ကြာဆစ်ကြိုး မဂ္ဂဇင်းဝတ္ထုရှည်
ခင်ခင်ထူး
ဆရာမခင်ခင်ထူးရဲ့ "ကြာဆစ်ကြိုး မဂ္ဂဇင်းဝတ္ထုရှည်" စာအုပ်ကို ၂၀၀၉ ခုနှစ်၊ စက်တင်ဘာလမှာ စာအုပ်တန်ဖိုး ၂၀၀၀ ကျပ်နဲ့ ဓူဝံစာပေကနေ ဒုတိယအကြိမ်အဖြစ် ထုတ်ဝေဖြန့်ချိထားတယ် ဆိုတဲ့အကြောင်း "စာဖတ်ကြပါစို့" အစီအစဥ်လေးကနေတဆင့် မဆုဝေ မှ သတင်းစကားပါးလိုက်ပါတယ်ရှင်။
ဆရာမ'ခင်ခင်ထူး' လို့ ပြောလိုက်ရင် အညာအငွေ့အသက် လွှမ်းခြုံနေတဲ့ ဝတ္ထုဇာတ်လမ်းတွေ အရေးများတယ်ဆိုတာ သိကြပြီးဖြစ်မှာပါ။ ဒါပေမယ့် အခုမိတ်ဆက်ပေးချင်တဲ့ စာအုပ်ထဲက ဝတ္ထုလေးတွေကတော့ မတူညီတဲ့ အကြောင်းအရာ၊ ဇာတ်လမ်းဇာတ်ကွက်တွေနဲ့ အညာဓလေ့ အညာဟန်ချည်းသက်သက် မဟုတ်ဘူးလို့ ပြောရပါမယ်။
ပထမဆုံးတစ်ပုဒ်ဖြစ်တဲ့ 'ကျေးဇူးတော်မြစ်တစ်စင်း' ဟာ ဖခင်မေတ္တာဖွဲ့ ဇာတ်လမ်းပါ။ ဧရာဝတီမြစ်ပြင်ကျယ်ထဲမှာ စုန်ချည်ဆန်ချည် သွားလာနေတဲ့ အညာဆန်လှေကြီးပေါ်က လှေသမားကြီးတစ်ယောက်ရဲ့ အားမာန်နဲ့ သားသမီးခြောက်ယောက်အပေါ်မှာ ထားရှိတဲ့ ချစ်ခြင်းမေတ္တာတွေဟာ ဆရာမရဲ့ အရေးအဖွဲ့ကြောင့် ရုပ်လုံးကြွ ပေါ်လွင်လှပါတယ်။
'စကားလှေ' ကျပြန်တော့ စကားလုံး အသုံးအနှုန်း ကြွယ်ဝတဲ့ အမေအကြောင်းကို သူပြောတဲ့စကားတွေ၊ သူခိုင်းနှိုင်းပြောဆိုတတ်တဲ့ ဥပမာတွေနဲ့ ပြုံးချင်ဖွယ် ရေးပြထားပါတယ်။ ဒီဝတ္ထုလေးကနေတဆင့် အသက်အရွယ် ကြီးရင့်လာချိန်မှာ ငယ်ဘဝပုံရိပ်တွေကို ပြန်တမ်းတ ပြောဆိုနေတတ်တဲ့ အဖိုး အဖွား၊ အဖေ အမေတို့ရဲ့ အထီးကျန်တဲ့ ခံစားချက်ကိုလည်း တွေ့မြင်နားလည်ရပါတယ်။
အကြိုက်ဆုံးကတော့ 'မြို့ကလေးသူ' ဆိုတဲ့ ဇာတ်လမ်းလေးပါပဲ။ ရန်ကုန်-မန္တလေး ကားလမ်းမကြီးကနေ အတွင်းဘက်နှစ်မိုင်ခန့်အကွာမှာ တည်ရှိတဲ့ မြို့ကလေးဆီ ရောက်လာခဲ့တဲ့ 'မိကြာ'.. စိတ်မနှံ့ပေမယ့် သနားကမား ရုပ်ရည်လေးနဲ့ ချစ်ခင်ဖွယ်ကောင်းသူမို့ မြို့ကလေးသူအဖြစ် သတ်မှတ်ခဲ့ပြီးချိန်မှာမှ အစော်ကားခံလိုက်ရတဲ့အခါ.. သိပ်အဆန်းတကြယ် မဟုတ်တဲ့ အဖြစ်အပျက်ကိုပဲ မိကြာနဲ့အတူ ဆရာဝန်ကြီးဦးသွင်၊ ဦးလရောင်၊ ဒေါက်တာခင်သစ်သွင် စတဲ့ ဇာတ်ကောင်တွေနဲ့ အားဖြည့်ပြီး ရသမြောက်စွာ ရေးဖွဲ့ထားပါတယ်။
အပုဒ်တိုင်းကို ညွှန်းရင် သိပ်ကိုရှည်လျားသွားမှာ စိုးတဲ့အတွက် ကျန်တာတွေကိုတော့ ကိုယ်တိုင်သာ ဖတ်ကြည့်စေချင်ပါတယ်။
#စာဖတ်ကြပါစို့
#Bookreview
#ThaByaeBookCampaign
Publisher Name: ဓူဝံ စာပေ
Publisher Address: ၂၁၂၊ ၃၁ လမ်း၊ ရန်ကုန်
