၁၁ နာရီ ၁၂ မိနစ်
Erbil, Iraq
#တော်ကောင်းမင်း
#ရှာတော်ပုံ
#yuhua
#မယ်ကျွိ
Publisher Name: ကံကော်ဝတ်ရည်စာပေ
Publisher Address: အမှတ်-၂၂၊ မဟာဇေယျလမ်း၊ပုဇွန်ထောင်မြို့နယ်၊ ရန်ကုနမြို့။ ဖုန်း- 09250012348 ၊ 0931561418 ၊ 0973041137 email:kantkawwutyee@gmail.com http://kantkawwutyee.myanmaronlinesales.com
Publisher Phone Number: 09250012348 ၊ 0931561418 ၊ 0973041137
